ഇസ്ലാമിക ധനതത്ത്വശാസ്ത്രത്തെ ആർക്കാണു പേടി?

കഴിഞ്ഞ സർക്കാർ വളരെക്കാലത്തെ ശ്രമഫലമായി അരംഭിച്ച അൽ ബറാക്ക് ഇസ്ലാമിക ധനകാര്യ സർവീസിന്റെ ഇപ്പോഴത്തെ അവസ്ഥ എന്താണു?കഴിഞ്ഞ ദിവസം പൊതുവിദ്യാഭ്യാസ ഡയറക്റ്റർ മുഹമ്മദ് ഹനീസിനെ ഇതിന്റെ ഡയറക്റ്ററായി നിയമിച്ചതായി വാർത്ത വന്നിരുന്നു.ഇത് എഴുതുമ്പോഴും അദ്ദേഹം ചുമതലയേറ്റിട്ടില്ല.

ധനകാര്യ മന്ത്രി കെ.എം.മാണി നിയമസഭയിൽ അടുത്തിടെ പുതിയൊരു സാമ്പത്തിക സമാഹരണ പദ്ധതി പ്രഖ്യാപിച്ചു:ട്രഷറികളിലൂടെ പലിശരഹിത നിക്ഷേപം സ്വീകരിക്കും.അത് വികസനപ്രവർത്തനങ്ങൾക്ക് ഉപയോഗപ്പെടുത്തും എന്നായിരുന്നു മന്ത്രിയുടെ പ്രസ്താവന.-അപ്പോൾ,പ്രാരംഭപ്രവർത്തനങ്ങൾ ആരംഭിച്ച അൽ ബരാക്കിന്റെ ഭാവി എന്ത്?ഇസ്ലാമിക് ധനകാര്യ സംരംഭം വരുന്നെങ്കിൽ വരട്ടെ എന്നാണു അതിനെക്കുറിച്ച് അന്വേഷിച്ചപ്പോൾ മന്ത്രി പ്രതികരിച്ചത്.ട്രഷറികളിലൂടെ പലിശരഹിത നിക്ഷേപങ്ങൾ സ്വീകരിക്കുന്നത് അൽ ബറാക്ക് ധനകാര്യ സർവീസിന്റെ മുന്നോടിയാണെന്നു കൂടി അതേ ശ്വാസത്തിൽ മന്ത്രി പറഞ്ഞു.പക്ഷേ,ഇസ്ലാമിക ധനകാര്യ സംരംഭത്തിൽ സർക്കാരിനു താൽ‌പ്പര്യമില്ലെന്നാണു മുൻ ധനകാര്യ മന്ത്രി തോമസ് ഐസക് പറയുന്നത്.നീണ്ടു നിന്ന വാദപ്രതിവാദങ്ങൾക്കും സുബ്രഹ്മണ്യസ്വാമി കോടതിയിലെത്തിച്ച നിയമയുദ്ധത്തിനും ശേഷമായിരുന്നു ഇന്ത്യയിൽ ആദ്യമായി കേരളത്തിൽ ഇസ്ലാമിക ധനതത്ത്വശാസ്ത്രത്തിലധിഷ്ഠിതമായ പുതിയ ധനകാര്യ സ്ഥാപനം രൂപവത്കൃതമായത്.

ഇസ്ലാമിക് ബാങ്ക് എന്നാണു പൊതുവെ അറിയപ്പെടുന്നതെങ്കിലും ഇത് റിസർവ്ബാങ്ക് നിയമത്തിന്റെ പരിധിക്കുള്ളിൽ വരുന്ന ബാങ്കല്ല.ബാങ്കിങ്ങ്-ഇതര പ്രവർത്തനങ്ങൾ നടത്തുന്ന ഒരു ധനകാര്യ സ്ഥാപനമാണിത്.ഇതിന്റെ അടിസ്ഥാനം ശരിയത്താണു.പലിശ വാങ്ങുകയോ കൊടുക്കുകയോ ചെയ്യാതെ പ്രവർത്തിക്കുന്നു.ലഭിക്കുന്ന നിക്ഷേപങ്ങൾ ഹറാമല്ലാത്ത സംരംഭങ്ങൾക്ക് മുടക്കുന്നു.മദ്യം,മയക്കുമരുന്നു,ലൈംഗിക,സിനിമാ മേഖലകൾ തുടങ്ങിയവയുമായി ബന്ധപ്പെട്ട സംരംഭങ്ങൾക്ക് പണം ഇറക്കില്ല.വായ്പ്പയായല്ല,ലാഭ-നഷ്ടങ്ങൾ പരസ്പരം പങ്കു വെയ്ക്കണമെന്ന വ്യവസ്ഥയിലാണു ഇവിടെ പണം നൽകുന്നത്.അതുകൊണ്ടു തന്നെ സഹകരണപ്രസ്ഥാനങ്ങളുടെ ഘടനയുമായി ഇതിനുവിദൂര സാദൃശ്യമുണ്ടു.കേരള വ്യവസായ വികസന കോർപ്പറേഷനാണു ഇതിന്റെ 11 ശതമാനം ഓഹരിവിഹിതം.ബാക്കി കേരളത്തിനകത്തും പുറത്തുമുള്ള മലയാളികളുടെ വിഹിതമാണു.

ശരിയത്തിനെ അടിസ്ഥാനമാക്കിയുള്ള സംരംഭമാണെങ്കിലും ഇതിനു മതപരമായ അതിർവരമ്പുകളൊന്നുമില്ല.മതേതര സർക്കാരിനു ഇത്തരം സംരംഭങ്ങളിൽ പങ്കാളിയാകുന്നതിനു യാതൊരു നിയമതടസ്സവുമില്ലെന്നും,ഇതു ഭരണഘടനാലംഘനമല്ലെന്നും കേരള ഹൈക്കോടതി വിധിച്ചിട്ടുണ്ടു.എല്ലാ മതവിഭാഗക്കാരും ഉൾക്കൊള്ളുന്നതാണു ഇതിന്റെ ഡയറക്റ്റർ ബോർഡ്.പലിശ വാങ്ങുന്നത് നിഷിദ്ധമായതിനാൽ മുസ്ലിംങ്ങളുടെ അക്കൌണ്ടുകളിലുള്ള 500 കോടിയിലേറെ രൂപ വെറുതെ കിടക്കുന്നുണ്ടെന്നാണു കണക്ക്.വിദേശ മലയാളികളുടെ അക്കൌണ്ടുകളിലും ഇങ്ങനെ അവകാശപ്പെടാത്ത പലിശപ്പണം കുന്നുകൂടിക്കിടക്കുന്നുണ്ടു.പലിശരഹിത നിക്ഷേപങ്ങൾ സ്വീകരിച്ച് പുതിയ സംരംഭം തുടങ്ങുന്നതോടെ വൻ തോതിൽ ഈ പണം ജനക്ഷേമകരമായ പ്രവർത്തനങ്ങൾക്ക് ഉപയോഗപ്പെടുത്താനാകും.

ലോകമെമ്പാടും പ്രവർത്തനമികവിലൂടെ മറ്റുള്ളവർക്ക് മാതൃക കാട്ടുന്നവയാണു ഇസ്ലാമിക ബാങ്കുകൾ.1963ൽ ആരംഭിക്കുകയും 1975ൽ ദുബൈ ഇസ്ലാമിക് ബാങ്കിന്റെ സ്ഥാപനത്തോടെ വ്യവസ്ഥാപിത രൂപം കൈക്കൊള്ളുകയും ചെയ്ത ഇസ്ലാമിക ബാങ്കിങ്ങ് സർവീസുകളിലായി ഇപ്പോൾ 1.2 ട്രില്യൻ നിക്ഷേപമാണുള്ളത്.ഇത് മൊത്തം ബാങ്കുകളിലെ നിക്ഷേപത്തിന്റെ ഒരു ശതമാനം പോലും വരുകയില്ലെങ്കിലും കഴിഞ്ഞവർഷങ്ങളിൽ 20 ശതമാനം വളർച്ചയാണു നേടിയിട്ടുള്ളത്.മലേഷ്യയിലെ ബാങ്കിങ്ങ് മേഖലയുടെ 22 ശതമാനവും ഇസ്ലാമിക് ബാങ്കിങ്ങിലൂടെയാണു നടക്കുന്നത്.ഇന്ത്യോനേഷ്യ,കുവൈറ്റ്,ബഹ്റിൻ,സൌദി അറേബ്യ തുടങ്ങി കമ്മ്യൂണിസ്റ്റ് ചൈനയും കൊറിയയും വരെ 75 രാജ്യങ്ങളാണു ഇപ്പോൾ ഇസ്ലാമിക് ബാങ്കിങ്ങ് സ്വീകരിച്ചിട്ടുള്ളത്.എച്ച്.എസ്.ബി.സി,സ്റ്റാന്റേർഡ് ആന്റ് ചാർട്ടേറ്ഡ് ബാങ്ക് എന്നീ സ്വകാര്യബാങ്കുകൾ ഇസ്ലാമിക ബാങ്കിങ്ങ്സർവീസിനായി പ്രത്യേക വിഭാഗങ്ങൾ തുറന്നിട്ടുണ്ടു.

ലോകത്തെ പിടിച്ചുലച്ച സാമ്പത്തിക മാന്ദ്യം ഒട്ടും ബാധിക്കാത്തത് ഇസ്ലാമിക് ബാങ്കുകളെയായിരുന്നു എന്ന പ്രത്യേകതയുമുണ്ടു.-ഇങ്ങനെ നല്ല ട്രാക്ക് റെക്കാർഡുള്ള അൽ ബറാക്ക് എന്ന ഇസ്ലാമിക ധനകാര്യ സംരംഭത്തെ പാതി വഴിയിൽ ഉപേക്ഷിക്കാൻ പുതിയ ധനകാര്യമന്ത്രിയെ പ്രേരിപ്പിച്ചത് എന്താണെന്ന് വ്യക്തമല്ല.ഏറ്റവും അനുകൂലമായ രാഷ്ട്രീയ സാഹചര്യം നിലവിലുണ്ടായിട്ടും,ശൈശവാവസ്ഥയിൽ തന്നെ ഈ സംരംഭത്തെ ഇല്ലാതാക്കുന്നതിന്റെ പൊരുൾ പിടികിട്ടുന്നതേയില്ല.

യാതൊരു പഠനവും നടത്താതെ,ആസൂത്രിതമായ ഒരു പ്രവർത്തനപദ്ധതിയുമില്ലാതെ ട്രഷറിയിലൂടെ പലിശരഹിത നിക്ഷേപം സ്വീകരിക്കുമെന്ന പ്രഖ്യാപനം സസുദ്ദേശ്യത്തോടെയല്ല.സർക്കാരിന്റെ ആത്മാർത്ഥതയില്ലായ്മ അറിയുന്ന ഒരു വിശ്വാസിയും ചുവപ്പുനാടയിൽ കുടുങ്ങികിടക്കുന്ന ഇല്ലാപദ്ധതികൾക്ക് ഉപകരിക്കട്ടെയെന്ന് വിച്ചാരിച്ച് ട്രഷറിയിൽ പണം നിക്ഷേപിക്കുമെന്ന് തോന്നുന്നില്ല.ഇതൊട്ടു നടക്കുകയുമില്ല;ഇസ്ലാമിക ധനകാര്യ സംരംഭത്തിനു അകാലമൃത്യു സംഭവിക്കുകയും ചെയ്യും.

മുഹമ്മദ് ഹനീസിനെപ്പോളെ പ്രാഗൽഭ്യം തെളിയിച്ച ഒരു സീനിയർ ഉദ്യോഗസ്ഥനെ അൽ ബറാക്കിന്റെ മേധാവിയായി നിയമിച്ചത് സസുദ്ദേശ്യത്തോടു കൂടിയാണെന്നു വിശ്വസിക്കാൻ വയ്യ.എങ്കിൽ പിന്നെ മാണി പുതിയ പദ്ധതിയുമായി വരുന്നതെന്തിനു?എന്തിനാണു ഇവർ ഇസ്ലാമികധനതത്ത്വസ്ത്രത്തെ പേടിക്കുന്നത്?

അമേരിക്കയുടെ പാപം:നമ്മുടെ ശാപം

കടം വാങ്ങുന്നവർക്ക് അത് തിരിച്ചടക്കാനുള്ള ശേഷിയുണ്ടാകണം.ഇല്ലെങ്കിൽ കടം കൊടുത്തവർ കുത്തുപാളയെടുക്കും.ലോകത്തെ ഏറ്റവും വലിയ സാമ്പത്തികശക്തിയായ അമേരിക്കയുടെ വായ്പാക്ഷമത അഥവാ ക്രെഡിറ്റ് റേറ്റിങ്ങു ഇടിഞ്ഞതായി,വായ്പായോഗ്യത നിർണ്ണയിക്കുന്ന റേറ്റിങ്ങ് ഏജൻസിയായ സ്റ്റാൻഡേർഡ് ആന്റ് പൂവേഴ്സ്(എസ്.ആന്റ്.പി) പ്രഖ്യാപിച്ചതോടെ അമേരിക്കൻ സമ്പദ് വ്യവസ്ഥ ഗുരുതരമായ പ്രതിസന്ധിയിലായി.യൂറോപ്യൻ രാജ്യങ്ങളും സാമ്പത്തികപ്രതിസന്ധിയിലാണെന്ന് വ്യക്തമായതോടെ അതിന്റെ പ്രതിഫലനങ്ങൾ ലോകമെമ്പാടും ആശങ്ക പടർത്തിയിരിക്കുകയാണു.

ഏറ്റവും സാമ്പത്തികഭദ്രതയുള്ള രാജ്യം എന്ന നിലയിൽ ഇന്ത്യയടക്കമുള്ള ലോകരാഷ്ട്രങ്ങൾ അമേരിക്കൻ കടപ്പത്രങ്ങളിൽ കരുതൽ ശേഖരമായി നിക്ഷേപിച്ചിരിക്കുന്നത് നാലരലക്ഷം കോടി ഡോളറാണു.ഒന്നരലക്ഷം കോടി ഡോളറാണു ചൈനയുടെ നിക്ഷേപം.പിന്നാലെ ജപ്പാനുണ്ടു;912 ബില്യൻ ഡോളറാണുഅവരുടെ നിക്ഷേപം..4100 കോടി ഡോളറാണു ഇന്ത്യ കടപ്പത്രങ്ങളിൽ ഇട്ടിട്ടുള്ളത്.ഇങ്ങനെ വന്തോതിൽ അമേരിക്ക വാങ്ങിക്കൂട്ടിയ വായ്പപ്പണം കൊണ്ട് അവർ ചെയ്തുകൂട്ടുന്ന ദുഷ്കൃത്യങ്ങളുടെ പരിണിതഫലമാണു ഈ സാമ്പത്തികപ്രതിസന്ധി.
ലോകത്തെ ഏറ്റവുംവലിയകടക്കാരൻ ലോകത്തെ നയിക്കുകയും,ലോകപൊലീസ് ചമയുകയും ചെയ്യുന്ന അതിവിചിത്രമായ കാഴ്ച്ചയാണിവിടെ കാണുന്നത്.അതിന്നടിസ്ഥാനം അന്താരാഷ്ട്ര കറൻസി എന്ന നിലയിൽ ഡോളറിന്റെ സ്വീകാര്യതയാണു.അതിനു ബദലായി യൂറോ പോലുള്ള കറൻസികളെ ഉയർത്തിക്കൊണ്ടു വരാൻ കഴിഞ്ഞാൽ ഡോളർ നിലമ്പൊത്തും;ഒരു ചീട്ടുകൊട്ടാരം പോലെ അമേരിക്ക തകർന്നടിയും എന്നു വിലയിരുത്തുന്ന സാമ്പത്തിക വിദഗ്ദരുണ്ടു.അങ്ങനെ സംഭവിക്കുന്ന പക്ഷം,ഇന്ത്യയുടേയും ചൈനയുടേയും മുന്നിൽ ലോകം നമിക്കുമെന്നുവരെ കിനാവു കാണുന്നവരും കുറവല്ല.അതെന്തായാലും 2002ൽ ഇന്ത്യാസന്ദർശനത്തിനു തൊട്ടുമുൻപ് ബിൽ ക്ലിന്റൻ ഇതേപോലെയൊരു പ്രവചനം നടത്തിയിരുന്നത് ഇപ്പോൾ ഓർക്കേണ്ടതുണ്ടു:2020ൽ ഇന്ത്യയും ഒരു പക്ഷേ,അമേരിക്കയെക്കാളും വലിയ വൻസാമ്പത്തിക ശക്തികളാകും.

സ്വന്തം രാജ്യത്തിന്റെ സാമ്പത്തികഅസ്തിവാരം തോണ്ടുന്നതിൽ ജോർജ്ജ് ബുഷും ഒബാമയുമടക്കമുള്ള അമേരിക്കൻ ഭരണാധികാരികൾ അവരുടേതായ പങ്കു വഹിക്കുന്നുണ്ടു.അത് ആധിപത്യത്തിന്റേയും ഹിംസയുടേയും ചൂഷണത്തിന്റേയും രാഷ്ട്രീയവും അതിന്റെ നയസമീപനങ്ങളുമാണു.ഇതുമൂലമാണു മൊത്തം ആഭ്യന്തര ഉത്പാദനത്തിന്റെ 74 ശതമാനവും കടബാദ്ധ്യതയായിത്തീർന്നത്.ഇത് അടുത്ത ഒരു ദശാബ്ദം കൊണ്ടു 85 ശതമാനത്തിനും മുകളിലാകും.കഴിഞ്ഞ വർഷംമാത്രംപലിശ തിരിച്ചടക്കാൻ 414 ബില്യൻ ഡോളറാണു അവർ ചെലവാക്കിയത്.എന്നിട്ടും മറ്റു രാജ്യങ്ങളെ ചൊൽ‌പ്പടിയിൽ നിർത്താൻ വേണ്ടി പണം വാരിയെറിയുകയാണു അവർ.46 രാജ്യങ്ങളിലായി അമേരിക്ക രണ്ടു ലക്ഷത്തോളം പട്ടാളക്കാരെയാണു വിന്യസിച്ചിരിക്കുന്നത്. ലോകമെമ്പാടുമായി 865 സൈനികകേന്ദ്രങ്ങൾ.ഇസ്രായേലിനു അവർ പ്രതിദിനം നൽകുന്നത് 82 ലക്ഷം ഡോളറിന്റെ സഹായമാണു.ഇറാഖ്-അഫ്ഗാൻ യുദ്ധങ്ങൾക്കായി മൂന്നു ട്രില്യൻ ഡോളറാണു അവർ ചെലവഴിച്ചത്.ഇറാഖിൽനിന്നും എണ്ണ ഊറ്റിക്കൊണ്ടു വരാമെന്ന ഹിഡൻ അജണ്ടപൊളിഞ്ഞുപോയത് കാരണം അത് വലിയ നഷ്ടക്കച്ചവടവുമായി.1457000 കോടിഡോളറിന്റെ കടബാദ്ധ്യതയാണു ഇപ്പോൾഅമേരിക്കക്കുള്ളത്.

ഇങ്ങനെ കടമെടുത്ത പണമുപയോഗിച്ച് ദീപാളികുളിക്കുന്ന അമേരിക്കയുടെ സാമ്പത്തികഭദ്രത വളരെ ദുർബലമാണു.2008ൽ ഭവനവായ്പാപ്രതിസന്ധിയിൽ നിന്ന് ഉടലെടുത്ത സാമ്പത്തികമാന്ദ്യത്തിൽ നിന്ന് അവർ ഇതുവരെ കരകയറിയിട്ടില്ലെന്നോർക്കണം.ഈടില്ലാതെ വാരിക്കോരി വായ്പനൽകി ലേമാൻ ബ്രദേഴ്സ് ചീട്ടുകൊട്ടാരം പോലെ തകർന്നടിഞ്ഞപ്പോൾ തന്നെ അമേരിക്കൻ സമ്പദ് വ്യവസ്ഥ രോഗാജാതുരമാണന്നു തെളിഞ്ഞുകഴിഞ്ഞതാണു.അതിൽ നിന്ന് കരകയറാൻ വേണ്ടി പ്രഖ്യാപിച്ച സാമ്പത്തികപാക്കേജുകൾക്ക് സമാനമായവ ഇനിയൊരവസരത്തിലും ഉണ്ടാകില്ല.കമ്മിബജറ്റുകളാൽ നിലാക്കയത്തിലേക്ക് കൂപ്പുകുത്തുകയാണു അവർ.പക്ഷേ,പ്രൊ പോൾ ക്രൂഗ്മാന്റെ അഭിപ്രായം ബജറ്റ്കമ്മി നികത്താൻ കടം വാങ്ങുന്നതിൽ അസാംഗത്യമൊന്നിമില്ലന്നാണു.ഋണഭാരത്തിനു പ്രധാനകാരണം തലനരക്കുന്ന തലമുറയാണത്രേ.അവരുടെ ആരോഗ്യസംരക്ഷണത്തിനുള്ള ചെലവ് ഭരണകൂടത്തിനു താങ്ങാനാവുന്നില്ലെന്നാണു അദ്ദേഹത്തിന്റെ വാദം.അന്താരാഷ്ട്ര നിലവാരമനുസരിച്ച് അമേരിക്കയിൽ നികുതി നിരക്ക് തുലോം കുറവാണു.ഈ നിരക്ക് ഉയർത്തുകയും ആരോഗ്യ രംഗത്തെ ചെലവ് ചുരുക്കുകയും ചെയ്താൽ ബജറ്റ് കമ്മി കുറയും.അങ്ങനെ ഈ പ്രതിസന്ധി മറികടക്കാനാവുമെന്നാണു ഇക്കഴിഞ്ഞ ദിവസം അദ്ദേഹം ന്യൂയോർക്ക് ടൈംസിൽ എഴുതിയ കോളത്തിൽ വാദിക്കുന്നത്.

അമേരിക്കയെ സമീപകാലചരിത്രത്തിലെ ഏറ്റവും നാണം കെട്ട സാമ്പത്തിക അവസ്ഥയിലെത്തിച്ച റേറ്റിങ്ങ് ഏജൻസിയായ സ്റ്റാൻഡേർഡ് ആന്റ് പൂവേഴ്സിന്റെ വിശ്വാസ്യതയെ തന്നെ അദ്ദേഹം ചോദ്യം ചെയ്യുന്നുണ്ടു.ലേമാൻ ബ്രദേർർസ് തകർന്നടിഞ്ഞുകൊണ്ടിരുന്നപ്പോഴും അവർക്ക്എ റേറ്റിങ്ങ് നൽകിയവരാണു ഇവർ.2002ൽ ജപ്പാനെ വായ്പ്പാക്ഷമതാറേറ്റിങ്ങിൽ തരം താഴ്ത്തിയിട്ടും ഇന്നും അവിടേക്ക് പണം ഒഴുകുകയാണെന്നും അദ്ദേഹം എഴുതുന്നു.

പക്ഷേ ,ക്രൂഗ്മാൻ പറയുന്നതു പോലെ ലളിതമല്ല ഈ സാമ്പത്തിക സുനാമിയെന്ന് ഇതിനോടകം തെളിഞ്ഞുകഴിഞ്ഞു.സമ്പന്നരുടെ മേൽ നികുതി കൂട്ടാനോ പ്രതിരോധചെലവുകൾ വെട്ടിക്കുറക്കാനോ ഒബാമ തയ്യാറാകുമെന്ന് ആരും കരുതുന്നില്ല.ആരോഗ്യ സംരക്ഷണം പോലുള്ള സാമൂഹിക സുരക്ഷാമേഖലകളിലെ ബജറ്റ് വിഹിതം കുറക്കാൻ തീരുമാനിക്കുന്നപക്ഷം സാധാരണ അമേരിക്കക്കാരുടെ ജീവിതം ദുസ്സഹമാകും.അവരുടെ ക്രയവിക്രയ ശേഷി കുറയും.തൊഴിലവസരങ്ങൾക്ക് ഇടിവുണ്ടാകും.അതിന്റെ രാഷ്ട്രീയപ്രത്യാഘാതങ്ങളിൽ ഒബാമയുടെ ജനപ്രീതി കുത്തനെ ഇടിയുകയും മുതലാളിത്ത സാമ്പത്തികക്രമത്തിന്റെ വിശ്വാസ്യത കൂടുതൽ തകരുകയുമാണു ചെയ്യുക.

രാജ്യങ്ങളുടെ അതിർത്തികൾ ഭേദിച്ച് ഈ സുനാമിഅയർലൻഡിലും,ഗ്രീസിലും,പോർച്ചുഗലിലും ഇറ്റലിയിലും ആഞ്ഞടിക്കുന്നു.ഇന്ത്യയുടെ സ്ഥിതിയും ഒട്ടും ഭദ്രമല്ല.അമേരിക്ക മുണ്ടു മുറുക്കി ഉടുക്കാൻ തീരുമാനിക്കുന്ന പക്ഷം ഔട്ട്സോഴ്സിങ്ങ് കുറയും.ഇറക്കുമതിയിൽ ഇടിച്ചിലുണ്ടാവും.അതിന്റെ ദുഷ്ഫലം ഇന്ത്യൻ ഐ.ടി വ്യവസായം മുതൽ സമുദ്രോൽ‌പ്പന്ന മേഖലയെ വരെ കടുത്ത പ്രതിസന്ധിയിലാക്കും.ഐ.ടി പാർക്കുകൾ വൻസമ്മർദ്ദത്തിലാകും.ഇപ്പോൽ തന്നെഓഹരിവിപണിയിൽ ലക്ഷക്കണക്കിനു കോടിരൂപയുടെ നഷ്ടം സംഭവിച്ചിട്ടുണ്ടു. അത് ഇനിയും തുടരും.

രാഷ്ട്രീയപ്രതിസന്ധികളിൽ ആടി ഉലയുന്ന ഇന്ത്യക്ക് ഈ സുനാമിയെ അതിജീവിക്കാനാകുമോ?ഇപ്പോൾ ഒരു രാജ്യത്തിനും ഒറ്റയ്ക്കൊന്നും ചെയ്യാൻ കഴിയുകയില്ല.ആഗോള ഗ്രാമം ഇങ്ങനെയുള്ള ദശാസന്ധികളാണു ലോകജനതയ്ക്ക് സമ്മാനിക്കുക.തലപ്പത്തിരിക്കുന്നവരുടെ പാപത്തിനു പ്രായശ്ചിത്തം ചെയ്യേണ്ട ഗതികേടിലാണു നമ്മളെല്ലാം.

അവരിൽ നിന്ന് പഠിക്കാനുള്ള വിലപെട്ട പാഠങ്ങൾ

.2008ൽ ഷബാന ആസ്മി വേദനയോടെ ഇങ്ങനെ പ്രസ്താവിച്ചിരുന്നു:ഒരു മുസ്ലീം ആയതുകൊണ്ട് എനിക്ക് മുംബൈ നഗരത്തിൽ ഒരു ഫ്ലാറ്റ് വാങ്ങാൻ കഴിയുന്നില്ല.സൈഫ് അലി ഖാനും ജാവേദ് അക്തറിനും കൂടി ഇത്തരം ഒരു അനുഭവമുള്ളപ്പോൾ മതേതരത്വത്തെക്കുറിച്ച് കൂടുതൽ സംസാരിച്ചിട്ട് എന്തു കാര്യം?

ഇപ്പോഴും അവർക്ക് ഇതേ അഭിപ്രായമാണോ ഉള്ളതെന്ന് അറിയില്ല.ലോകത്തെ ഏറ്റവും വലിയ ജനാധിപത്യ രാഷ്ട്രത്തിന്റെ ജനസംഖ്യയിൽ അഞ്ചിലൊന്നു മുസ്ലീംങ്ങളാണു.ദളിതരും അധസ്ഥിതരുമടങ്ങിയ,സാമൂഹികമായും വിദ്യാഭ്യാസപരമായും പിന്നാക്കം നിൽക്കുന്ന ജന വിഭാഗങ്ങൾക്കാണു ഭൂരിപക്ഷം.ശതാബ്ദങ്ങളായി മുഖ്യധാരയിൽ നിന്ന് മാറ്റിനിർത്തപ്പെടുകയും ക്രൂരമായി അടിച്ചമർത്തപ്പെടുകയും ചെയ്ത ഈ ജനവിഭാഗങ്ങൾ കഴിഞ്ഞ രണ്ടു ദശാബ്ത്തിനുള്ളിൽ വൻ മുന്നേറ്റം നടത്തിയിട്ടുണ്ടു.മണ്ഡൽ കമ്മീഷൻ റിപോർട്ട് നടപ്പിലാക്കാൻ വി.പി.സിങ്ങ് സർക്കാർ കൈക്കൊണ്ട ചരിത്രപ്രസിദ്ധമായ തീരുമാനമാണു നമ്മുടെ രാഷ്ട്രീയഭൂമിക തന്നെ മാറ്റിമറിച്ചത്.മുഖ്യമന്ത്രി പദം മുതൽ രാഷ്ട്രപതിക്കസേര വരെയും,കേന്ദ്ര സർക്കാരിലെ ഗ്രൂപ്പ് ബി തസ്തികകൾ മുതൽ സിവിൾ സർവീസിലെ തിളങ്ങുന്ന സ്ഥാനങ്ങൾ വരെയും ആയിരക്കണക്കിനു അധികാരപദവികളിൽ പതിതരായ ജനവിഭാഗങ്ങളിൽ നിന്നുള്ളവർ ഉപവിഷ്ഠരായി.പ്രാദേശിക ഭരണകൂടങ്ങളിലും,അസംബ്ലികളിലും,പാർലമെന്റിലും മുസ്ലീംങ്ങളടക്കമുള്ളവരുടെ പ്രാതിനിദ്ധ്യം വർദ്ധിച്ചു.എന്നിട്ടും ജനസംഖ്യാനുപാതികമായി നോക്കുമ്പോൾ ഇപ്പോഴും ഇത് വളരെ കുറവാണു.

2009 -2010 ൽ സിവിൾ സർവീസിലേക്ക് തെരഞ്ഞെടുക്കപ്പെട്ട 875 പേരിൽ മുസ്ലീങ്ങൾ 21 പേർ മാത്രമായിരുന്നു.മുൻ വർഷം 791 വിജയികളിൽ 31 പേർ ഈ വിഭാഗത്തിൽ നിന്നുമുണ്ടായിരുന്നുവെന്നാണു ഒരു കണക്ക് സൂചിപ്പിക്കുന്നത്.പൊതുവിൽ സിവിൾ സർവീസിലെ മുസ്ലീം പ്രാതിനിദ്ധ്യം വെറും രണ്ടു ശതമാനം മാത്രമാണു.ജനസംഖ്യയുമായി താരതമ്യം ചെയ്യുമ്പോൾ പതിനെട്ട് ശതമാനം കുറവുണ്ടു.

വിദ്യാഭ്യാസ നിലവാരത്തിൽ കേരളത്തിലെ മുസ്ലീങ്ങൾ അടുത്തിടെ മറ്റു ജനവിഭാഗങ്ങളെ പോലും പിന്നിലാക്കിയിട്ടുണ്ടെങ്കിലും ആ മുന്നേറ്റങ്ങളൊന്നും സിവിൾ സർവീസ് പരീക്ഷയിൽ പ്രതിഫലിക്കുന്നില്ല.27ശതമാനം സംവരണം ഏർപ്പെടുത്തപ്പെട്ട ശേഷം ഉന്നത പരീക്ഷകളിൽ കൂടുതൽ പിന്നാക്കക്കാർ വിജയിച്ചിട്ടുണ്ടെങ്കിലും ഇത് കേരളത്തിന്റെ സാമൂഹിക സാഹചര്യങ്ങൾക്കനുസരിച്ചുള്ള വിജയമേയല്ല.അത് എന്തുകൊണ്ടു സംഭവിക്കുന്നു എന്ന് ബന്ധപ്പെട്ട എല്ലാവരും ചർച്ചചെയ്യണം.എഞ്ചിനിയറിങ്ങ്,മെഡിക്കൽ എൻ ട്രൻൻസ് പരീക്ഷകളിൽ അടുത്തിടെ ശ്രദ്ധേയമായ വിജയങ്ങൾ കൈവരിച്ചുവെങ്കിലും അതൊക്കെയും ജനസംഖ്യാനുപാതികമായി നോക്കുമ്പോൾ വലിയ മുന്നേറ്റങ്ങളല്ല.ഉയർന്ന വിജയംനേടിയവർക്കിടയിലെ സ്ത്രീപാതിനിദ്ധ്യവും സജീവശ്രദ്ധ ആകർഷിക്കുന്നു.

മുസ്ലിം ഭൂരിപക്ഷപ്രദേശങ്ങളിൽ ശൈശവവിവാഹം വർദ്ധിച്ചുവരുന്നതായി അടുത്തിടെ പുറത്തുവന്ന റിപ്പോർട്ടുകൾ പ്രസക്തമാകുന്നത് ഈ സന്ദർഭത്തിലാണു.ശൈശവവിവാഹം ഒരു വിഭാഗം പെൺകുട്ടികളുടെ വിദ്യാഭ്യാസം അകാലത്തിൽ അവസാനിപ്പിക്കുന്നു.നന്നേ ചെറുപ്രായത്തിൽ വിവാഹിതരും അമ്മമാരുമാകുകയും കുടുംബപ്രാരാബ്ദങ്ങളിൽ ശിഷ്ടകാലം തളച്ചിടപ്പെടുകയും ചെയ്യുന്നവരുടെ ഭാവി ഇരുളടഞ്ഞതാണു.പക്ഷേ,ഒരു വിഭാഗം യാഥാസ്ഥിതികർ അത് അംഗീകരിക്കുകയില്ല.മതപരമായ കെട്ടുപാടുകളിൽ സ്ത്രീകളെ തളച്ചിടുകയും,പള്ളികളിൽ പോലും പ്രവേശനം നിഷേധിക്കുകയും, അവരുടെ സാമൂഹികബന്ധങ്ങൾക്ക് കടുത്തനിയന്ത്രണങ്ങൾ ഏർപ്പെടുത്തുകയും ചെയ്യുന്ന പുരോഹിതവർഗ്ഗം ഏല്ലായിടത്തുമുണ്ടു.ഹിന്ദുമതത്തിലും ചില ക്രിസ്ത്യൻ മതവിഭാഗങ്ങളിലും ഇതിനെതിരായ അതി ശക്തമായ സാമൂഹിക നവോത്ഥാന മുന്നേറ്റങ്ങളുണ്ടായി.അത് ഇപ്പോഴും തുടർന്ന്കൊണ്ടിരിക്കുന്നു.അതിന്റെ സദ്ഫലങ്ങൾ ആ സമൂഹത്തിലുള്ളവർ അനുഭവിക്കുന്നുണ്ടു.

സ്ത്രീ വിദ്യാഭ്യാസം,അവരുടെ തൊഴിൽ പ്രാതിനിദ്ധ്യം,സാമ്പത്തിക സ്വാശ്രയത്വം,രാഷ്ട്രീയാധികാരം തുടങ്ങിയ മുന്നേറ്റങ്ങളുടെ സൂചികകൾ എടുക്കുക.ഈ പ്രധാനരംഗങ്ങളിലെല്ലാം മുസ്ലീം സ്ത്രീകൾ എങ്ങനെ പിന്നാക്കം പോകുന്നു എന്ന് കണ്ടെത്തേണ്ടത് പൌരോഹിത്യമാണു.മതസംഘടനകൾക്ക് വൻ സ്വാധ്വീനമുള്ള പാക്കിസ്ഥാനിലും ബംഗ്ലാദേശിലും മുഖ്യധാരാരാഷ്ട്രീയ പ്രസ്ഥാനങ്ങളെ മുസ്ലീം വനിതകൾ നയിക്കുന്നത് എന്തുകൊണ്ടാണെന്നു വിശദീകരിക്കാൻ അവർ ബാദ്ധ്യസ്ഥരാണു.വിദ്യാഭ്യാസപരമായും സാമൂഹികമായും അവരെക്കാളൊക്കെ പുരോഗതി നേടിയ നമുക്കിടയിൽ നിന്ന് എന്തേ ഈടുറ്റ മുസ്ലീം ഭരണാധികാരികളുണ്ടാകുന്നില്ല?എന്തേ,കേരളത്തിൽ നിന്ന് മുസ്ലീം രാഷ്ട്രീയസംഘടനകൾ അസംബ്ലിയിലേക്കോ പാർലമെന്റിലേക്കോ,എന്തിനു ,മത സംഘടനകളുടെ ഉന്നത നയരൂപീകരണസമിതികളിലേക്കോ സ്ത്രീകളെ അവരോധിക്കുന്നില്ല?

ഈ കഴിഞ്ഞ നിയമസഭാ തെരഞ്ഞെടുപ്പിൽ ഇതാദ്യമായി കേരള നിയമസഭയിൽ മുസ്ലീങ്ങൾക്ക് 36 സീറ്റുകളോടെ 25.71 ശതമാനം പ്രാതിനിദ്ധ്യം ലഭിച്ചു.ജനസംഖ്യാനുപാതികമായി അങ്ങനെ ചരിത്രത്തിൽ ഇദം പ്രഥമമായി അവർക്ക് ജനസംഖ്യാനുപാതികമായ സ്ഥാനങ്ങൾ കിട്ടി.പക്ഷേ,ഇതിൽ മുസ്ലീം രാഷ്ട്രീയത്തിൽ നിന്ന് ഒരൊറ്റ സ്ത്രീ പോലുമില്ല.ഇതു വരെ ഉണ്ടായിട്ടില്ല.ആസന്ന ഭാവിയിൽ അത് ഉണ്ടാകുമെന്നു തോന്നുന്നുമില്ല.ബംഗാളിലും ഈ തെരഞ്ഞെടുപ്പിൽ മുസ്ലീംങ്ങളുടെ വർദ്ധിതമായ പ്രാതിനിദ്ധ്യമുണ്ടായി-294ൽ 59സീറ്റ്.അസമിൽ മൈനോരിറ്റി ഫ്രണ്ട് 18 സീറ്റുകൾ നേടി നടത്തിയ മുന്നേറ്റവും ശ്രദ്ധേയമാണു.അവിടൊക്കെ സ്ത്രീകൾക്ക് പ്രാതിനിദ്ധ്യംകൊടുത്തത്,ഇടതുപക്ഷ,ജനാധിപത്യ കഷികളായിരുന്നു:മുസ്ലീം കക്ഷികളായിരുന്നില്ല.

വിദ്യകൊണ്ടു ശക്തരാകാനും സംഘടന കൊണ്ടുപ്രബുദ്ധരാകാനും തന്റെ ജനങ്ങളോട് പറഞ്ഞത് ശ്രീനാരായണ ഗുരുവായിരുന്നു.അതിനു അദ്ദേഹത്തിനു പ്രചോദനമായത് മതപ്രചാരണത്തിനായി കേരളത്തിലെത്തിയ ക്രിസ്ത്യൻ മിഷനറിമാരാകണം.അവർ ഇവിടെ എല്ലാവിഭാഗം ജനങ്ങൾക്കുമായി വിദ്യാലയങ്ങൾ ആരംഭിച്ചു.അച്ചടിശാലകളും പത്രമാസികക്കളും കച്ചവടസ്ഥാപനങ്ങളും വ്യവസായങ്ങളും തുടങ്ങി.അങ്ങനെ വിദ്യാഭ്യാസപരമായും സാമ്പത്തികമായും അഭിവൃദ്ധി പ്രാപിച്ച അവർ മതസംഘടനകളിലൂടെ ശക്തരാകുകയും രാഷ്ട്രീയാധികാരത്തിലൂടെ സംസ്ഥാനത്തെ പ്രബലവിഭാഗമാകുകയും ചെയ്തു.ജനാധിപത്യമൂല്യങ്ങളെ സ്വാംശീകരിച്ചും,മറ്റ് എല്ലാ വിഭാഗങ്ങളുമായി നിരന്തരം സംവാദങ്ങൾ നടത്തിയും ഏറ്റുമുട്ടിയും,വിനിമയങ്ങൾ നടത്തിയും അവർ നേടിയ പുരോഗതി അതിശയിപ്പിക്കുന്നതാണു.അതിന്റെ അടിസ്ഥാനം വിദ്യാഭ്യാസമാണു;അത് മാത്രമാണു.കേരളീയ സമൂഹത്തിന്റെ സമസ്തമേഖലകളേയും നിയന്ത്രിക്കുന്ന നിർണ്ണായകരാഷ്ട്രീയശക്തിയായി ഈ മതവിഭാഗം വളർന്നുവന്ന വഴികൾ മറ്റെല്ലാവർക്കും പാഠ്യവിഷയമാകേണ്ടതാണു.

വിദ്യ കൊണ്ടു പ്രബുദ്ധരാകുന്നവർക്കു മുന്നിൽ മാത്രമേ ,ഇനി രാഷ്ട്രീയാധികാരവും പദവികളും തുറന്നുകിട്ടുകയുള്ളൂ.ജനാധിപത്യത്തിൽ പരമമായ സത്യം ഈ അധികാരപദവികളാണു.അത്കൈവശമുള്ള ഒരുജനവിഭാഗത്തിനും,ശബ്നാ ആസ്മിയെപ്പോലെ പരിതപിക്കേണ്ടി വരില്ല.എം.എഫ് ഹുസൈനെപ്പോലെ മാതൃരാജ്യത്ത് നിന്ന് ഓടിപ്പോക്കേണ്ടി വരില്ല.

മുന്നണി രാഷ്ട്രീയത്തിന്റെ ഭാഗമായി കുറച്ചുകാലത്തേക്കെങ്കിലും നിശ്ച്ചിത ഇടവേളകളിൽ അധികാരസ്ഥാനങ്ങളിലെത്തുന്ന പിന്നാക്കജനവിഭാഗങ്ങളിൽ നിന്നുള്ളവർ വിലപ്പെട്ട ഈ ചരിത്രപാഠങ്ങൾ പഠിക്കട്ടെ.രാഷ്ട്രീയത്തേയും പൌരോഹിത്യത്തേയും ആഡംബരജീവിതത്തിനും സുഖലോലുപതയ്ക്കും സ്വന്തം അഭിവൃദ്ധിക്കുമുള്ള ഉപാധിയാമാക്കിമാറ്റുന്ന ഭോഗതൃഷ്ണകളുള്ളവരെ വലിച്ചെറിയാതെ ഈ ലക്ഷ്യം നേടുക എളുപ്പമല്ല.ഉന്നത മൂല്യബോധമുള്ള,നിസ്വാർത്ഥരായ ത്യാഗികൾക്കുള്ളതാണു പൊതുജീവിതത്തിലെ പദവികൾ.

ഈ ദുരന്തങ്ങൾ ആവർത്തിക്കാതിരിക്കാൻ.....

കഴിഞ്ഞദിവസം ഇടുക്കിയിലെ നെടുങ്കണ്ടത്ത് നിന്നും വന്ന വാർത്ത ആരെയും ഞെട്ടിപ്പിക്കുന്നതാണു.
നാലര വയസ് പ്രായമുള്ള യു.കെ.ജി വിദ്യാർത്ഥിനിയെ ലൈംഗികമായി പീഡിപ്പിക്കാൻ ശ്രമിക്കുന്നതിനിടയിൽ കുളത്തിലേക്ക് തള്ളിയിട്ട് കൊലപ്പെടുത്തിയതിനു അറസ്റ്റിലായത് പത്തുവയസുകാരൻ.പിഞ്ചുകുഞ്ഞിനെ കൊന്നു പൊത്തിലൊളിപ്പിച്ച കേസിൽ അടുത്തിടെ ഇതേ ജില്ലയിൽ നിന്നു പിടിയിലായത് പതിമൂന്നുകാരൻ!

അങ്ങനെ മനസാക്ഷിയെ മരവിപ്പിക്കുന്ന ഈ വാർത്തകളിലൂടെ ലൈംഗികാതിക്രമികളായ കുട്ടികുറ്റവാളികൾ എന്ന പുതിയൊരു വിഭാഗം ക്രിമിനലുകൾ കൂടി നമ്മുടെ നാട്ടിലുണ്ടായിരിക്കുന്നു.ഇത് ഒരു സുപ്രഭാതത്തിൽ സംഭവിച്ചതല്ല. ധാർമ്മിക സദാചാരമൂല്യങ്ങൾ നമ്മുടെ സമൂഹത്തിൽ നിന്ന് എന്ന് അപ്രക്ഷമാകാൻ തുടങ്ങിയോ,അന്നു മുതൽക്കേ ഈ അപചയത്തിന്റെ വിഷവിത്തുക്കൾ ഇവിടെ പാകിക്കഴിഞ്ഞിരുന്നു.അവയ്ക്ക് തഴച്ചുവളരാനുള്ള ഫലഭൂയിഷ്ടമായ മണ്ണാണു നമ്മുടേത്.
പുറമേ ഭദ്രമെന്നു തോന്നുമെങ്കിലും കെട്ടുപൊട്ടിയപട്ടം പോലെയാണു ഇവിടെ കുടുബ -മനുഷ്യബന്ധങ്ങൾ.അവയ്ക്ക് പണ്ടുള്ള ദൃഡതയോ,ഊഷ്മളതയോ ഇല്ല.അതിനു ഭൌതികവും ആത്മീയവുമായ ഒട്ടേറെ കാരണങ്ങളുണ്ടു.അണുകുടുംബങ്ങളുടെ വ്യാപനം അതിൽ പ്രധാനപ്പെട്ട ഒരു കാരണമാണു.കടമകളും കടപ്പാടുകളും ഉത്തരവാദിത്വങ്ങളുമുള്ള മാന്ത്രികച്ചരടിനാൽ സുദൃഡമായി ഇഴചേർക്കപ്പെട്ട പഴയ കൂട്ടുകുടുംബവ്യവസ്ഥയുടെ ശിഥിലീകരണം ഏതാണ്ടു പാശ്ചാത്യ മാതൃകയിലുള്ള ജീവിതശൈലിക്കും ബന്ധങ്ങൾക്കും വഴിമാറി.പുതിയ കർമ്മമണ്ഡലങ്ങളും സ്വാതന്ത്ര്യവും സ്വതന്ത്രജീവിത സാഹചര്യങ്ങളും ഭൌതികസുഖങ്ങളിൽ മാത്രം അധിഷ്ഠിതമായ ജീവിതശൈലി രൂപപ്പെടുത്തി.ബന്ധങ്ങളുടെ പരിപാവനതയ്ക്കും ധാർമ്മികാടിത്തറയ്ക്കും അത് കടുത്ത ആഘാതമാണു ഏൽ‌പ്പിച്ചത്.

വിദ്യാഭ്യാസം ഇതിൽ വഹിക്കുന്ന പ്രതിലോമകരമായ പങ്കു കൂടി ചർച്ചചെയ്യപ്പെടേണ്ടതുണ്ടു.സനാതനമായ ജീവിതമൂല്യങ്ങൾ പുതുതലമുറയ്ക്ക് പകർന്നു നൽകുന്ന മഹദ്കർമ്മം കൂടി നമ്മുടെ വിദ്യാഭ്യാസക്രമത്തിന്റെ ലക്ഷ്യമായിരുന്നു.എന്നാൽ ഇന്ന് അവ മാനവികവിഷയങ്ങൾ പഠിക്കുന്നവരുടെ മാത്രം പാഠങ്ങളാണു.മത്സരാധിഷ്ഠിതമായ ലോകത്തിൽ മറ്റുള്ളവരെ ഏതുവിധേനയും പിന്നിലാക്കി വിജയിക്കുകയും കൂടുതൽ പണം നേടുകയും മാത്രമാണു തങ്ങളുടെആത്യന്തിക ലക്ഷ്യം എന്നാണു ഓരോ വിദ്യാർത്ഥിയേയും പഠിപ്പിച്ചിരിക്കുന്ന പാഠം.അതുകൊണ്ടു തന്നെയാണു അവർ തങ്ങളിൽ തന്നെ എപ്പോഴും നങ്കൂരമിട്ടുകൊണ്ടിരിക്കുന്നത്.സഹജീവികളുടേയോ നാട്ടുകാരുടേയോ കാര്യങ്ങളിൽ അതുകൊണ്ടുതന്നെ അവർക്കൊരിക്കലും താല്പര്യമുണ്ടാകില്ല.പൊതുപ്രശ്നങ്ങളിൽ ഇടപെടാനോ അഭിപ്രായപ്രകടനം നടത്താൻ പോലുമോ അവർ വിമുഖരാണു.കടുത്ത അരാഷ്ട്രീയവതകരണമാണു ഇതുമൂലം ഉണ്ടായിക്കൊണ്ടിരിക്കുന്നത്.

രാഷ്ട്രീയ- ധാർമികാവബോധമില്ലാത്തവർക്ക് കാലിടറുവാനും വഴിതെറ്റുവാനും പറ്റിയ സാമൂഹികാന്തരീക്ഷമാണു കേരളത്തിലുള്ളത്.എവിടെയും അപഥസഞ്ചാരപഥങ്ങൾ.കുടുംബസദസുകളിൽ പോലും മദ്യം മണക്കും.കമ്പ്യൂട്ടറും മൊബൈലും ലൈംഗികാരാജകത്വത്തിന്റെ വാതിലുകൾ മലർക്കെ തുറന്നിടും.നെടുംകണ്ടത്തെ കുട്ടിയെ കൊലപാതകിയാക്കിയത് അച്ഛൻ നയിച്ച കുത്തഴിഞ്ഞ ജീവിതമാണത്രേ.മദ്യവും നീലച്ചിത്രങ്ങളും അടിതെറ്റിച്ച അയാളെ കണ്ടുവളർന്ന കുട്ടി എത്തിച്ചേർന്നത് കൊടും പാതകത്തിന്റെ ഇരുൾവഴിയിൽ.സ്വന്തം അച്ഛനാൽ പീഡിപ്പിക്കപ്പെടുകയും ലൈംഗികവിപണിയിൽ എത്തപ്പെടുകയും ചെയ്ത പറവൂരിലെ പെൺകുട്ടിക്കു പിന്നാലെ അതേ ദുരന്തകഥകൾ എത്രയോ തവണ മാദ്ധ്യമങ്ങളിൽ ആവർത്തിക്കപ്പെട്ടു.അപഥസഞ്ചാരികളായ മാതാപിതാക്കൾ.സിനിമയുടേയും സീരിയലുകളുടേയും വിഭ്രമാത്മകമായ ലോകം കാട്ടി മാംസവ്യാപാരരംഗത്തേക്ക് ആട്ടിത്തെളിക്കപ്പെട്ട് കൊണ്ടുവരുന്നവർ.കൊച്ചുമക്കളുടെ പ്രായം പോലുമില്ലാത്തവരെ ക്രൂരമായ ലൈംഗികാതിക്രമങ്ങൾക്കിരയാക്കുന്നവർ.എന്തിനധികം, സ്വദേശികളും വിദേശികളുമായ വിനോദസഞ്ചാരികളും സമ്പന്നരുമായ സ്ത്രീകൾക്കുവേണ്ടി വേശ്യാവൃത്തിക്കിറങ്ങുന്ന ആൺകുട്ടികൾ വരെ നീളുന്നു,ഈ പരമ്പര.കുട്ടികളെ ലൈംഗികമായി പീഡിപ്പിക്കുന്നതിൽ കേരളത്തിനു മൂന്നാം സ്ഥാനമാണുള്ളത്.കുടുംബങ്ങൾക്കകത്ത് തന്നെ ഇത്തരം പീഡനങ്ങൾ വർദ്ധിക്കുന്നു.ഒരിടവും പെൺകുട്ടികൾക്ക് സുരക്ഷിതമല്ല.ഇനി ശൈശവക്കാരായ സഹപാഠികളെ കൂടി പേടിക്കണം എന്നാണു നെടുങ്കണ്ടത്തെ അനുഭവം പഠിപ്പിക്കുന്നത്.

എവിടെയും ലൈംഗികവൈകൃതങ്ങളടങ്ങിയ വീഡിയോ ചിത്രങ്ങൾ സുലഭമാണിന്നു. മൊബൈലുകളിലൂടെ സഹപാഠികളുടേയും സ്വന്തം അദ്ധ്യാപികമാരുടെ പോലും അശ്ലീലചിത്രങ്ങൾ പ്രചരിപ്പിക്കുന്ന വിദ്യാർഥികളുടെ യുഗമാണിത്.അതിനു സമൂഹവും പ്രതിപ്പട്ടികയിൽ നിൽക്കണം.ഇന്നും ലൈംഗികകാര്യങ്ങൾ തുറന്നു ചർകചെയ്യപ്പെടുന്ന സമൂഹമല്ല നമ്മുടേത്.സ്കൂൾ പാഠ്യപദ്ധതിയിൽ ലൈംഗികവിദ്യാഭ്യാസം ഉൾപ്പെടുത്താനുണ്ടായ നീക്കത്തെ തോൽ‌പ്പിച്ചവരാണു നമ്മുടെ ചില മതസംഘടനകൾ.അടയ്ക്കപ്പെട്ട ഒരു സമൂഹത്തിൽ ഇത്തരംപൊട്ടിത്തെറികൾ ഉണ്ടാകുക സ്വാഭാവികം.മത-ധാർമ്മിക പ്രബോധനങ്ങളിലൂടെ അവരെ നേർവഴിക്ക് നയിക്കാൻ ആർക്കും കഴിയുന്നില്ല.കമ്പ്യൂട്ടറുകളിലും മൊബൈൽ ഫോണുകളിലുമൂടെ ലൈംഗികകുറ്റകൃത്യങ്ങൾക്ക് പ്രേരണനൽകുന്ന വൈകൃതങ്ങൾ എവിടെയും ഒഴുകുമ്പോൾ ഇതിനെക്കാൽ ഭീകരമായ സംഭവങ്ങൾക്ക് നാം വരും നാളുകളിൽ സാക്ഷ്യം വഹിക്കും.


ഇതിനു പരിഹാരം കണ്ടെത്താൻ മദ്യത്തിനും നീലച്ചിത്രവ്യാപനത്തിനുമെതിരെ അതിശക്തമായ നിയമനിർമ്മാണവും നടപടികളും ഉടൻ ഉണ്ടാകേണ്ടിയിരിക്കുന്നു.ഒപ്പം ലൈംഗികകാര്യങ്ങളെക്കുറിച്ച് സമൂഹം തുറന്ന് ചർച്ചചെയ്യുകയും വേണം.കാലത്തിനനുസൃതമായ രീതിയിൽ ധാർമ്മികമായ ചുവടുകൾ വെയ്ക്കാൻ മതസംഘടനകൾക്കും കഴിയട്ടെ.

ആ സമ്പത്ത് ജനങ്ങളുടേത്

ഇനിയും കണ്ണഞ്ചിപ്പിക്കുന്ന സ്വർണ്ണവും രത്നങ്ങളും ശ്രീപത്മനാഭസ്വാമി ക്ഷേത്രത്തിലെ കല്ലറകളിൽ നിന്ന് കണ്ടെത്തിയേക്കാം.എന്തായാലും ഈ നിധിശേഖരത്തിനു ഒരു ലക്ഷം കോടി രൂപയിലധികം വിലവരും.തിരുപ്പതിയേയും കടത്തിവെട്ടി അങ്ങനെ ശ്രീപത്മനാഭസ്വാമി ക്ഷേത്രം സമ്പത്തിൽ രാജ്യത്ത് ഒന്നാമതെത്തിയിരിക്കുന്നു.
സുപ്രീം കോടതി നിയോഗിച്ച കമ്മീഷൻ നൽകുന്ന റിപ്പോർട്ടിനെ ആധാരമാക്കി പരമോന്നത കോടതി ഈ അമൂല്യ ശേഖരം എങ്ങനെ സംരക്ഷിക്കുമെന്ന് ഉത്തരവ് പുറപ്പെടുവിക്കുമെന്ന് കരുതപ്പെടുന്നു.

ഇത് ക്ഷേത്രത്തിനു മാത്രം അവകാശപ്പെട്ടതാണെന്നും സർക്കാരിനു ഈ സമ്പത്തിൽ യാതൊരു കാര്യവുമില്ലെന്നും എല്ലാ പ്രമുഖ ഹൈന്ദവസംഘടനകളും പ്രസ്താവനയിറക്കിക്കഴിഞ്ഞു.ഇത് ക്ഷേത്രത്തിന്റെ സ്വത്താണെന്ന് മുഖ്യമന്ത്രിയും പ്രഖ്യാപിച്ച് കഴിഞ്ഞു.

ഈ സമ്പത്തിന്റെ ഒരു അംശം ഉപയോഗിച്ച് ഹിന്ദു സർവകലാശാല സ്ഥാപിക്കണമെന്ന് ഒരു വിഭാഗം ആവശ്യമുന്നയിച്ചു കഴിഞ്ഞു.പള്ളികളിലോ മറ്റോ ആയിരുന്നു ഇങ്ങനെ നിധിശേഖരം കണ്ടിരുന്നതെങ്കിൽ കണക്കെടുക്കിനെത്തിയവർ അവ തിട്ടപ്പെടുത്തി പള്ളിക്കാരെ തന്നെ ഏൽ‌പ്പിച്ച് തിരിച്ചുപോയേനെ എന്നാണു വെള്ളാപ്പള്ളി പറഞ്ഞത്.

നൂറു വർഷത്തിലേറെയുള്ളതിനാൽ ഇവ എല്ലാം പുരാവസ്തു സംരക്ഷണ നിയമപ്രകാരം സംരക്ഷിക്കപ്പെടേണ്ടതാണെന്നും വാദം ഉയർന്നിട്ടുണ്ടു.

ഇതിന്റെ ന്യാന്യായങ്ങളിലേക്ക് കടക്കും മുൻപ് പരിശോധിക്കേണ്ട വസ്തുതകളുണ്ടു.പരമഭക്തനായ ടി.പി.സുന്ദർരാജൻ നൽകിയ ഹർജിയിൽ തിരുവിതാങ്കൂർ രാജകുടുംബത്തിനു ശ്രീപത്മനാഭസ്വാമി ക്ഷേത്രഭരണത്തിൽ യാതൊരു അവകാശവുമില്ലെന്ന് കേരള ഹൈക്കോടതി സുപ്രധാനമായൊരു വിധി പുറപ്പെടുവിച്ചിട്ടുണ്ടു.അതു സംബന്ധിച്ച് മുപ് ഈ പംക്തിയിൽ എഴുതിയിട്ടുണ്ടു:

ക്ഷേത്രം ഏറ്റെടുക്കണമെന്ന ഈ ഹൈക്കോടതി വിധിക്കെതിരെ രാജകുടുംബക്കാർ സുപ്രീം കോടതിയിൽ ഹർജി നൽകിയിരിക്കുകയാണു.ഇതിനെ തുടർന്നാണു സ്വത്തുക്കളുടെ കണക്കെടുപ്പ് നടത്തണമെന്ന് സുന്ദർ രാജൻ കോടതിയോട് അഭ്യർത്ഥിച്ചത്.

തിരുവിതാംകൂർ ഭരണാധികാരികൾ ജനക്ഷേമതൽ‌പ്പരരും മര്യാദാരാമന്മാരുമായിരുന്നു.കേരളത്തിന്റെ പുരോഗതിക്ക് അടിസ്ഥാനമിട്ട ഒട്ടേറെ നടപടികൾ അവർ സ്വീകരിച്ചിട്ടുണ്ടു.അതുകൊണ്ടു തന്നെ ജനങ്ങൾക്കിപ്പോഴും ആ രാജവംശത്തോട് സ്നേഹവും കൂറുമുണ്ടു.അവർ സത്യസന്ധരും സനാതനമൂല്യങ്ങളിൽ വിശ്വസിക്കുന്നവരും ആയിരുന്നു.തൃപ്പടിദാനത്തിലൂടെ രാജ്യം തന്നെ ശ്രീപദ്മനാഭനു മുന്നിൽ അടിയറ വെച്ച് പത്മനാഭദാസന്മാരായി ഭരണം നടത്തിയവരാണു ഈ രാജാക്കന്മാർ.

1200 വർഷത്തോളം ഒരേ രാജവംശം തന്നെ ഭരണം നടത്തി.ഇക്കാലത്തിനിടയിൽ ഒരിക്കൽ പോലും വൈദേശിക ആക്രമണം നേരിട്ടിട്ടില്ല.അതുകൊണ്ടു തന്നെ സ്വത്തുക്കൾ അന്യാധീനപ്പെടുകയോ കൊള്ളയടിക്കപ്പെടുകയോ ചെയ്തിട്ടില്ല.രാജാക്കന്മാർ അതെടുത്ത് ദുർവിനിയോഗം ചെയ്തിട്ടുമില്ലെന്നാണു അനുമാനിക്കേണ്ടത്.അ

പക്ഷേ,ഇതൊന്നും രാജ കുടുംബത്തിനു ക്ഷേത്രവും സ്വത്തുക്കളും കൈവശം വെക്കാനുള്ള അവകാശം നൽകുന്നില്ല. ഹൈക്കോടതിവിധിയിൽ പറഞ്ഞതു പോലെ സ്വതന്ത്ര ഇന്ത്യയിൽ ഇപ്പോൾ രാജാക്കന്മാരും രാജവംശവുമൊന്നുമില്ല.മുൻ രാജകുടുംബാംഗങ്ങൾക്ക് പ്രത്യേക അവകാശങ്ങളുമില്ല.അതുകൊണ്ടുതന്നെ ക്ഷേത്രഭരണം അടിയന്തിരമായി സർക്കാർ ഏറ്റെടുക്കയോ എല്ലാ വിഭാഗങ്ങൾക്കും പ്രാതിനിദ്ധ്യമുള്ള ഒരു ട്രസ്റ്റിനു കീഴിലാക്കുകയോ ചെയ്യണം.കഴിഞ്ഞ സർക്കാരിലെ ദേവസ്വം മന്ത്രി ജി.സുധാകരനായിരുന്നെങ്കിലും ഇത് വിശ്വാസികളുടെ വികാരം വ്രണപ്പെടുത്തുമെന്ന് പറഞ്ഞ് പിൻ വാങ്ങുകയായിരുന്നു.

ഇപ്പോഴോ?ഈ നിധിശേഖരത്തിന്റെ ഉടമസ്ഥത ആർക്കാണെങ്കിലും അത് കാത്തുസൂക്ഷിക്കേണ്ട ചുമതല സർക്കാരിൽ തന്നെ നിക്ഷിപ്തമായിരിക്കുന്നു.അത് രാജകുടുംബത്തിന്റേയോ ക്ഷേത്രകമ്മിറ്റിയുടേയോ ചുമലിൽ കെട്ടിവെയ്ക്കാൻ പറ്റില്ല.പരശതം കോടികൾ വിലമതിക്കുന്ന ഈ വൻ നിധിശേഖരം കാത്തുസുക്ഷിക്കാനായി മാത്രം പ്രത്യേക സംവിധാനം ഉണ്ടാക്കാൻ സർക്കാർ നിർബന്ധിതമാക്കപ്പെട്ടിരിക്കുന്നു.തീപിടുത്തം മുതൽ ഭീകരാക്രമണം വരെ ഉണ്ടായേക്കാം.അതിൽ നിന്നെല്ലാം ഇനിയുള്ള കാലം ഈ അത്ഭുത നിധി സംരക്ഷിച്ചുനിർത്തുക എന്ന ഭാരിച്ച ഉത്തരവാദിത്തം സർക്കാരിനു വലിയ ബാദ്ധ്യതയാകും.ഏത് ചെറിയ സുരക്ഷാപാളിച്ചയും ഗുരുതരമായ പ്രത്യാഘാതങ്ങൾ സൃഷ്ടിക്കും.അതിന്റെ പേരിൽ മതതീവ്രവാദികൾ തെരുവിലിറങ്ങും.

ഈ സ്വത്ത് ഭാരതസർക്കാർ കണ്ടുകെട്ടണമെന്ന് ഒരു ടെലിവിഷൻ ചർച്ചയിൽ അഭിപ്രായപ്പെട്ട യുക്തിവാദി സംഘം നേതാവ് യു.കലാനാഥന്റെ വീട് ആക്രമിക്കപ്പെട്ടത് ഒരു തുടക്കം മാത്രം. ശിവസേനക്കാർ സുന്ദർ രാജനെ ആക്രമിക്കാൻ ശ്രമിച്ചതും ഈ അസഹിഷ്ണുതയുടെ ഉദാഹരണമാണു.അവർ മാദ്ധ്യമങ്ങൾക്കെതിരെയും തിരിഞ്ഞിട്ടുണ്ടു.

സത്യത്തിൽ ഈ സ്വത്തുക്കൾ ആരുടേതാണു?അവ ശ്രീപത്മനാഭനു കാണിക്കയായി അർപ്പിക്കപ്പെട്ടത് മാത്രമാണോ?

അല്ല എന്നാണു ചരിത്രരേഖകൾ വ്യക്തമായി പറയുന്നത്.തിരുവിതാംകൂറിൽ രണ്ടു തരം ഭണ്ഡാരങ്ങൾ(ട്രഷറികൾ)ഉണ്ടായിരുന്നുവെന്ന് ചരിത്രകാരന്മാർ പറയുന്നു.ജനങ്ങളിൽ നിന്നും പിരിച്ചെടുക്കുന്ന നികുതിപ്പണം സൂക്ഷിക്കുന്നതിനുള്ള ട്രഷറിയായ “കരുവാലയം”.പത്മനാഭസ്വാമിക്ഷേത്രത്തിനു ലഭിക്കുന്ന വഴിപാടുസ്വത്തുക്കൾ സൂക്ഷിക്കുന്നതിനുള്ള “മതിലകം”.യുദ്ധത്തിൽ ജയിക്കുമ്പോൾ ലഭിക്കുന്ന സ്വത്തുക്കളും പിഴയായി കിട്ടുന്നവയുമൊക്കെ ശ്രീപത്മനാഭനു രാജാക്കന്മാർ കാഴ്ച്ചവെച്ചിരുന്നതായും ചില ചരിത്രകാരന്മാർക്ക് അഭിപ്രായമുണ്ടു.തൃപടിദാനത്തിനു ശേഷം രാജകുടുംബം സർവസ്വത്തും ക്ഷേത്രത്തിനു സമർപ്പിച്ചതോടെ നിത്യച്ചെലവുകൾക്ക് പോലും ക്ഷേത്രത്തിലെ മതിലകം ഭണ്ഡാരത്തിൽ നിന്ന് എടുക്കുകയായിരുന്നുവെന്നത് നിസ്തർക്കമായ വസ്തുതയാണു.

തിരുവിതാംകൂർ രാജവംശത്തിനു മാത്രമായിരുന്നു നൂറ്റാണ്ടുകളോളം കുരുമുളകും ഏലവുമൊക്കെ കച്ചവടം ചെയ്യാനുള്ള അധികാരമുണ്ടായിരുന്നത്.ചരിത്രകാരനായ എം.ജി.ശശിഭൂഷൺ ഇതുസംബന്ധിച്ച് നടത്തിയിട്ടുള്ള വെളിപ്പെടുത്തലുകൾ സവിശേഷ ശ്രദ്ധ ആകർഷിക്കുന്നു.ശ്രീലങ്ക,ഫ്രാൻസ്,ബെൽജിയം,പോർച്ചുഗൽ തുടങ്ങിയ രാജ്യങ്ങളുമായി തിരുവിതാംകൂർ രാജവംശം നേരിട്ട് കുരുകുമുളക് കച്ചവടം നടത്തി അളവറ്റ വിദേശനാണ്യം നേടിയിരുന്നു.അന്ന് കുരുമുളകിനു പൊന്നു വിലയായിരുന്നു.സ്വർണ്ണനാണയങ്ങളായാണത്രേ ഇതിന്റെ വില കിട്ടിയത്.കഴിഞ്ഞ ദിവസങ്ങളിൽ കണ്ടെത്തിയ വിദേശസ്വർണ്ണനാണയങ്ങൾ ഈ ഗണത്തിൽ പെടുന്നവയാണെന്ന അദ്ദേഹത്തിന്റെ നിഗമനം ശരിയാകാനിടയുണ്ടു.

രാജാവിനു ലഭിക്കുന്നതും,പടയോട്ടത്തിലൂടെ പിടിച്ചെടുക്കപ്പെടുന്നതും,കച്ചവടത്തിലൂടെ ആർജ്ജിച്ചതുമായ ഈ രാജസ്വത്തുക്കൾ ശ്രീപത്മനാഭനു കാഴവെയ്ക്കപ്പെട്ടതോടെ അവ ക്ഷേത്ര അറകളിൽ എത്തിച്ചേർന്നു.ടിപ്പുവിന്റെ പടയോട്ട കാലത്ത് ആക്രമണം ഭയന്ന് കരുവാലയത്തിൽ സൂക്ഷിച്ചിരുന്ന നികുത്തിപ്പണം അടക്കമുള്ള സ്വത്തുക്കളും ക്ഷേത്രത്തിനകത്തേക്ക് മാറ്റിയതായും ചരിത്രരേഖകളുണ്ടു.

അവ നൂറ്റാണ്ടുകളായി ക്ഷേത്ര അറകളിൽ അടയ്ക്കപ്പെട്ടത് തിരുവിതാംകൂർ രാജാക്കന്മാർ അത്യാർത്തികളോ ആഡംബരപ്രിയരോ അല്ലാത്തവരായതിനാലായിരുന്നു.വിശേഷാവസരങ്ങളിൽ പൂജകൾക്കും ഉത്സവങ്ങൾക്കും ഉപയോഗിക്കുന്ന സ്വർണ്ണാഭരണങ്ങൾ ഒഴികെയുള്ളവയൊന്നും ക്ഷേത്രത്തിലെ ആചാരാനുഷ്ഠാനങ്ങളുമായി യാതൊരു വിധത്തിലും ബന്ധപ്പെട്ടിട്ടുള്ളവയല്ല.അങ്ങനെയായിരുന്നുവെങ്കിൽ അവ ഇക്കാലമത്രയും ആരാലും കാണാതെ ഇരുട്ടറകളിൽ ഇരിക്കില്ലായിരുന്നുവല്ലോ.

ഇവ ക്ഷേത്രച്ചടങ്ങുകൾക്ക് ഉപയോഗിക്കണമെങ്കിൽ അതിനായി ഇനി പുതിയ ആചാരാനുഷ്ഠാനങ്ങൾ സൃഷ്ടിക്കപ്പെടണം.

അല്ലെങ്കിൽ ഭഗവാനു എന്തിനാണു കിലോക്കണക്കിനു സ്വർണ്ണത്തിലും അമൂല്യരത്നങ്ങളിലും തീർത്ത ആഭരണങ്ങളും കിരീടങ്ങളും മറ്റും?

ക്ഷേത്രച്ചടങ്ങുകളുമായി ഏതെങ്കിലും കാലത്ത് ബന്ധമുണ്ടായിരുന്ന ഏതെങ്കിലും ആഭരണങ്ങൾ ഈ നിധി ശേഖരത്തിലുണ്ടെങ്കിൽ അവ മാത്രം ശ്രീപത്മനാഭസ്വാമി ഷേത്രത്തിനു വിട്ടു നൽകട്ടെ.ബാക്കിയെല്ലാം രാജ്യത്തിനു അവകാശപ്പെട്ടതാണു.അവ ജനങ്ങളുടെ പൊതു സ്വത്താണു.അത് സർക്കാർ ഏറ്റെടുക്കുക തന്നെ വേണം.

അന്താരാഷ്ട്ര വിപണിയിൽ അതിഭീമമായ വില കിട്ടുന്ന ഈ നിധിശേഖരത്തിന്റെ ഒരു ഭാഗം വിറ്റുകിട്ടുന്ന തുകമതി കേരളത്തിന്റെ സമഗ്രവികസനത്തിനുതകുന്ന ഒട്ടേറെ പ്രവർത്തനങ്ങൾ നടത്താൻ.

നമുക്കിനി സർവകലാശാലകളെന്തിനു?വേണ്ടത് ആതുരാലയങ്ങളും ഗവേഷണസ്ഥാപനങ്ങളുമാണു.ശ്രീപത്മനാഭസ്വാമിയുടെ നാമധേയത്തിൽ തന്നെ ആൾ ഇന്ത്യാ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിനെ വെല്ലുന്ന മെഡിക്കൽ കോളേജും ആശുപത്രികളും തുടങ്ങട്ടെ.സംസ്ഥാനത്ത് ധർമ്മാശുപത്രികളും ആരംഭിക്കട്ടെ.മാനവസേവയാണു മാധവസേവ എന്ന് വിശ്വസിക്കുന്ന യഥാർത്ഥ ഭക്തർ വൈകാരികവിക്ഷോഭം വെടിഞ്ഞ് സാവകാശം ചിന്തിക്കുക;ഈ നിധി പൊതുജന നന്മയ്ക്ക് ഉപയോഗിക്കാതെ കെട്ടിവെയ്ക്കുന്നതിൽ പരം ദൈവനിഷേധം മറ്റെന്തുണ്ടു?