വിശ്വാസം വയറു നിറക്കില്ല,അച്ചന്മാരേ!

'വയറ്റില്‍ നിറഞ്ഞാല്‍ പാത്രത്തിലും നിറയും''

''കൂടുതല്‍ കുട്ടികള്‍ കൂടുതല്‍ സുരക്ഷക്ക്"

-കൂടുതല്‍ കുട്ടികളെ ഉണ്ടാക്കല്‍‍ പരിപാടിക്ക് വിശ്വാസികളെ പ്രേരിപ്പിക്കാനായി തൃശ്ശൂര്‍ അതിരൂപത പുറത്തിരക്കിയ പോസ്റ്ററില്‍ കണ്ടതാണിത്‍!

കേരളത്തിലെ തങ്ങളുടെ ആള്‍ക്കാര്‍ കുറഞ്ഞുവരുന്നത് കാരണം നിയമസഭാമണ്ഡലങ്ങള്‍ കുറയുന്നു.ഇനി ലോക് സഭാമണ്ഡലങ്ങളും കൂടി കുറഞ്ഞാലോ?

മലപ്പുറത്താണങ്കില്‍ ജനം പെരുകുന്നത് കാരണം ‘മറ്റവര്‍ക്കു‘ വോട്ടും സീറ്റും കൂടുന്നു.ഇങ്ങനെപോയാല്‍‍ മറ്റവര്‍ എല്ലാം അടിച്ചുമാറ്റുമോ..!ദൈവരാജ്യം കൈവിട്ടു പോകുമോ! ഈ ആശങ്കയില്‍ നിന്നാണു കൂടുതല്‍ കുട്ടികളെ പെറ്റുകൂട്ടാന്‍ കുഞ്ഞാടുകളോട് സഭ ആവശ്യപ്പെടുന്നത്.
ഇതു ഇന്ത്യപ്പോലുള്ള ഒരു വികസ്വരരാജ്യത്തിന്റെ ഉച്ചിയില്‍ ആണിക്കല്ലടിക്കാനുള്ള ശ്രമമാണു.ജനസംഖ്യാപ്പെരുപ്പം കാരണം വീര്‍പ്പുമുട്ടിയിരുന്ന കേരളത്തില്‍ കഴിഞ്ഞ നാലു പതിറ്റാണ്ടോളം നീണ്ടു നിന്ന അക്ഷീണ പ്രചാരണപ്രവര്‍ത്തനത്തിന്റെ ഫലമായി നേടിയ സര്‍വ്വ പുരോഗതിയേയും തകര്‍ക്കാനുള്ള ഏറ്റവും അപകടകരവും പ്രതിലോമകരവുമായ നീക്കമാണു ഒരു വിഭാഗം കൃസ്ത്യന്‍ സഭക്കാര്‍ വിശ്വാസസംരക്ഷണത്തിന്റെ പേരില്‍ നടത്തുന്നത്.തങ്ങളുടെ മതവിഭാഗത്തിലേക്കു മാത്രം സമൂഹത്തെ ചുരുക്കുന്ന,മറ്റുള്ളവരെ ശത്രുക്കളായി കാണുന്ന മതാന്ധര്‍ക്കു മാത്രമേ ഇങ്ങനെ ഒരു ഭ്രാന്തന്‍ കര്‍മ്മപദ്ധതിക്ക് രൂപം നല്‍കാന്‍ കഴിയൂ.

മലപ്പുറം ജില്ലയില്‍ ജനസംഖ്യാപ്പെരുപ്പം പിടിച്ചുനിര്‍ത്താന്‍ കഴിയാത്തതിനു കാരണവും മതപരം തന്നെ.കുടുംബാസൂത്രണ മാര്‍ഗ്ഗങ്ങള്‍ അവലംബിക്കുന്നത് ചെകുത്താന്റെ‍ ശൈതിയാണെന്ന് ഇപ്പോഴും അവരെ പഠിപ്പിക്കുന്നവരുണ്ടു.തങ്ങളുടെ വോട്ടുബാങ്കിന്റെ വലുപ്പം കൂട്ടാന്‍ ചിലര്‍ ഇതിനെ കൈയ്യയച്ച് പ്രോല്‍‍സാഹിപ്പിക്കുന്നു.കഴിഞ്ഞ ഒരു ദശകത്തിനുള്ളില്‍ മലപ്പുറത്തെ കുടുംബാസൂത്രണപ്രവര്‍ത്തനങ്ങള്‍ ഏതാണ്ടു നിലച്ച മട്ടാണു.സര്‍ക്കാര്‍ മുന്‍ കൈയ്യെടുത്ത് അടിയന്തിരമായി അവിടുത്തെ രാഷ്ട്രീയ-മത സംഘടനകളുടെ യോഗം വിളിച്ചു ചേര്‍ത്ത് ,പുതിയ പ്രചാരണ-അവബോധ പരിപാടികള്‍‍ ആവിഷ്കരിച്ച് നടപ്പിലാക്കേണ്ടതാണു.

ശൈശവവിവാഹവും അവിടെ അപകടകരമാം വിധം വര്‍ദ്ധിച്ചുവരുന്നുണ്ടു.പ്രതിബദ്ധതയുള്ള ഒരു സര്‍ക്കാരിനും ഇതില്‍ ഇടപെടാതിരിക്കാനാകില്ല.കേരളത്തിലെ ഏറ്റവുമധികം മാധ്യമങ്ങളുള്ള ജനവിഭാഗമാണു മുസ്ലീംങ്ങള്‍-4 ദിനപത്രങ്ങളും ഒരു ടെലിവിഷന്‍ ചാനലും സ്വന്തമായുള്ള,വിവര-സാങ്കേതകരരംഗത്തു ഏറ്റവും കൂടുതല്‍ വിദഗ്ദരുള്ള ഒരു ജനസമൂഹം ജനസംഖ്യാവിസ്ഫോടനത്തില്‍ നട്ടം തിരിയുന്നതിന്റെ യഥാര്‍ത്ഥ കാരണങ്ങള്‍ കണ്ടെത്തേണ്ടത് അവര്‍ക്കിടയിലെ ബുദ്ധിജീവികളും നിഷ്പക്ഷമതികളുമാണു.അവരതിനു മുന്‍ കൈ എടുക്കട്ടെ.

ഇല്ലെങ്കില്‍ കേരള കാത്തലിക് ബിഷപ്പ്സ് കൌണ്‍സില്‍ കൂടുതല്‍ കുട്ടികളെ ഉണ്ടാക്കാന്‍ മുന്നിട്ടിറങ്ങിയതു പോലെ സംഘ പരിവാറുകാരടക്കമുള്ള ഹിന്ദുത്വതീവ്രവാദികളും രംഗത്തെത്തും.നാലു വര്‍ഷം മുന്‍പ് ‍മലപ്പുറത്തെ തിരുനാവായയില്‍ പി.പരമേശ്വരന്‍‍ എന്ന ഹൈന്ദവരുടെ താത്ത്വികാചാര്യന്‍ സര്‍വ്വ ഹിന്ദുക്കളോടും കൂടുതല്‍ കുട്ടികളെ സൃഷ്ടിച്ച് ഹൈന്ദവരുടെ എണ്ണം കൂട്ടാന്‍ ആഹ്വാനം ചെയ്തിരുന്നതാണു.പക്ഷേ ഇതു കേട്ട് ഒരു കടുത്ത ഹിന്ദുത്വവാദി പോലും കര്‍മ്മനിരതനായതായി അറിയില്ല.എന്തു കൊണ്ടെന്നാല്‍ അതിനൊരു കര്‍മ്മപദ്ധതിയുടെ പിന്‍ബലം ഉണ്ടായിരുന്നില്ല.അന്നു മണ്ഡലം‍പുനര്‍നിര്‍ണ്ണയിച്ചതിന്റെ വാര്‍ത്ത വന്നിരുന്നില്ല.
പക്ഷേ ഇന്ന് അതല്ലല്ലോ സ്ഥിതി?കത്തോലിക്ക സഭ വിശ്വാസികളെ പെറ്റുകൂട്ടാന്‍ കുഞ്ഞാടുകള്‍ക്കു പ്രലോഭനങ്ങള്‍‍ വെച്ചു നീട്ടുമ്പോള്‍ അവര്‍ ചുമ്മാതിരിക്കുമോ?
കേരളം സമുദായികാസ്വാസ്ഥ്യത്തിന്റെ അശാന്ത ദിനങ്ങളിലേക്കാണു നീങ്ങുന്നത്.ഇതു തീ കൊണ്ടുള്ള കളിയാണു.

കൌമാരത്തിലേ തന്നെ കുടുംബവുമായുള്ള ബന്ധം വിട്ട് അവിവാഹിതപൌരോഹിത്യം നയിക്കുന്ന കത്തോലിക്കാപുരോഹിതര്‍ക്ക്‍ കുടുംബ ജീവിതത്തിന്റെ കെട്ടുപാടുകളെക്കുറിച്ച് എന്തറിയാം?സഭക്ക് ആളുകളെ കൂട്ടാനായി മാത്രം കുഞ്ഞാടുകളോട് പെറ്റു കൂട്ടാന്‍ ആഹ്വാനം ചെയ്യുന്നവര്‍ക്ക് സാമൂഹികബോധം തീരെയില്ല.അതാണു ഡോ.ഡി.ബാബുപോള്‍ മാധ്യമത്തിലിലെഴുതിയ ലേഖനത്തില്‍ നിരീക്ഷിച്ചത്.സമൂഹത്തിനും കാലത്തിനും നേരെ പുറം തിരിഞ്ഞു നിന്നാല്‍ പോപ്പിന്റെ നാട്ടിലേയും ബ്രിട്ടനിലേയും മറ്റും ദുരവസ്ഥയാകും സഭക്കുണ്ടാകുക എന്നു അദ്ദേഹം‍ മുന്നറിയിപ്പു നല്‍കുന്നുണ്ടു.അവിടെ വിശ്വാസികള്‍ ‍പള്ളികകളെ ഉപേക്ഷിച്ചത് കാരണം അവ അടച്ചുപൂട്ടിക്കൊണ്ടിരിക്കുന്നു.അച്ചന്മാരേയും കന്യാസ്ട്രീകളേയും കിട്ടാനുമില്ല!

സഭാനേതൃത്വത്തിനു വെളിവില്ലെങ്കിലും ജീവിതപ്രാരാബ്ധംകാരണം നട്ടം തിരിയുന്ന സാധാരണക്കാരും,വിദ്യാസമ്പന്നരായഇടത്തരക്കാരുമടങ്ങിയ മഹാഭൂരിപക്ഷം കത്തോലിക്കാവിശ്വാസികളും ഈ ആഹ്വാനത്തിനുവിലകല്‍പ്പിക്കുകയില്ല.അച്ഛന്മാരാകാത്ത അച്ചന്മാരുടെ കുര്‍ബാനപ്രസംഗം കേട്ട് അവര്‍ വീടുനിറയെ പിള്ളേരെ ഉണ്ടാക്കാനിറങ്ങുമോ?
വിശ്വാസം കുഞ്ഞാടുകളുടെ വയറു നിറക്കില്ല,അച്ചന്മാരേ!