ഇരട്ടപെറ്റവര്‍

ഉപ്പായി മാപ്പിളക്കും ഉലഹന്നാന്‍ സഖാവിനും തമ്മിലെന്ന്തു?

അവര്‍ ഒരച്ഛനുമമ്മക്കും പിറന്നവര്‍.

ഒരാള്‍ മീശയെടുത്തു.അപരന്‍ മീശ വളര്‍ത്തി.

രണ്ടാളും വെള്ളയിട്ടു.പിന്നെ, രണ്ടാളും കവലയിലേക്കിറങ്ങി.ഒരാള്‍ തെക്കോട്ടും മറ്റേയാള്‍ വടക്കോട്ടും പുറം തിരിഞ്ഞു നിന്ന് അലറി പ്രസംഗിക്കാന്‍ തുടങ്ങി.
രണ്ടും സ്വര്‍ഗ്ഗരാജ്യത്തെക്കുറിച്ചായിരുന്നു.ഒന്ന് പരലോക സ്വര്‍ഗ്ഗം.മറ്റേത് ഇഹലോക സോഷ്യലിസ്റ്റ് സ്വര്‍ഗ്ഗം.

ഉപ്പായി മാപ്പിളയുടെ കൈയിലും ഉലഹന്നാന്‍ സഖാവിന്റെ കൈയിലും ഓരോ വിശുദ്ധഗ്രന്ഥങ്ങളുണ്ടായിരുന്നു.

ഒരാളുടെ കൈയില്‍ സത്യവേദപുസ്തകം.മറ്റേയാളുടെ കൈയില്‍ മാര്‍ക്സിന്റേയും ഏംഗത്സിന്റേയും ലെനിനിന്റേയും തലയുള്ള ചുവന്ന പുസ്തകം.

രണ്ടാളും തങ്ങളുടെ വേദഗ്രന്ഥങ്ങളിൽ തൊട്ട് വന്ദിച്ച്,പേജുകള്‍ മറിച്ച് സ്വര്‍ഗരാജ്യാരോഹണത്തെക്കുറിച്ച് പ്രഘോഷിച്ചുകൊണ്ടിരിക്കുന്നു.പദാനുപദം;വൃത്താനുവൃത്തം.

അവര്‍ രണ്ടാളും ഒരേ ഗര്‍ഭപാത്രത്തിലുയിര്‍കൊണ്ടവര്‍.ഒരമ്മപെറ്റ മക്കള്‍ ;ഇരട്ടകള്‍.
---------------------------------------------------------------------
പത്ത് വര്‍ഷം മുന്‍പ് സാഹിതീസായകം എന്ന ലിറ്റില്‍ മാഗസിനില്‍ എഴുതിയ ഈ കുറിപ്പ് പുനപ്രസിദ്ധീകരിക്കുകയാണിവിടെ.സോഷ്യലിസത്തെക്കുറിച്ചുള്ള പുതിയ വിവാദങ്ങളുടെ പശ്ചാത്തലത്തിലാണിത്.