ശബരിമല:മാദ്ധ്യമങ്ങളും വിചാരണ ചെയ്യപ്പെടട്ടെ

ആരാണു 102 ശബരിമലഭക്തരുടെ മരണത്തിനു ഉത്തരവാദികൾ?

-അതിനു അന്വേഷണ കമ്മീഷനോ,കുറ്റവിചാരണയോ ഗവേഷണമോ ആവശ്യമില്ല.ഈ കൂട്ടമരണങ്ങൾക്ക് സമാധാനം പറയേണ്ടത് സർക്കാരും മലയാളത്തിലെ പ്രമുഖ മാദ്ധ്യമങ്ങളുമാണു.മകരജ്യോതി എന്ന ദിവ്യജ്യോതി കണ്ടുവണങ്ങാൻ പുൽമേട്ടിൽ തമ്പടിച്ചിരുന്നവരാണു, തിരിച്ചിറങ്ങവേ അപകടത്തിൽ പെട്ടത്.അതിൽ ഏതാനും പേരൊഴികെ എല്ലാവരും അന്യസംസ്ഥാനങ്ങളിൽ നിന്നുള്ള അയ്യപ്പന്മാരായിരുന്നു.മുൻപ് നടന്ന സമാനമായ രണ്ടു ദുരന്തങ്ങളും മകരജ്യോതി ദർശനത്തോടനുബന്ധിച്ചുണ്ടായ തിക്കിലും തിരക്കിലുമായിരുന്നു.ഇവയിലൊക്കെ ജീവിതം പൊലിഞ്ഞവരിൽ ബഹുഭൂരിപക്ഷവും അന്യസംസ്ഥാനക്കാരായിരുന്നു എന്നത് യാദൃച്ഛികമല്ല.

മകരസംക്രാന്തി നാൾ വൈകിട്ട് സംക്രമസമയത്ത് പൊന്നമ്പലമേട്ടിൽ കാണുന്നത് അയ്യപ്പന്റെ അത്ഭുതപ്രവർത്തനം മൂലം സ്വയംഭൂവായി ഉണ്ടാകുന്ന ദിവ്യജ്യോതിയല്ലെന്ന് ആ പാവങ്ങൾക്ക് അറിയില്ലല്ലോ.

ഗോപി എന്ന ആദിവാസി യുവാവ് മകരജ്യോതി കത്തിച്ചുകാണിക്കുന്നതിന്റെ ഫോട്ടോ സഹിതം യുക്തിവാദിസംഘടനകൾ ആയിരക്കണക്കിനു ലഘുലേഖകളടിച്ച് വിതരണം ചെയ്തിരുന്നു.197 3 ജനുവരി 11നു എം.ആർ.നാഥൻ എന്ന യുക്തിവാദി ഒരു സംഘം പ്രവർത്തകരോടൊപ്പം “മനുഷ്യന്റെ കാല്പാദങ്ങൾ പതിഞ്ഞിട്ടില്ല”എന്ന് പ്രചരിപ്പിച്ചിരുന്ന പൊന്നമ്പലമേട്ടിൽ കടന്നു ചെന്ന് ജ്യോതിതെളിയിക്കുന്നയാളെ കൈയ്യോടെ പിടികൂടുകയും പന്തങ്ങൾ കത്തിച്ചുകാട്ടി സ്വയം ജ്യോതി തെളിയിക്കുകയും ചെയ്തതിനെത്തുടർന്നായിരുന്നു ആസൂത്രിതമായ ഈ വിശ്വാസത്തട്ടിപ്പ് പുറം ലോകം ആദ്യമായി അറിയുന്നത്.തുടർന്ന് 1984 വരെ എല്ലാവർഷവും മകരവിളക്ക് ദിനത്തിൽ യുക്തിവാദികളും ഗവേഷകരും പൊതുപ്രവർത്തകരുമൊക്കെ അവിടെയെത്തി കർപ്പൂരവും പന്തവും കത്തിച്ചുകാട്ടുകയോ,ആദിവാസികളും ഉദ്യോഗസ്ഥരും ചേർന്ന് ജ്യോതികത്തിക്കുന്നത് നേരിട്ട് കാ‍ണുകയോ ചെയ്ത് ഈ തട്ടിപ്പ് പുറത്ത് കൊണ്ടുവന്നിട്ടുണ്ടു.ഇക്കാര്യത്തിൽ ദേവസ്വം അധികൃതരോ,സർക്കാരോ ഇന്നേവരെ പ്രതികരിച്ചിട്ടുമില്ല.കഴിഞ്ഞ 16 വർഷമായി റിസർവ് ഫോറസ്റ്റായ പൊന്നമ്പലമേട്ടിലേക്ക് ഒരാളെപ്പോലും കടത്തിവിടാതെ പൊലീസിന്റെ സായുധകാവലോടെയാണു ഈ വിശ്വാസത്തട്ടിപ്പ് അരങ്ങേറുന്നത്.

ഇത് ശബരിമലയുമായി അടുത്ത് ബന്ധമുള്ള സർവർക്കും അറിയാം.രണ്ടുവർഷം മുൻപ് തന്ത്രി കണ്ടരരു മഹേശ്വരരു തന്നെ ഇക്കാര്യം പരസ്യമായി സമ്മതിച്ചിരുന്നു.മകരവിളക്ക് ഭക്തർ കത്തിക്കുന്നതാണെന്നു തുറന്നു സമ്മതിക്കാനുള്ള ആർജ്ജവം അദ്ദേഹത്തിനുണ്ടായി.പക്ഷേ,മകരജ്യോതിയെ വലിയൊരു വിശ്വാസവ്യാപാരമായി കണ്ട അധികൃതരോ,മാദ്ധ്യമങ്ങളോ തന്ത്രിയുടെ വാക്കുകൾക്കു പോലും പ്രാധാന്യം കൊടുത്തില്ല.

സത്യത്തിൽ ഇത്തരമൊരു വ്യാജപ്രചാരണത്തിന്റെ ആവശ്യമില്ലാതെ തന്നെ ശബരിമലയിലേക്ക് ഇനിയും ദശലക്ഷക്കണക്കിനു ഭക്തർ ഒഴുകും.വർഷങ്ങൾക്ക് മുൻപ് മാതൃഭൂമി പത്രത്തിൽ എഴുതിയ ഹൃദയസ്പർക്കായ ഒരു ലേഖനത്തിൽ സുഗതകുമാരി തന്നെ ഇത് പറഞ്ഞിരുന്നു.അയ്യപ്പന്റെ പരമഭക്തരായിരുന്ന വി.കെ.ബി നായർ ‘മലയാള മനോരമ’യിലെ തന്റെ പ്രതിവാര പംക്തിയിൽ ഒന്നര ദശാബ്ദം മുൻപ് തന്നെ മകരജ്യോതി തട്ടിപ്പാണെന്ന് തുറന്നെഴുതിയിരുന്നു.മുൻ ഡി.ജി.പിയും എഴുത്തുകാരനുമായിരുന്ന എൻ.കൃഷ്ണൻ നായരും ഈ വിശ്വാസത്തട്ടിപ്പു തുറന്നു കാട്ടിയ അയ്യപ്പഭക്തരിൽ ഉൾപ്പെടും.


ഏറ്റവും ഒടുവിൽ കൊച്ചിയിലെ ദ ന്യൂ ഇന്ത്യൻ എക്സ്പ്രസിന്റെ റസിഡന്റ് എഡിറ്ററും എന്റെ സഹപ്രവർത്തകനുമായിരുന്ന എം.കേശവൻ നമ്പൂതിരി എന്ന ഭക്തൻ അതിശക്തമായ ഭാഷയിൽ ഇക്കഴിഞ്ഞ ദിവസം പത്രത്തിൽ ഇക്കാര്യം തുറന്നടിച്ചിട്ടുണ്ടു-അയ്യപ്പന്റെ പേരിൽ നടന്നുവരുന്ന ഈ തട്ടിപ്പ് നിർത്തൂ എന്ന് അദ്ദേഹം എഴുതുന്നത് സ്വാനുഭവങ്ങളും ജ്യോതിയുടെ ചരിത്രവും വിശദീകരിച്ചുകൊണ്ടാണു.


ഈ ദുരന്തത്തിന്റെ ഉത്തരവാദിത്വം പരസ്പരം ആരോപിക്കാൻ സർക്കാർ വകുപ്പുകൾ തമ്മിൽ നടത്തുന്ന മത്സരത്തിലേക്കും ,സർക്കാരിന്റെഅനാസ്ഥയിലേക്കും ശ്രദ്ധതിരിച്ചുവിടാൻ നോക്കുന്ന മറ്റെല്ലാപത്രങ്ങളും ഈ മൌലികമായ പ്രശ്നം തമസ്കരിക്കുന്നു.ഭക്തരെ പിഴിഞ്ഞെടുക്കുക എന്ന ദുഷ്ടലാക്കോടെ നടത്തുന്ന ഈ വ്യാജപ്രചാരണങ്ങൾ അവർ തുടരുമ്പോഴും മകരജ്യോതി മനുഷ്യൻ കത്തിക്കുന്നതാണെന്നും ഇതിൽ അത്ഭുതമൊന്നുമില്ലെന്നും സമീപ സംസ്ഥാനങ്ങളിലെ മാദ്ധ്യമങ്ങളിലൂടെ സർക്കാർതന്നെ വ്യാപകമായ പരസ്യം നൽകണമെന്ന് ‘ഇന്ത്യൻ എക്സ്പ്രസ്’17നു മുഖപ്രസംഗത്തിൽ ആവശ്യപ്പെടിരിക്കുന്നു.ഇതു സംബന്ധിച്ച കത്തുകളും പരശുരാമന്റേയും മറ്റും ലേഖനങ്ങളും അവർ പ്രസിദ്ധീകരിച്ചിട്ടുണ്ടു.പക്ഷേ,ഉത്തരവാദിത്വബോധത്തോടെ പെരുമാറേണ്ട കേരളത്തിലെ ഒരു മാദ്ധ്യമവും ഈ കടുത്ത വിശ്വാസത്തട്ടിപ്പിനെതിരെ ശബ്ദിക്കാൻ തയ്യാറായിട്ടില്ല.മകരജ്യോതി മരണജ്യോതിയായതിനെക്കുറിച്ച് യുക്തിവാദ സംഘം പുറത്തിറക്കിയ പ്രസ്താവനയോ,ഈ അന്ധവിശ്വാസത്തിനെതിരെ സുകുമാർ അഴീക്കോട് നടത്തിയ തുറന്നടിക്കലോ മിക്ക മാദ്ധ്യമങ്ങളും തമസ്കരിച്ചിരിക്കുന്നു.

അങ്ങനെ, കേരളത്തിലെ സർവ മാദ്ധ്യമങ്ങളും സർക്കാരും കൂടി നടത്തുന്ന വലിയൊരു തട്ടിപ്പാണു മകരജ്യോതി.പരസ്യമായി നടത്തപ്പെടുന്ന ഈ വിശ്വാസത്തട്ടിപ്പിന്റെ വിജയമാണു കേരളത്തെ വിശ്വാസവ്യാപാരികളുടെ പറുദീസയാക്കിമാറ്റിയത്.ഇതൊരു പൊള്ളുന്ന ചരിത്രയാഥാർത്ഥ്യമാണു.ജനങ്ങളുടെ മതസ്വാതന്ത്ര്യത്തേയും വിശ്വാസങ്ങളേയും ആചാരാനുഷ്ഠാനങ്ങളേയും തീർച്ചയായും സംരക്ഷിക്കണം.പക്ഷേ വിശ്വാസത്തിന്റെ പേരിൽ നടത്തപ്പെടുന്ന ഇത്തരം തട്ടിപ്പുകൾക്ക് പ്രചാരണം നൽകുന്നത് സാമൂഹികാപരാധമാണു.അതിനാൽ സർക്കാരിനൊപ്പം മാദ്ധ്യമങ്ങളും ഇത്തരം കൂട്ടമരണങ്ങൾക്ക് വിചാരണ ചെയ്യപ്പെടേണ്ടതുണ്ടു.