ദൃഷ്ടിപഥം 29.9.2007

പൊതു ഇടങ്ങളില്‍ ദൈവങ്ങളെ കുടിയിരുത്തുന്നവരോട്

മുംബൈയിലെ പൊലീസ് സ്റ്റേഷനുകളില്‍ നിന്ന് ദൈവങ്ങളെ കുടിയിറക്കാനുള്ള നടപടി തുടങ്ങിയെന്ന പത്രവാര്‍ത്തകള്‍ കൌതുകത്തോടെയാണു വായിച്ചത്.വ്യത്യസ്ത മതക്കാരും,മതവിശ്വാസികളല്ലാത്തവരും പ്രവര്‍ത്തിക്കുന്ന,പൊതുജനങ്ങളുമായി നിരന്തരം ബന്ധപ്പെടുന്ന പൊലീസ് സ്റ്റേഷനുകളില്‍ വര്‍ഷങ്ങളായി പ്രത്യേക മതക്കാരുടെ ദൈവങ്ങളുടെ പടങ്ങളും,ചിലയിടങ്ങളില്‍ വിഗ്രഹങ്ങള്‍ പോലും വച്ച് ആരാധനയും ഉത്സവങ്ങളും നടത്തിവരുകയായിരുന്നു.
പൊതു സ്ഥലങ്ങളില്‍ ഇങ്ങനെ മതപരമായ ചടങ്ങുകള്‍ നടത്തുന്നതും,അവിടെ പ്രവര്‍ത്തിക്കുന്നവര്‍ തങ്ങളുടെ മതവിശ്വാസങ്ങള്‍ക്കനുസ്സരിച്ച് പൂജകള്‍ നടത്തുന്നതും നമുക്കു സുപരിചിതമാണു.മുന്‍ കാലങ്ങളില്‍ ഒറ്റപ്പെട്ടതും,നിരുപദ്രവകരവുമായ ചില കാട്ടിക്കൂട്ടലുകളായിരുന്നു ഉണ്ടായിരുന്നതെങ്കില്‍ ,ഇന്നത് വകാശമായും,സംഘടനകളുടേയും,ആചാരാനുഷ്ഠാനങ്ങളുടേയുംപിന്‍ബലമുള്ള മതകര്‍മങ്ങളായും വളര്‍ന്നിട്ടുണ്ട്.അതിനു ഔദ്ധ്യോഗിക പരിവേഷവും നല്‍കപ്പെട്ടുകഴിഞ്ഞു.
കൊച്ചി കപ്പല്‍ നിര്‍മ്മാണശാലയില്‍ നിര്‍മ്മിക്കുന്ന ഓരോ കപ്പലിന്റേയുംകീലിടല്‍ ചടങ്ങിനു ഹോമവും പൂജയും നടത്തുന്നത് ഔദ്ധ്യോഗിക പരിവേഷങ്ങളൊടെയാണു.റോക്കറ്റ് വിക്ഷേപണത്തിനു മുന്‍പ് ശാസ്ത്രജ്ഞര്‍ പൂജകള്‍ നടത്തുന്നത് പതിവാക്കിയതായും മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്.
ഇതിന്റെയൊക്കെ ഉദ്ദേശ്യശുദ്ധിയെ ഓര്‍ത്ത് ക്ഷമിച്ചാലെന്തെന്ന് ചോദിക്കുന്നവരുണ്ടാകാം.
കെ എസ് ആര്‍ ടി സി ബസ് ഓടിക്കുന്ന ഡ്രൈവര്‍ തന്റെ സീറ്റിനു മുന്നില്‍ ഇഷ്ടദൈവങ്ങളുടെ പടംവെക്കുന്നത് തന്റെ അവകാശമാണെന്ന നിലയാണു ഇപ്പോഴുള്ളത്.ശബരിമല സീസണില്‍ അയ്യപ്പഭക്തരുമായി പംബക്കു പൊകുന്ന ബസുകളില്‍ അയ്യപ്പന്റെ ചിത്രങ്ങളും മാലയും പൂജാവസ്തുക്കളും വയ്ക്കുന്നതു ഏതാണ്ട് ഔദ്ധ്യോഗികമായാണു.തംബാന്നൂരും.ചെങ്ങന്നൂരും പന്തളവുമടക്കമുള്ള കെ എസ് ആര്‍ ടി സി ബസ് സ്റ്റേഷനുകള്‍ മണ്ഡലപൂജക്കാലത്ത് അയ്യപ്പക്ഷേത്രങ്ങളെപ്പോലെ രൂപാന്തരം പ്രാപിക്കും.പള്ളിപ്പെരുന്നാളുകള്‍ക്കും മറ്റ് ഉത്സവങ്ങള്‍ക്കും ബസുകളും സ്റ്റേഷനുകളും മതസ്ഥാപനങ്ങളെപ്പോലെ അണിഞ്ഞൊരുങ്ങും:അവിടെ മതകര്‍മ്മങ്ങള്‍ നടക്കും.
ആയുധപൂജക്കും വിദ്യാരംഭത്തിനും,ഫാക്ടറികള്‍,ഓഫീസുകള്‍,വിദ്യാലയങ്ങള്‍,സാംസ്കാരികസ്ഥാപങ്ങള്‍ തുടങ്ങി സര്‍ക്കാരിന്റെ നിയന്ത്രണത്തിലുള്ള പൊതുസ്ഥലങ്ങളില്‍ മതപരമായ ചടങ്ങുകളുടെ ഘോഷയാത്രയാണു.മതത്തിന്റെ ആചാരാനുഷ്ഠാനങ്ങളുടെ ചട്ടക്കുടുകളില്‍ നിന്ന് വിദ്യാരംഭത്തെ പുറത്തുകൊണ്ടുവരാന്‍ ശ്രമിക്കുന്നവര്‍ ഇതിലൂടെ മറ്റ് മതവിഭാഗങ്ങളുടെ വിശ്വാസങ്ങളെ വ്രണപ്പെടുത്തുകയും വ്യാജമതേതരത്വം പ്രചരിപ്പിക്കുകയുമാണു ചെയ്യുന്നത്.ഓണം മലയാളിയുടെ ദേശീയാഘോഷമാണെന്നു ഉദ് ഘോഷിക്കുബോഴും അതിന്റെ വേരുകള്‍ ഹിന്ദുമതത്തിലാണെന്നും,ഓണതിന്റെ ആചാരാനുഷ്ഠാനങ്ങള്‍ക്കു മതാതീതസ്വഭാവം തീരെയില്ലെന്നും മനപ്പൂര്‍വം മറക്കുകയാണു.വിളവെടുപ്പിന്റെയും ഒത്തുചേരലിന്റേയും ഉത്സവമെന്ന തലത്തില്‍ സര്‍വര്‍ക്കും ആഘോഷിക്കാന്‍ കഴിയുന്ന ഓണത്തെ മതാനുഷ്ഠാനങ്ങളുടെ ചട്ടവട്ടങ്ങളിലേക്ക് ചുരുക്കിയെഴുതുംബോള്‍ മതസ്പര്‍ധയും അസ്വാരസ്യങ്ങളും ഉണ്ടാകുക സ്വാഭാവികം.ഓണത്തിനു മത്സ്യമാംസാദികള്‍ വിളംബരുതെന്നു ശഠിക്കുംബോള്‍ ഓണത്തിലെ മതാചാരങ്ങളുടെ സ്വഭാവം മറനീക്കി പുറത്തുവരുന്നു.
മതവിശ്വാസപരമായ കാരണങ്ങളാല്‍ ഇത്തരം ചടങ്ങുകളില്‍ നിന്നും വിട്ടുനില്‍ക്കുന്നവരെ നിര്‍ബന്ധിപ്പിച്ച് പങ്കെടുപ്പിക്കുന്നതും അതിനു ഔദ്ധ്യോഗികപരിവേഷം നല്‍കുന്നതും ജനാധിപത്യത്തിന്റെ അന്തസത്തക്കു നിരക്കുന്നതല്ല.
ഭൂരിപക്ഷമതത്തിന്റെ ആചാരാനുഷ്ഠാനങ്ങളില്‍ അധിഷ്ഠിതമായ ഉത്സവങ്ങള്‍ക്കും,ആഘോഷങ്ങള്‍ക്കും പൊതു ചടങ്ങുകളുടെ ഭാഗമായി ഖജനാവില്‍ നിന്ന് പണം ചെലവാക്കുന്ന സംബ്രദായവും അശാസ്യമല്ല.ക്രിസ്മസും പെരുന്നാളും സര്‍വജനങ്ങളുടേയും ദേശീയാഘോഷമാക്കാന്‍ സാധിക്കാത്തതു പോലെ വിഷുവും ദീപാവലിയുംവിദ്യാരംഭവും പൊതു ആഘോഷങ്ങളാക്കാന്‍ ഒരിക്കലും കഴിയില്ല.അതിനുള്ള സര്‍ക്കാരിന്റേയും മതസംഘടനകളുടെയും ഏതു ശ്രമവും അപകടകരമായ പ്രത്യാഘാതങ്ങളുണ്ടാക്കും:ജനാധിപത്യ വ്യവസ്ഥക്കു മാരകമായ പ്രഹരമേല്‍പ്പിക്കും.
ഇന്ത്യന്‍ റെയില്‍വെ ഈ അപകടം തിരിച്ചറിഞ്ഞത് അടുത്തകാലത്താണു.ലോകത്തെ ഏറ്റവും വലിയ പൊതുമേഖലാസ്ഥാപനമായ റെയില്‍വെ കഴിഞ്ഞവര്‍ഷം ചരിത്രപ്രാധാന്യമുള്ള ഒരു തീരുമാനമെടുത്തു.റെയില്‍വെ സ്റ്റേഷനുകളടക്കം റെയില്‍ വെയുടെ സ്ഥാപനങ്ങളിലെല്ലാം മതപരമായ ചടങ്ങുകള്‍ നിരോധിച്ച നടപടിയാണത്.ശബരിമല സീസണ്‍ സമയത്തും,ആയുധപൂജക്കും റെയില്‍വെ സ്റ്റേഷനുകള്‍ ചെറു ക്ഷേത്രങ്ങളായി രൂപാന്തരം പ്രാപിപ്പിക്കുകയും,ഹുണ്ടികവെച്ച് ഭക്തരുടെ പണം പിരിക്കുകയും ചെയ്യുന്നത് നമ്മള്‍എത്രയോ കാലമായി കണ്ടിരുന്നു.ഉത്തരേന്ത്യയില്‍ ദീപാവലിക്കും ഹോളിക്കുംപ്രാദേശികക്ഷേത്രോത്സവങ്ങള്‍ക്കും
പ്ലാറ്റ്ഫോറങ്ങള്‍ ഭക്തര്‍ കയ്യടക്കി ഹോമവുംപൂജയും നടത്തിവന്നത് ഇപ്പോഴും തുടരുന്നുണ്ടോ എന്നു നിശ്ചയമില്ല. പാസ്വാന്‍ രണ്ടു തവണ റെയില്‍ മന്ത്രിയായിട്ടും കൊടിയ ജാതിവിവേചനം കൊടികുത്തിവാഴുന്ന റെയില്‍വെയില്‍ അധകൃതരുടെ ദൈവങ്ങളെ ഏഴയലത്ത് അടുപ്പിച്ചിരുന്നില്ല എന്ന വൈരുധ്യവുമുണ്ടു.
എന്തായാലും ലാലു പ്രസാദ് യാദവിന്റെ ധീരമായ നിലപാടോടെ കേരളത്തിലെ സ്റ്റേഷനുകളില്‍ നിന്നു മതചിഹ് ന്നങ്ങള്‍ അപ്രത്യക്ഷമാവാന്‍ തുടങ്ങി എന്ന ശുഭവാര്‍ത്തയുണ്ട്.പക്ഷെ, ക്രമേണ പ്ലാറ്റ് ഫോമുകളില്‍ ദൈവങ്ങള്‍ മണി കിലുക്കി തിരിച്ചുവരുമോ എന്നു നിശ്ചയമില്ല.ഭക്തശിരോമണികളും ജാതിബ്രാഹ്മണരുമായ ഉന്നതോദ്ധ്യോഗസ്ഥര്‍ക്കു റെയില്‍വെയില്‍ നിന്നുള്ള ദൈവങ്ങളുടെ കുടിയിറക്ക് ഒട്ടും ഇഷ്ടപ്പെടാനിടയില്ലല്ലോ.
മതചിഹ്നങ്ങള്‍ പൊതു ഇടങ്ങള്‍ കൈയ്യേറുകയും മതേതരത്വത്തെ തകര്‍ക്കുകയുംചെയ്യുന്ന മറ്റൊരു വേദി പൊതുചടങ്ങുകളാണു.ദീപം തെളിയിച്ചേ ചടങ്ങുകള്‍ ഉദ് ഘാടനം ചെയ്യൂവെന്ന് വാശിപിടിക്കുന്നവര്‍ അനാവശ്യമായ മതവൈരം സൃഷ്ടിച്ചുകൊണ്ടിരിക്കുകയാണു.ഇതു വിശ്വാസികളുടെ കാര്യം.
പൊതു ചടങ്ങുകള്‍ക്കു മുന്‍പു മതച്ഛായയുള്ള പ്രാര്‍ഥന എന്തിനാണു?എല്ലാ വിഭാഗക്കാര്‍ക്കുമുള്ളതാണെന്ന വ്യാജേന ചൊല്ലുന്ന മിക്ക പ്രാര്‍ഥനകളും ഹിന്ദുമതചിഹ്നങ്ങളിലും വിശ്വാസപ്രമാണങ്ങളിലും അധിഷ്ഠിതമായവയാണു.മനസ്സില്ല മനസ്സോടെയാണു ഈ നിര്‍ബന്ധിതപ്രാര്‍ഥനാസമയത്ത് അതില്‍ വിശ്വസിക്കാതവരും എണീറ്റ് നില്‍ക്കുന്നത്.
അതിന്യൂനപക്ഷമെങ്കിലും ഒരു മതത്തിലും വിശ്വസിക്കാത്തവരും നമ്മുടെയിടയിലുണ്ടു.സി പി ഐയുടെ ഭൂരിപക്ഷം മന്ത്രിമാരും സാമാജികരും നാസ്തികരാണു.സി പി എമ്മിന്റെ മുന്‍ നിര നേതാക്കള്‍ ദൈവവിശ്വാസികളല്ലെന്നാണു സങ്കല്‍പ്പം.ഇവര്‍ ഉദ്ഘാടകരും അദ്ധ്യക്ഷരും പ്രസംഗകരുമായി പങ്കെടുക്കുന്ന പൊതുചടങ്ങുകള്‍ക്കെങ്കിലും ഇതു വേണ്ടെന്നു വെയ്ക്കാനുള്ള സന്മനസ്സ് സംഘാടകര്‍ കാണിക്കണം.മതവിശ്വാസികളല്ലാത്തവര്‍ക്കും ഭരണഘടനാദത്തമായ പൌരാവകാശങ്ങളുണ്ടെന്നു, ഇവിടെ ന്യൂനപക്ഷാവകാശങ്ങള്‍ക്കു വേണ്ടി വീറോടെ പോരടിക്കുന്നവര്‍ പോലും മറന്നു പോവുന്നു.
മതന്യൂനപക്ഷങ്ങളുടേതടക്കം സംസ്ഥാനത്ത് 8000-ഓളം എയിഡഡ് സ്കൂളുകളുണ്ടു.ഇവയില്‍ ബഹുഭൂരിപക്ഷത്തിലും മത പഠനത്തിന്റെയും സാംസ്കാരികപൈതൃകത്തിന്റെയും പേരില്‍ മാനെജ് മെന്റുകള്‍ തങ്ങളുടെ മതവിശ്വാസം എല്ലാവരിലും അടിച്ചേല്പിക്കുന്നുണ്ടു.ഈ സ്കൂളുകളില്‍ ഉടമസ്ഥരുടെ മതവിശ്വാസങ്ങള്‍ക്കനുസൃതമായ പ്രാര്‍ഥനകളും ചടങ്ങുകളും നിര്‍ബാധം നടക്കുന്നുണ്ടു.അതില്‍ എല്ലാ കുട്ടികളെയും പങ്കെടുപ്പിക്കുന്നുണ്ടു.വിവിധ ജാതി-മത സംഘടനകള്‍ ഇതു തങളുടെ മൌലികാവകാശമാണന്നു വിശ്വസിക്കുന്നു. ഈ സ്കൂളുകളില്‍ സ്ഥാപിച്ചിരിക്കുന്ന മതചിഹ്നങ്ങള്‍ മതേതരത്വത്തിനു നേരെ കൊഞ്ഞണം കുത്തുന്നു.“ഞങ്ങള്‍ ഞങ്ങളുടെ സ്കൂളുകളില്‍ ഞങ്ങള്‍ക്കിഷ്ടമുള്ളതു ചെയ്യും.നിങ്ങള്‍ നിങ്ങളുടെ സ്കൂളുകളില്‍ നിങ്ങള്‍ക്കു ഇഷ്ടമുള്ളത് ചെയ്തോ,” എന്ന നിലയിലാണു കാര്യങ്ങള്‍.ലക്ഷക്കണക്കിനു കുട്ടികളുടെ വ്യക്തിസ്വാതന്ത്യ്രത്തിനു മെലുള്ള നഗ്ന്നമായ കടന്നുകയറ്റമാണിത്.ഇത് അര്‍ഹിക്കുന്ന ഗൌരവത്തോടെ പൊതുസമൂഹം ചര്‍ച്ച ചെയ്തിട്ടില്ല.ഇതിന്റെ ഗുരുതരമായ പ്രത്യാഘാതങ്ങള്‍ എല്ലാ മേഖലയിലും അനുഭവപ്പെട്ട് തുടങ്ങിയിട്ടുണ്ടു.
പൊതു ഇടങ്ങളില്‍ നിന്നും മതേതരത്വം അപ്രത്യക്ഷമായിക്കൊണ്ടിരിക്കുന്നു എന്നാതാണു ആത്യന്തികഫലം.മതമില്ലാത്തവര്‍ക്കു സ്വതന്ത്ര ഇന്ത്യയില്‍ മിക്കയിടത്തും അന്തസ്സോടെ ജീവിക്കാ‍നാവില്ലന്ന അപകടകരമായ അവസ്ഥ വന്നുചേര്‍ന്നിരിക്കുന്നു.സര്‍വപൊതു സ്ഥലങ്ങളും കയ്യൂക്കുള്ള മത-ജാതി വിഭാഗക്കാര്‍ കൈയ്യടക്കി തങ്ങളുടെ വിഭാഗീയത തീവ്രമായി പ്രചരിപ്പിച്ചുകൊണ്ടിരിക്കുന്നു.സര്‍ക്കാര്‍ ഫണ്ടുപയോഗിച്ചു നടത്തുന്ന സ്ഥാപനങ്ങള്‍ പോലും അവര്‍ തങ്ങളുടെ മതവിശ്വാസങ്ങള്‍ക്കനുസൃതമായി രൂപപ്പെടുത്തുന്നു.മറ്റു വിഭാഗങ്ങളുടെ വിശ്വാസപ്രമാണങ്ങള്‍ക്കും ആചാരാനുഷ്ഠാനങ്ങള്‍ക്കും നേരെ അസഹിഷ്ണുതയും ശത്രുതയുംവളര്‍ത്തുന്ന അന്തരീക്ഷം ഇങ്ങനെ സൃഷ്ടിക്കപ്പെട്ടുകൊണ്ടിരിക്കുന്നു.
ഒരു തീപ്പൊരി മതി,എല്ലാം ഒരു നിമിഷം കൊണ്ടു ആളിക്കത്തി ചാരമാകാന്‍.
പൊതു സ്ഥലങ്ങളില്‍ ദൈവങ്ങളെ കുടിവെച്ചാരാധിക്കുന്നവര്‍ ഇക്കാര്യം ഓത്താ‍ല്‍ നന്നു.
അഗ്നിപര്‍വതത്തിനു മുകളിലാണവര്‍ വസിക്കുന്നതു.