ചരിത്രസാക്ഷികൾ-ബി.ആർ.പി ഭാസ്കർ

 ബി.ആർ.പി ഭാസ്കറിൻ്റെ മാദ്ധ്യമജീവിതം ഏഴു പതിറ്റാണ്ട് പിന്നിട്ടിരിക്കുന്നു. ദ ഹിന്ദുവിൽ തുടങ്ങിയ സംഭവബഹുലമായ ആ യാത്രയെക്കുറിച്ച്, ക്ലബ്ബ് ഹൗസ് മീഡിയ റൂമിൻ്റെ 'ചരിത്രസാക്ഷികൾ' പരമ്പരയിൽ പ്രത്യേക ക്ഷണിതാവായെത്തി (മാർച്ച് 24, 2024) അദ്ദേഹം സംസാരിച്ചു.

സ്വാതന്ത്ര്യസമരസേനാനിയും സാമൂഹിക പരിഷ്ക്കർത്താവും പത്രാധിപരുമായിരുന്ന അച്ഛൻ എ.കെ ഭാസ്കർ മകനിട്ട പേര് ബാബു രാജേന്ദ്രപ്രസാദ് ഭാസ്കർ .അദ്ദേഹം കൊല്ലത്ത് നിന്ന് ഇറക്കിയിയിരുന്ന 'നവഭാരതം' ദിനപത്രത്തിൽ, പിൽക്കാലത്ത് മലയാള പത്രലോകത്ത് പ്രശസ്തരായിത്തീർന്ന എൻ. രാമചന്ദ്രൻ, കെ. വിജയരാഘവൻ എന്നിവരും സി.എൻ ശ്രീകണ്ഠൻ നായരും ഉണ്ടായിരുന്നു. പത്രാധിപർ ബാപ്പുറാവു. അദ്ദേഹമായിരുന്നു ഗുരു;അതായിരുന്നു കളരി . തൂലികാനാമത്തിൽ ആ പത്രത്തിൻ ലേഖനങ്ങളെഴുതിയാണ് തുടക്കം. അച്ഛൻ, പക്ഷേ, മകനെ സർക്കാർ ഉദ്യോഗസ്ഥനാക്കാനാണ് ആഗ്രഹിച്ചത്." എന്നാൽ, എനിക്കൊരിക്കലും സർക്കാരുദ്യോഗത്തിൽ താല്പര്യം തോന്നിയില്ല".

 

കൊല്ലം എസ്.എൻ കോളേജിൽ ബിരുദത്തിന് പഠിച്ചത് ഗണിതശാസ്ത്രം. അദ്ധ്യാപകനായ പ്രൊഫ.ബാലകൃഷ്ണ ശർമ്മ, ഇന്ത്യാവിഭജനത്തിന് മുൻപ് സിന്ധിൽ എ.പി.ഐയുടെ പാർട്ട് ടൈം കറസ്പോണ്ടൻ്റായിരുന്നു. "പത്രപ്രവർത്തകനാകാനാണ് ആഗ്രഹമെന്ന് അറിഞ്ഞപ്പോൾ അദ്ദേഹം പറഞ്ഞു; കണക്ക് പഠിക്കുന്നത് നല്ലതാണ്. ഗണിതശാസ്ത്രത്തിലും പത്രപ്രവർത്തനത്തിലും വേണ്ടത് ചുരുക്കിപ്പറയലാണ്".

 

പ്രാദേശിക പത്രപ്രവർത്തനത്തിനപ്പുറത്തേയ്ക്കായിരുന്നു കണ്ണ്. മുൻപ് ദി ഇന്ത്യൻ എക്സ്പ്രസിൽ പ്രവർത്തിച്ചിരുന്ന പ്രമുഖ ഗാന്ധിയൻ ജി. രാമചന്ദ്രനെ പരിചയമുണ്ടായിരുന്നു.

"പത്രത്തിൽ ചേരാനായി അദ്ദേഹവുമായി ഞാൻ ബന്ധപ്പെടുന്നെന്ന് അറിഞ്ഞ അച്ഛൻ, ഇംഗ്ലീഷ് പത്രങ്ങളിൽ തന്നെ പ്രവർത്തിക്കാനാണ് താല്പര്യമെങ്കിൽ, ദ ഹിന്ദുവാണ് ഏറ്റവും നല്ലതെന്ന് പറഞ്ഞു. അദ്ദേഹത്തിന് പത്രാധിപർ കസ്തൂരി ശ്രീനിവാസനെ അറിയാമായിരുന്നു.അദ്ദേവുമായി സംസാരിക്കാമെന്നും ഏറ്റു".

 ഭാര്യ രമ ബി.ഭാസ്കർ

1952-ൽ ദ ഹിന്ദുവിൽ ട്രെയ്നിയായി ചേർന്നു. അന്നത്തെ മദിരാശി മുഖ്യമന്ത്രി സി. രാജഗോപാലാചാരിയുടെ മകൻ സി.ആർ കൃഷ്ണസ്വാമിയായിരുന്നു അന്ന് പത്രാധിപസമിതിയിലെ ഏറ്റവും സീനിയറായ ബാച്ച് ലീഡർ (ഇന്നത്തെ ചീഫ് സബ് എഡിറ്റർ). അദ്ദേഹം പിന്നീട് ന്യൂസ് എഡിറ്ററായി. ആദ്യ ദിവസങ്ങളിൽ, പകൽ മുഴുവൻ ഡസ്കിലിരുന്ന്, അവിടുത്തെ പ്രവർത്തനങ്ങൾ കണ്ടു പഠിക്കാനായിരുന്നു നിർദ്ദേശം. വാർത്തകളുടെ വിശ്വാസ്യതയ്ക്കും കൃത്യതയ്ക്കും പേരുകേട്ട പത്രം. എഡിറ്റിങ്ങിനു ശേഷം, കമ്പോസ് ചെയ്യുന്ന ഓരോ വാർത്തയും പത്രാധിപ സമിതി അംഗങ്ങൾ മൂന്ന് തവണ പ്രൂഫ് വായിക്കും.

 

ഒരു മാസത്തിനു ശേഷം, ഡെസ്ക്കിൻ്റെ ചുമതലയുള്ള പി.കെ ബാലസുബ്രഹ്മണ്യത്തോട് ചോദിച്ചു: എനിക്കെന്തെങ്കിലും പണി തരുമോ ? കൊളംബോ ലേഖകൻ അയച്ച ഒരു കമ്പി സന്ദേശം അദ്ദേഹം എടുത്ത് നൽകി. സിലോണിൻ്റെ (ശ്രീലങ്ക) ആദ്യ പ്രധാനമന്ത്രി ഡൺ സ്റ്റീഫൻ സേനായകെ തലേ ദിവസം കുതിരപ്പുറത്ത് നിന്ന് വീണ് അബോധാവസ്ഥയിലാണ്;അദ്ദേഹം ഏതു നിമിഷവും മരിക്കാം. അദ്ദേഹത്തെക്കുറിച്ച് മുൻകൂട്ടി എഴുതിയ ചരമക്കുറിപ്പാണ് ആദ്യമായി എഡിറ്റ് ചെയ്തത്. അത് വായിച്ച്, ചീഫ് സബിന് ഇഷ്ടപ്പെട്ടുവെന്ന് തോന്നി.സിലോൺ പ്രധാനമന്ത്രിയുടെ സ്ഥിതി കുറച്ചു മെച്ചപ്പെട്ടുവെന്ന ഏജൻസി വാർത്ത വായിച്ചാണ് വൈകീട്ട് മടങ്ങിച്ചത്. രാവിലത്തെ പത്രം നോക്കുമ്പോൾ, അദ്ദേഹത്തിൻ്റെ ചരമ വാർത്തയും ആ കുറിപ്പുമുണ്ട്. രാത്രി അദ്ദേഹം മരിച്ചിരുന്നു. 

 

ബി.ആർ.പി ഭാസ്കർ എന്ന ആദ്യ ബൈലൈൻ അച്ചടിച്ചുവരുന്നത് അക്കാലത്താണ്. പക്ഷേ, അത് , ദ ഇന്ത്യൻ എക്സ്പ്രസിലായിരുന്നു;ദ ഹിന്ദുവിലല്ല.പത്രപ്രവർത്തകർ ഐ.എഫ്.ഡബ്ലിയു.ജെ എന്ന പേരിൽ തൊഴിലാളി സംഘടന രൂപീകരിച്ചത് അക്കാലത്താണ്. അതിൽ അംഗമായി. ലക്നൗവിൽ നടന്ന ദേശീയ സമ്മേളനത്തിന് പ്രതിനിധിയായി പോകുമ്പോൾ, ഭോപ്പാലിൽ ഇറങ്ങി. അവിടെ നിന്ന് നൂറു കിലോമീറ്റർ അകലെയുള്ള സുൽത്താൻപൂർ സന്ദർശിക്കുകയായിരുന്നു, ലക്ഷ്യം. മലയാളികളായ മുന്നൂറ് കർഷക കുടുംബങ്ങൾ അവിടെയുണ്ടായിരുന്നു. അതെക്കുറിച്ച് അറിഞ്ഞിരുന്നു. ഭക്ഷ്യക്ഷാമം അതിരൂക്ഷമായ കാലം. സുൽത്താൻപൂരിനടുത്ത വനപ്രദേശത്ത് സർക്കാർ ഒരു കൂട്ടുകൃഷി ഫാം തുടങ്ങി പക്ഷേ, അത് വിജയിച്ചില്ല. അവിടേയ്ക്ക്, തിരു-കൊച്ചിയിൽ നിന്ന്, ജലസേചന സൗകര്യമുള്ള 5 ഏക്കർ ഉൾപ്പെടെ 15 ഏക്കർ ഭൂമിയും മറ്റ് ആനുകൂല്യങ്ങളും വാഗ്ദാനം ചെയ്ത് കർഷകരെ കൊണ്ടുവന്ന് താമസിപ്പിച്ചതാണ്.സർക്കാർ തെരഞ്ഞെടുത്ത് അയച്ച അവർ മൂന്ന് കോളനികളിലായിരുന്നു. അവർ ഒട്ടേറെ പ്രതിസന്ധികളിലൂടെ കടന്നു പോകുന്നുവെന്നറിഞ്ഞാണ് എത്തിയത്. 

 

അവസാന ബസ് സ്റ്റോപ്പിൽ നിന്ന് ഗ്രാമത്തിലേക്ക് വിജനമായ ഒരു കാട്ടുവഴി മാത്രം .അതിലൂടെ അഞ്ച് കിലോമീറ്റർ നടന്ന് ,അവശനായാണ് എത്തിയത്. സർക്കാർ നിയമിച്ച ഒരു ലെയ്സൺ ഓഫീസർ അവിടെയുണ്ടായിരുന്നു. അദ്ദേഹവുമായി സാസാരിച്ചിരുന്നപ്പോൾ പുറത്ത് ജനങ്ങൾ തടിച്ചു കൂടി .രാത്രി വരെ അവരുടെ പരാതികൾ കേട്ടു. അവിടെ എത്തിയവരിൽ ചിലർ കർഷകരായിരുന്നില്ല. 15 ഏക്കർ കിട്ടുമെന്ന പ്രലോഭനത്തിൽ ഇറങ്ങിത്തിരിച്ചവരായിരുന്നു കുറച്ചു പേർ. കാളകളെ വാങ്ങാൻ നൽകിയ 750 രൂപയിൽ ഒരു ഭാഗം മറ്റാവശ്യങ്ങൾക്ക് ചെലവാക്കി, ആരോഗ്യമില്ലാത്തവയെ വാങ്ങിയവരും അക്കൂട്ടത്തിലുണ്ടായിരുന്നു .ഗോതമ്പ് കൃഷി ചെയ്യാനാണ് സർക്കാർ പറഞ്ഞിരുന്നതെങ്കിലും നെൽകൃഷി ചെയ്ത് നഷ്ടം വന്നവരെയും കണ്ടു. തദ്ദേശീയരുമായി ചന്തകളിൽ വച്ച് വഴക്കുണ്ടാകുന്നതും അവിടെ പതിവായിരുന്നു. മറ്റുള്ളവരിൽ നിന്ന് അകന്ന്, കോളനികളിൽ ജീവിക്കുന്നതും ആശാസ്യമായി തോന്നിയില്ല.                                     

                                                                                                   കൊച്ചുമകൾ  സാവേരി ബാലാജിയ്ക്കൊപ്പം.

ഇക്കാര്യങ്ങളെക്കുറിച്ച് സമഗ്രമായ ഒരു റിപ്പോർട്ട് എഴുതി. അത് സ്വന്തം പത്രത്തിന് നൽകിയിട്ട് പ്രയോജനമുണ്ടെന്ന് തോന്നിയില്ല. സുൽത്താൻപൂരിൽ ദ ഹിന്ദു വിതരണം ചെയ്തിരുന്നില്ല. കേരളത്തിലും ഡൽഹിയിലും മദ്ധ്യപ്രദേശിലും കിട്ടുന്ന പത്രം ദ ഇന്ത്യൻ എക്സ്പ്രസായിരുന്നു . അതിൽ കൊടുത്താലോ? ന്യൂസ് എഡിറ്റർ സി.ആർ കൃഷ്ണസ്വാമിയോട് ചോദിച്ചു. എഡിറ്റർക്ക് ഒരു കത്ത് നൽകാൻ അദ്ദേഹം പറഞ്ഞു. അതിന് അനുമതി കിട്ടി. അവർ ഞായറാഴ്ചപ്പതിപ്പായ 'സൺഡേ സ്റ്റാൻഡേർഡി'ൽ അത് പ്രസിദ്ധീകരിച്ചു.

 

അതിന് ഫലമുണ്ടായി. മലയാളി കർഷകരുടെ കോളനികൾ പഞ്ചായത്തുകളിൽ ലയിപ്പിച്ചു. പിൽക്കാലത്ത് അവിടെ ഒരു മലയാളി, പഞ്ചായത്തിൻ്റെ പ്രസിഡൻ്റുണ്ടായി. ഭൂമി മാത്രം മോഹിച്ച് വന്ന കുടിയേറ്റക്കാരിൽ ചിലർ നാട്ടിലേക്ക് മടങ്ങിപ്പോയി. സുൽത്താൻപൂരിലെ ഗ്രാമത്തിൽ ഒരു സർക്കാർ ഹയർ സെക്കണ്ടറി സ്കൂളുണ്ടായി. നാട്ടുകാരുമായി ഇഴുകിച്ചേർന്നാണ് എല്ലാവരും കഴിയുന്നത് എന്നറിഞ്ഞതിൽ ചാരിതാർത്ഥ്യമുണ്ട്.

 

കോളേജ് പഠനകാലത്ത് വിദ്യാർത്ഥി ഫെഡറേഷൻ പ്രവർത്തകനായിരുന്ന ബി. ആർ. പി ഭാസ്കർ പത്രപ്രവർത്തനകാലത്തിൻ്റെ ആരംഭം മുതൽ മനുഷ്യാവകാശ പ്രവർത്തനങ്ങളിലും സജീവമായി വ്യാപൃതനായി. അതിനു വഴിവച്ചത്, സിങ്കപ്പൂരിലേക്ക് തിരിച്ചുപോകുന്നതിനുള്ള ക്ലിയറൻസ് സർട്ടിഫിക്കേറ്റ് വാങ്ങാൻ ചെന്നൈയിലെ പ്രൊട്ടക്ടർ ഓഫ് എമിഗ്രൻ്റ്സ് ഓഫീസിൽ എത്തിയ തിരുവനന്തപുരത്തുകാരനായ യുവാവ്, അവിടെ പൊലീസ് കസ്റ്റഡിയിൽ മരിച്ച സംഭവമായിരുന്നു. എ.പി. കുഞ്ഞിക്കണ്ണൻ എന്ന സോഷ്യലിസ്റ്റ് പാർട്ടി പ്രവർത്തകനാണ് അക്കാര്യം അറിയിച്ചത്. അക്കാലത്ത് സിങ്കപ്പൂർ, മലേഷ്യ രാജ്യങ്ങളിലേക്ക് ആയിരക്കണക്കിന് മലയാളികൾ ജോലി തേടിപ്പോയിരുന്നു. എന്നാൽ കുടിയേറ്റം അവസാനിപ്പിക്കുന്നതിന് തീരുമാനിച്ച രണ്ട് സർക്കാരും അതിന് ഒരു അന്തിമ തീയതി പ്രഖ്യാപിച്ചു. അതോടെ, എമിഗ്രേഷൻ ക്ലിയറൻസ് രേഖകൾക്കായി ഓഫീസിൽ വലിയ തിരക്കായി. അവർ 500 രൂപ വരെ (അക്കാലത്തെ വലിയ തുക) കൈക്കൂലി വാങ്ങി.

അവധി കഴിഞ്ഞ് തിരിച്ചു പോകാൻ ക്ലിയറൻസ് രേഖയ്ക്കായി ഓഫീസിലെത്തിയ യുവാവ് അസ്വസ്ഥനായി, ബഹളമുണ്ടാക്കി. അയാളെ ജീവനക്കാർ മർദ്ദിച്ച്, പൊലീസിൽ ഏല്പിച്ചു. ആ രാത്രിയിൽ അയാൾ കസ്റ്റഡിയിൽ മരിച്ചു. എന്നാൽ, ആർസനിക് വിഷം അകത്തു ചെന്നതാണ് മരണകാരണമെന്നായിരുന്നു പോസ്റ്റ് മാർട്ടം റിപ്പോർട്ടിലുണ്ടായിരുന്നത്."ഞാനും കുഞ്ഞിക്കണ്ണനും കൂടി അന്ന് ഓഫീസിലുണ്ടായിരുന്നവരുമായി സംസാരിച്ച്, നിജസ്ഥിതി മനസ്സിലാക്കി. പക്ഷേ, ദ ഹിന്ദുവിന് ഈ കസ്റ്റഡി മരണത്തിൽ ഒരു താല്പര്യവുമുണ്ടായില്ല. അതെത്തുടർന്ന് ,ഈ മനുഷ്യാവകാശ പ്രശ്നം ഞങ്ങൾ ഏറ്റെടുത്തു".

 

മരിച്ചയാളുടെ ബന്ധുക്കൾക്ക് കത്തെഴുതി. അയാളുടെ ഭാര്യയും മകനും ചെന്നൈയിലെത്തി. കുഞ്ഞിക്കണ്ണൻ ഏർപ്പാടാക്കിത്തന്ന അഭിഭാഷകൻ മുഖേന പ്രൊട്ടക്ടർ ഓഫ് എമിഗ്രൻ്റ്സിന് എതിരെ മജിസ്ട്രേട്ട് കോടതിയിൽ കേസ് ഫയൽ ചെയ്തു. പക്ഷേ, അത് വിജയിച്ചില്ല. എതിർഭാഗത്തിനു വേണ്ടി പ്രമുഖ ക്രിമിനൽ വക്കീൽ വി.എൽ എത്തിതരാജായിരുന്നു വാദിച്ചത്. 

 

ഈ പ്രശ്നം തമിഴ്നാട്ടിലെയും കേരളത്തിലെയും എം.പി മാരുടെ ശ്രദ്ധയിൽ പെടുത്തി. പ്രധാനമന്ത്രി നെഹ്റു ഇടപെട്ടു. അന്വേഷണം നടത്തി, ഉദ്യോഗസ്ഥനെതിരെ നടപടിയെടുത്തു.

ഈ ഇടപെടൽ കാരണം, ബി. ആർ.പി തമിഴ്നാട് പൊലീസിൻ്റെ നോട്ടപ്പുള്ളിയായി. അവർ ആവശ്യപ്പെട്ടതനുസരിച്ച് തൻ്റെ പശ്ചാത്തലം കേരളത്തിലെ വിജിലൻസ് അന്വേഷിച്ചതായി , അവധിക്ക് നാട്ടിൽ വന്നപ്പോൾ, പൊലീസിൽ ജോലി ചെയ്യുന്ന മുൻ സഹപാഠി പറഞ്ഞ് ബി.ആർ പി അറിഞ്ഞു. തിരികെ ഓഫീസിലെത്തിയപ്പോൾ, ന്യൂസ് എഡിറ്റർ സി.ആർ കൃഷ്ണമൂർത്തി കാൻ്റീനിൽ വിളിച്ചു കൊണ്ടുപോയി ആ രഹസ്യം പറഞ്ഞു: താൻ കമ്മ്യൂണിസ്റ്റ് പാർട്ടിക്ക് വേണ്ടി കാശ് പിരിച്ച് രസീത് ഒപ്പിട്ട് നൽകുന്നുണ്ടെന്ന ഇൻ്റലിലൻസ് റിപ്പോർട്ട് അച്ഛന് (അന്നത്തെ മുഖ്യമന്ത്രി സി. രാജഗോപാലാചാരി) കിട്ടിയിട്ടുണ്ട്. 'ഞാനത് വിശ്വസിക്കുന്നില്ല. അയാൾ കമ്യൂണിസ്റ്റാണെങ്കിൽ കസ്തൂരി ശ്രീനിവാസൻ അയാൾക്ക് ജോലി കൊടുക്കില്ലായിരുന്നു' എന്ന് അദ്ദേഹം ഫയലിൽ എഴുതിയത്രേ.

 

അന്ന് വലിയ ബിസിനസ് സ്ഥാപനങ്ങളായിരുന്നു , ദ ഹിന്ദു ഒഴികെയുള്ള ഇംഗ്ലീഷ് പത്രങ്ങളുടെ ഉടമസ്ഥർ. അവർക്കാർക്കും പത്രപ്രവർത്തകർ ട്രേഡ് യൂണിയനുണ്ടാക്കി സംഘടിക്കുന്നത് ഇഷ്ടമായില്ല. പക്ഷേ, സംഘനയുണ്ടായി. ബി.ആർ.പിയും അതിൽ സജീവമായി.മദ്രാസ് യൂണിയൻ ഓഫ് വർക്കിങ്ങ് ജേർണ്ണലിസ്റ്റ് സംഘടനയായിരുന്നു തമിഴ്നാട്ടിലുണ്ടായിരുന്നത്. ദേശീയ തലത്തിലുള്ള ഐ.എഫ്.ഡബ്ലിയു.ജെയുടെ ഘടകമായിരുന്നു അത്. ബി.ആർ.പിയുടെ സഹപ്രവർത്തകനും സീനിയർ സബ് എഡിറ്റുമായിരുന്ന ആർ.നരസിംഹനായിരുന്നു അതിൻ്റെ ജനറൽ സെക്രട്ടറി. മാനേജ്മെൻ്റിന് അത് ഇഷ്ടക്കേടുണ്ടാക്കി. ചെറിയ തെറ്റുകൾക്കുപോലും മെമ്മോ നൽകി, അവർ അവസാനം അദ്ദേഹത്തെ പുറത്താക്കി. ഇത് പ്രതികാര നടപടിയാണെന്നും ലേബർ കോടതിയെ സമീപിക്കണമെന്നും ആവശ്യപ്പെട്ട് ജീവനക്കാർ യൂണിയന് കത്തയച്ചു. ഇതറിഞ്ഞ് പത്രാധിപർ കസ്തൂരി ശ്രീനിവാസൻ സബ്ബ് എഡിറ്റർമാരുടെ ഒരു യോഗം വിളിച്ചു. എല്ലാവരെയും താൻ മക്കളെപ്പോലെയാണ് കരുതുന്നതെന്നും ആർക്കുമെതിരെ പ്രതികാരനടപടി എടുക്കില്ലെന്നും പറഞ്ഞു. 

 

യോഗത്തിനു ശേഷം, കമ്പനി വക്കീൽ തയ്യാറാക്കിയ ഒരു കത്തിൽ ഒപ്പിടാൻ എല്ലാവരോടും പറഞ്ഞു. തെറ്റിദ്ധാരണ മൂലമാണ് യൂണിയന് നൽകിയ കത്തിൽ ഒപ്പിട്ടതെന്നും ആർ. നരസിംഹത്തിൻ്റെ പുറത്താക്കൽ പ്രതികാര നടപടിയായി കരുതുന്നില്ലെന്നുമായിരുന്നു കത്ത്."ഞാനൊഴികെ എല്ലാവരും ആ കത്തിൽ ഒപ്പിട്ടു".

 

തൊഴിലാളി യൂണിയൻ്റെ കേസ് വാദിച്ചിരുന്നത് പ്രഗത്ഭരായ രണ്ട് രാഷ്ട്രീയ നേതാക്കളായിരുന്നു -ആർ. വെങ്കിട്ടരാമനും (പിന്നീട് രാഷ്ട്രപതി) മോഹൻ കുമാര മംഗലവും ." പത്രാധിപർ വിളിച്ചു കൂട്ടിയ യോഗത്തെക്കുറിച്ച് കോടതിയിലെത്തി മൊഴി നൽകാമോ എന്ന് കുമാരമംഗലം എന്നോട് ചോദിച്ചു. ഞാൻ സമ്മതിച്ചു. സമ്മർദ്ദം കാരണമാണ് മറ്റ് അംഗങ്ങൾ പിൻവാങ്ങിയതെന്ന യൂണിയൻ്റെ വാദം കോടതി അംഗീകരിച്ചു". അദ്ദേഹത്തെ തിരിച്ചെടുക്കാൻ കോടതി പിന്നീട് ഉത്തരവിട്ടു. 'അതിനെതിരെ മാനേജ്മെൻ്റ് ഹൈക്കോടതിയിൽ പോയെങ്കിലും വിജയിച്ചില്ല. അദ്ദേഹത്തിന് നഷ്ടപരിഹാരം നൽകി, കോടതിക്ക് പുറത്ത് വച്ച് കേസ് അവസാനം ഒത്തുതീരുകയായിരുന്നു.

 

''ദ ഹിന്ദുവിലെ അന്തരീക്ഷം അസ്വാസ്ഥ്യജനകമായി''.അക്കാലത്താണ് ഫിലിപ്പീൻസ് സർവകലാശാല നൽകുന്ന രമൺ മഗ്സസെ സ്കോളർഷിപ്പിന് കേന്ദ്ര വിദ്യാഭ്യാസ മന്ത്രാലയം അപേക്ഷ ക്ഷണിച്ചത്. ഡൽഹിയിൽ നടത്തിയ അഭിമുഖത്തിൽ ബി.ആർ.പി ഭാസ്കർ തെരഞ്ഞെടുക്കപ്പെട്ടു .ഒന്നര വർഷം അവധി വേണം.''വേതനമില്ലാഅവധിക്ക് ഞാൻ അപേക്ഷ നൽകി. അർഹതപ്പെട്ട അവധി എടുക്കാം. അതിനു ശേഷം ഡ്യൂട്ടിക്ക് ചേരണം എന്ന് മാനേജ്മെൻ്റ് അറിയിച്ചു. അതിനാൽ രാജിവച്ചു".

1958-ൽ ഫിലിപ്പീൻസിലേക്ക് പോകും മുൻപ് പത്രാധിപർ കസ്തൂരി ശ്രീനിവാസനെ കണ്ടു;"തിരിച്ചു വരുമ്പോൾ ഇവിടേക്കു തന്നെ വരണം". ഉപരിപഠനത്തിന് പോയതിന് പിന്നാലെ പത്രാധിപർ അന്തരിച്ചതായി അറിഞ്ഞു.

 

ഇംഗ്ലീഷിലും താരതമ്യസാഹിത്യത്തിലും ബിരുദാനന്തരബിരുദം നേടി ഇന്ത്യയിലേക്ക് മടങ്ങിയ ബി.ആർ. പി ഭാസ്കർ , 1959-ൽ ഡൽഹിയിലെ ദ സ്റ്റേറ്റ്സ്മാൻ പത്രത്തിൽ സഹപത്രാധിപരായി ചേർന്നു. ബ്രിട്ടീഷുകാർ സ്ഥാപിച്ച പത്രത്തിൻ്റെ പ്രധാന സ്ഥാനങ്ങളിലെല്ലാം അപ്പോഴും വിദേശികളായിരുന്നു. മനുഷ്യദുരിതങ്ങളെക്കുറിച്ചുള്ള വാർത്തകൾക്ക് സ്വാതന്ത്ര്യ പൂർവകാലത്ത് ഏറെ പ്രാധാന്യം നൽകിയ പത്രമാണത്. മുപ്പതു ലക്ഷത്തിലധികം പേർ മരിച്ചു വീണ ബംഗാൾ ക്ഷാമത്തിൻ്റെ ഭീകരത ലോകത്തെ അറിയിച്ചത് ദ സ്റ്റേറ്റ്സ്മാനായിരുന്നു.

 

അക്കാലത്ത് ബി.ആർ.പിക്ക് യാദൃച്ഛികമായി വലിയൊരു വാർത്ത വീണു കിട്ടി.1961 ഡിസംബറിൽ ഒരു സുഹൃത്തിനെ യാത്രയയയ്ക്കാൻ ന്യൂഡൽഹി റെയിൽവേ സ്റ്റേഷനിൽ പോയ ബി. ആർ.പി ഒരു പ്ലാറ്റ്ഫോമിലെ ട്രെയിനിലേക്ക് സൈനികരുടെ പടക്കോപ്പുകളും സാധനസാമഗ്രികളും ധൃതഗതിയിൽ കയറ്റുന്നത് കണ്ടു. പുറത്ത് സൈനിക വാഹനങ്ങൾ . ഒരു അന്വേഷണം നടത്തി നോക്കി. മഹാരാഷ്ട്ര - ഗോവ അതിർത്തിക്കടുത്തുള്ള ഒരു സ്റ്റേഷനിലേക്ക് കൊണ്ടുപോകാനായിരുന്നു അവ. പോർച്ചുഗീസ് ആധിപത്യത്തിനെതിരെ ഗോവയിൽ നടന്നു വന്ന വിമോചന സമരം ശക്തി പ്രാപിച്ച സമയം.ഇന്ത്യൻ സൈന്യം ഇടപെടണമെന്ന ആവശ്യമുയർന്നിരുന്നു. ആ സാഹചര്യത്തിൽ ,അടുത്തു തന്നെ സൈനിക നീക്കമുണ്ടാകുമെന്ന് അദ്ദേഹത്തിന് മനസിലായി. 

 

സൈനിക നീക്കങ്ങളെക്കുറിച്ച് വാർത്തകൾ കൊടുക്കാൻ പാടില്ലെന്നാണ് നിയമം . ദ സ്റ്റേറ്റ്സ്മാനിൽ എന്തായാലും ആ വാർത്ത കൊടുക്കാനാവില്ല. പക്ഷേ, ആ വാർത്ത വന്നു. അത് കേരളകൗമുദിയിലായിരുന്നു. എം.എസ് മണിയായിരുന്നു അന്ന് ഡൽഹി ലേഖകൻ. അദ്ദേഹത്തെ കാര്യങ്ങൾ അറിയിച്ചു. സൈനിക സാമഗ്രികളുമായി ട്രെയിൻ പുറപ്പെട്ടുവെന്ന കാര്യം ഒഴിവാക്കി, ഗോവയിൽ സൈനിക ഇടപെടൽ ഉടൻ ഉണ്ടായേക്കും എന്നാണ് റിപ്പോർട്ടിൽ എഴുതിയത്."ഇത് കണ്ട പത്രാധിപർ കെ. സുകുമാരൻ ,അതിൻ്റെ ഉറവിടം മണിയോട് അന്വേഷിച്ച ശേഷമാണ് കൊടുത്തത്".

ആദ്യം കോൺഗ്രസിലും പിന്നെ സി.പി.ഐയിലും പ്രവർത്തിച്ച അരുണ അസഫ് അലി ചെയർമാനും എടത്തട്ട നാരായണൻ പത്രാധിപരുമായിട്ടാണ് 1963ൽ പേട്രിയട്ട് ആരംഭിച്ചത്. ഇടതുപക്ഷ സഹയാത്രികർ ബി.ആർ. പി ഭാസ്കറെയും ക്ഷണിച്ചു. ഭാസ്കറിനൊപ്പം മെയിൻസ്ട്രീം വാരികയുടെ എഡിറ്ററും സ്നേഹിതനനുമായിരുന്ന സി.എൻ ചിത്തരഞ്ജൻ, ലിങ്കിലെ അസിസ്റ്റൻ്റ് എഡിറ്റർമാരായിരുന്ന വി.വിശ്വനാഥ് , ഒ .പി സംഗാൾ എന്നിവരും അവിടെ അസിസ്റ്റൻ്റ് എഡിറ്റർമാരായി ചേർന്നു.സ്റ്റേറ്റ്സ്മാനിലെ സഹപ്രവർത്തകൻ എം. വേണുഗോപാൽ റാവു ന്യൂസ് എഡിറ്ററായി."ഒരു പുതിയ പത്രം രൂപപ്പെടുത്തുക എന്ന വലിയ വെല്ലുവിളിയാണ് ഞങ്ങൾ ഏറ്റെടുത്തത്. സാധാരണക്കാർക്ക് വാങ്ങാവുന്ന വിലയായ 10 പൈസക്ക് 8 പേജ് ഇംഗ്ലീഷ് ദിനപത്രം".

സാധാരണക്കാർക്കു പോലും മനസിലാക്കാവുന്ന ലളിതമായ ഭാഷയാണ് ഉപയോഗിച്ചത്. അതിനായി സ്റ്റൈൽ ബുക്ക് തയ്യാറാക്കി. ഉള്ളടക്കം പ്രതിഫലിക്കുന്ന ജീവനുള്ള തലക്കട്ടുകൾ പത്രാധിപർക്കുള്ള കത്തുകൾ കോളത്തിന് വരെ നൽകി. രൂപകല്പനയിൽ വൈദഗ്ദ്ധ്യമേറെയുള്ള വേണുഗോപാൽ റാവു തയ്യാറാക്കിയ പത്രം മറ്റുള്ളവയിൽ നിന്ന് വേറിട്ടു നിന്നു.

 

1964 മെയ് 27 ന് പ്രധാനമന്ത്രി ജവഹർലാൽ നെഹ്രു അന്തരിച്ചു. അത് അപ്രതീക്ഷിതമായിരുന്നില്ല. ആറു മാസം മുൻപ് ഭുവനേശ്വറിൽ നടന്ന കോൺഗ്രസ് സമ്മേളനത്തിൽ പങ്കെടുക്കവേ അദ്ദേഹത്തിന് ഹൃദയാഘാതം ഉണ്ടായി. സമ്മേളനം റിപ്പോർട്ട് ചെയ്ത് തിരിച്ചെത്തിയ രാഷ്ട്രീയ ലേഖകൻ ഗിരീഷ് മാത്തൂരിനോട് നെഹ്രുവിൻ്റെ ജീവചരിത്രക്കുറിപ്പ് എഴുതാൻ ആവശ്യപ്പെട്ടു. പല പ്രാവശ്യം ഓർമ്മപ്പെടുത്തിയിട്ടും അദ്ദേഹം അത് ചെയ്തില്ല.'നെഹ്റുവിനെക്കുറിച്ച് പാസ്റ്റ് ടെൻസിൽ എഴുതാൻ എനിക്ക് കഴിയില്ല' എന്നാണ് അദ്ദേഹം പറഞ്ഞത്.'നിങ്ങൾ പ്രസൻ്റ് ടെൻസിൽ എഴുതിയാൽ മതി. ആവശ്യം വരുമ്പോൾ മാറ്റാം' എന്ന് അദ്ദേഹത്തോട് പറഞ്ഞെങ്കിലും അത് എഴുതിയില്ല.

"മരണവാർത്തയറിഞ്ഞയുടൻ ലൈബ്രറിയിൽ തിരഞ്ഞെങ്കിലും ഒന്നും കിട്ടിയില്ല. അന്ന് ഡെസ്കിലുണ്ടായിരുന്നവർ ഉൾപ്പെടെ 22 പേർ നെഹ്രുവിനെക്കുറിച്ച് എഴുതണമെന്ന് തീരുമാനിച്ചു. പക്ഷേ,ജോലിത്തിരക്ക് കാരണം എനിക്കും വിശ്വനാഥിനും എഴുതാൻ കഴിഞ്ഞില്ല. മറ്റെല്ലാ ലേഖനങ്ങളും ചിത്രങ്ങളും ചേർത്തു. അപ്പോഴാണ്,നെഹ്രു തന്നെ തൻ്റെ ശവകുടീരത്തിൽ എഴുതിവയ്ക്കേണ്ട സ്മാരകലേഖം (എപ്പറ്റാഫ്) പറഞ്ഞിട്ടുള്ളത് മൈക്കൽ ബ്രച്ചേറിൻ്റെ ' നെഹ്രു :എ പൊളിറ്റിക്കൽ ബയോഗ്രഫി' എന്ന പുസ്തകത്തിലുണ്ടെന്ന് അറിയുന്നത്.

 

അത് ഒന്നാം പേജിൽ,പത്രത്തിൻ്റെ പേരിന് മീത നൽകി. മുഖ്യവാർത്തയ്ക്കൊപ്പം, ദേശീയ ദുഃഖാചരണത്തിൻ്റെ ഭാഗമായി ലോക്സഭാമന്ദിരത്തിൽ ദേശീയ പതാക പകുതി താഴ്ത്തിക്കെട്ടിയതിൻ്റെ ചിത്രവും നൽകി. ദുഃഖാചരണം തീരും വരെ ഈ ചിത്രം ഒന്നാം പേജിൽ തുടർന്നു.

ഒരു ശില്പശാലയിൽ പങ്കെടുക്കാൻ ഡൽഹിയിലെത്തിയ പ്രശസ്തനായ ഒരു ബ്രിട്ടീഷ് പത്രലേഖകൻ അന്ന് ഇറങ്ങിയ തലസ്ഥാനത്തെ പത്രങ്ങളെല്ലാം കണ്ട ശേഷം, ഏറ്റവും നല്ല പത്രം പേട്രിയട്ടാണെന്ന് പറഞ്ഞത് ബി.ആർ. പി ഭാസ്കർ ഇന്നുമോർക്കുന്നു. 

 

"പത്രാധിപർ എടത്തട്ട നാരായണൻ കടുത്ത നെഹ്രു പക്ഷക്കാരനായിരുന്നു.അദ്ദേഹത്തിന് പത്രപ്രവർത്തനവും രാഷ്ട്രീയവും ഒന്നായിരുന്നു". വലതുപക്ഷക്കാരെന്ന് അദ്ദേഹം വിശ്വസിക്കുന്നവർക്കെതിരായി എഡിറ്റോറിയലിലൂടെ അദ്ദേഹം നിരന്തരം ആഞ്ഞടിച്ചു. 'ഫിഫ്ത്ത് കോളം ' എന്ന തൻ്റെ ഹാസ്യപംക്തിയിലൂടെ അവരെ വിമർശിച്ചു. തനിക്ക് ഇഷ്ടമല്ലാത്ത തെരഞ്ഞെടുപ്പ് ഫലങ്ങൾക്ക് രാഷ്ട്രീയ പക്ഷപാതം പ്രകടിപ്പിക്കുന്ന തലക്കെട്ടുകൾ വരെ നൽകി. പലപ്പോഴും എതിരഭിപ്രായം പ്രകടിപ്പിച്ചുവെങ്കിലും, അദ്ദേഹം വഴങ്ങിയില്ല.

ഏറെക്കാലം തുടർന്ന ആത്മസംഘർഷങ്ങൾക്കിടയിൽ ബി.ആർ.പി പേട്രിയട്ട് വിട്ടു. പിന്നെ, നീണ്ട 18 വർഷം (1964-1984) യു .എൻ.ഐയിൽ പ്രവർത്തിച്ചു .അക്കാലത്ത് ഇന്ത്യയുടെയും ലോകത്തിൻ്റെയും ചരിത്രം മാറ്റിക്കുറിച്ച എത്രയെത്ര സംഭവങ്ങൾക്ക് സാക്ഷ്യം വഹിച്ചു !

 

അന്ന് കുൽദീപ് നയ്യാരായിരുന്നു ജനറൽ മാനേജർ. ഡെസ്കിലിരുന്ന് മടുത്തിരുന്നതിനാൽ ബ്യൂറോ ചോദിച്ചു വാങ്ങി.അങ്ങനെ, അഹമ്മദാബാദ് ലേഖകനായി. ഉപപ്രധാനമന്ത്രി മൊറാർജി ദേശായി, മുഖ്യമന്ത്രി ഹിതേന്ദ്ര ദേശായി തുടങ്ങിയ രാഷ്ട്രീയ നേതാക്കളുമായി അടുത്ത ബന്ധം പുലർത്തി .

ഭാഭ അറ്റോമിക് റിസർച്ച് സെൻ്റർ ചെയർമാനും ഇന്ത്യൻ നാഷണൽ കമ്മറ്റി ഫോർ സ്പേസ് റിസർച്ചിൻ്റെ ചെയർമാനുമായിരുന്ന വിക്രം സാരാഭായിയെ പരിചയപ്പെട്ടത് അവിസ്മരണീയമായ അനുഭവങ്ങളിലൊന്ന് .. അദ്ദേഹത്തിൻ്റെ കുടുംബത്തിലുള്ളവർ തുണി വ്യവസായികളായിരുന്നു. മറ്റ് ധാരാളം വ്യവസായങ്ങളും അവർക്കുണ്ടായിരുന്നു. അവരിൽ നിന്നൊക്കെ ധാരാളം വാർത്തകൾ കിട്ടിയിരുന്നു.

 

"പക്ഷേ, ശാസ്ത്രമേഖലയിൽ നിന്നുള്ള എക്സ്ക്ലൂസീവ് വാർത്ത തേടി ഞാൻ അഹമ്മദാബാദിലെ ഫിസിക്കൽ റിസർച്ച് ലാബിൽ പോയി. അതിൻ്റെ ചുമതല വഹിച്ചിരുന്ന ശാസ്ത്രജ്ഞൻ കെ. ആർ സ്വാമിനാഥൻ ചോദിച്ചു: നിങ്ങൾ ഡോ. വിക്രം സാരാഭായിയുടെ അനുവാദം വാങ്ങിയിട്ടുണ്ടോ?"

ബി.ആർ.പി,സാരാഭായിയെ ചെന്നു കണ്ടു. തങ്ങൾ പറയുന്ന കാര്യങ്ങൾ തെറ്റായി റിപ്പോർട്ട് ചെയ്ത ദുരനുഭവങ്ങളുണ്ടെന്ന് അദ്ദേഹം പറഞ്ഞു. തനിക്ക് ശാസ്ത്രകാര്യങ്ങൾ അല്പസ്വല്പം അറിയാം. റിപ്പോർട്ട് എഴുതും മുൻപ് അധികൃതരെ കാണിക്കുകയും ചെയ്യാം എന്ന് അദ്ദേഹത്തോട് പറഞ്ഞു. " രണ്ട് ദിവസത്തിന് ശേഷം ,സാരാഭായി ഫിസിക്കൽ റിസർച്ച് ലാബിൻ്റെ ഡയറക്ടർക്കും എല്ലാ വകുപ്പ് തലവൻമാർക്കുമയച്ച ഒരു സർക്കുലറിൻ്റെ കോപ്പി എനിക്ക് കിട്ടി. അവരുടെ പ്രവർത്തനങ്ങളെക്കുറിച്ച് എന്നോട് സംസാരിക്കാം എന്ന് നിർദ്ദേശിച്ചുകൊണ്ടുള്ളതായിരുന്നു അത്".

കുറേ ദിവസം കഴിഞ്ഞ് സാരാഭായി അദ്ദേഹത്തെ വിളിച്ചു വരുത്തി."ഇന്ത്യയുടെ ഭാവി ബഹിരാകാര ദൗത്യങ്ങളെക്കുറിച്ച് അദ്ദേഹം വിശദമായി സംസാരിക്കാൻ തുടങ്ങി. ഞാൻ പേന എടുത്തിരുന്നില്ല. വലിയ സ്കൂപ്പാണ് ഞാൻ കേൾക്കുന്നത്. അതിൻ്റെ ആവേശത്തിലായിരുന്നു, ഞാൻ . പക്ഷേ, അത് അധികം നീണ്ടുനിന്നില്ല. അദ്ദേഹം പറഞ്ഞു : ഇതെക്കുറിച്ചൊന്നും ഇപ്പോൾ എഴുതരുത്. എല്ലാം ആശയതലത്തിൽ മാത്രമാണിപ്പോൾ ". സർക്കാരിന് സമർപ്പിക്കാൻ തയ്യാറാക്കിയ റിപ്പോർട്ടിൻ്റെ സാരാംശമായിരുന്നു സാരാഭായി പറഞ്ഞത് അദ്ദേഹത്തിൻ്റെ സ്വപ്ന പദ്ധതികൾ . ഫിസിക്കൽ ലാബിലെ ചില ശാസ്ത്രജ്ഞരും ആ റിപ്പോർട്ട് തയ്യാറാക്കിയ സംഘത്തിലുണ്ട്. അവർ തന്നാലും കൊടുക്കരുതെന്നും സാരാഭായി നിർദ്ദേശിച്ചു.

 

വീട്ടിൽ മടങ്ങിയെത്തിയ ഉടൻ ഓർമ്മയിൽ നിന്ന് അതിൻ്റെ ഒരു ചെറിയ റിപ്പോർട്ട് എഴുതിയ ശേഷം സാരാഭായിയെ വിളിച്ച് വായിച്ചു കേൾപ്പിച്ചു. നമ്മുടെ ബഹിരാകാശ ദൗത്യങ്ങളെക്കുറിച്ച് ജനങ്ങൾക്ക് ഒരു ധാരണ കൊടുക്കുന്നത് ഉചിതമല്ലേ എന്ന് അദ്ദേഹത്തോട് ചോദിച്ചു." നിങ്ങൾ എഴുതിയിരിക്കുന്നതിൽ തെറ്റൊന്നുമില്ലെങ്കിലും അത് കൊടുക്കരുത്. ഉപഗ്രഹ വിക്ഷേപണത്തിന് നമുക്ക് ഇപ്പോൾ കഴിവില്ല. അതിന് ആര് സഹായിക്കുമെന്ന് നിശ്ചയവുമില്ല. അതെക്കുറിച്ച് ഇപ്പോൾ മുൻകൂട്ടി വാർത്ത നൽകുന്നത്, പ്രശ്നങ്ങളുണ്ടാക്കാൻ ശത്രുക്കൾക്ക് അവസരമാരുക്കും".അങ്ങനെ, ആ സ്കൂപ്പ് പ്രസിദ്ധീകരിക്കപ്പെട്ടില്ല.

 

യു.എൻ.ഐയിൽ വലിയ രാഷ്ട്രീയ റിപ്പോർട്ടുകൾ വരുന്ന കാലമായിരുന്നു അത്. കൽദീപ് നയ്യാർ തന്നെ പ്രധാന വാർത്തകൾ റിപ്പോർട്ട് ചെയ്തു. താഷ്ക്കൻ്റിൽ പാകിസ്ഥാൻ പ്രധാനമന്ത്രി അയൂബ് ഖാനുമായി സമാധാന ഉടമ്പടി ഒപ്പുവച്ച് ഉറങ്ങാൻ കിടന്ന പ്രധാനമന്ത്രി ലാൽ ബഹാദൂർ ശാസ്ത്രി മരിച്ചു (ജന.11, 1966). നയ്യാർ അവിടെ നിന്ന് ഡൽഹി ഡെസ്കിലേക്ക് വിളിച്ച് ,ആ ദുരന്തവാർത്ത അറിയിച്ചു -Lal Bahadur Shastri is dead. ഫോണെടുത്ത സബ് എഡിറ്റർ എസ്.എൽ ഭീംഗ്രെ അത് വിശ്വസിച്ചില്ല .നയ്യാർ തമാശ പറയുന്നുവെന്നാണ് അദ്ദേഹം കരുതിയത്.അവസാനം, പഞ്ചാബിയിൽ നാടൻ തെറി പറഞ്ഞപ്പോൾ മാത്രമാണ് വാർത്തയുടെ ഗൗരവം അദ്ദേഹത്തിന് ബോദ്ധ്യമായത്!

കുൾദീപ് നയ്യാർ ധാരാളം വികസന പദ്ധതികൾ തയ്യാറാക്കി.പക്ഷേ, അവയ്ക്ക് വേണ്ടത്ര പണം പത്രങ്ങൾ നൽകിയല്ല. അതോടെ അദ്ദേഹം രാജിവച്ചു.പകരം ജനറൽ മാനേജരായി പി.ഐ. ബി യിൽ നിന്ന് സി.ജി മിർചന്ദാനി വന്നു. അദ്ദേഹം ആവശ്യപ്പെട്ടതനുസരിച്ച്, ബി.ആർ.പി ഡൽഹി സെൻട്രൽ ഡെസ്കിലേക്ക് വന്നു.വാർത്താസിരാകേന്ദ്രമായ അവിടെ ന്യൂസ് എഡിറ്ററായി. കെ.പി.കെ കുട്ടിയായിരുന്നു ഡെപ്യൂട്ടി ന്യൂസ് എഡിറ്റർ.പി.ടി.ഐ യിൽ നിന്നെത്തിയ വി.പി രാമചന്ദ്രനായിരുന്നു ബ്യൂറോ ചീഫ്.

 

അസോസിയേറ്റഡ് പ്രസിൻ്റെ വാർത്തകൾ യു.എൻ. ഐയിലൂടെയായിരുന്നു വിതരണം ചെയ്തിരുന്നത്. പക്ഷേ, മിക്കവാറും പത്രങ്ങൾ വിദേശ വാർത്തകൾ കാര്യമായി കൊടുത്തിരുന്നില്ല. ദിവസം 18 മണിക്കൂറും യു. എൻ.ഐയുടെ ടെലിപ്രിൻ്ററുകൾ അവ അയയ്ക്കാനായി വിനിയോഗിച്ചിരുന്നതിനാൽ സ്വന്തം വാർത്തകൾ വൈകുക പതിവായിരുന്നു. എ.പി വാർത്തകൾ പകുതിയായി വെട്ടിക്കുറച്ച് ,സ്വന്തം വാർത്തകൾ കൊടുക്കാൻ തുടങ്ങി. പ്രത്യേക ഫീച്ചറുകളും യു. എൻ.ഐ തയ്യാറാക്കിത്തുടങ്ങി. ജാലിയൻവാലാബാഗ് കൂട്ടക്കുരുതിയുടെ അൻപതാം വാർഷികം പ്രമാണിച്ച്, ആ ദുരന്തത്തിന് സാക്ഷ്യം വഹിച്ച രണ്ടു പേരെ കണ്ടെത്തി ,അഭിമുഖം നടത്തി.ഐ.എൻ .എ യുടെ ഇംഫാൽ ഉപരോധത്തിൻ്റെയും റോയൽ നാവിക കലാപത്തിൻ്റെയും വാർഷികം പ്രമാണിച്ച് തയ്യാറാക്കിയ ഫീച്ചുറുകളും ഒട്ടേറെ പത്രങ്ങൾ പ്രസിദ്ധീകരിച്ചു.

 

1969 ജൂലൈ 21. മനുഷ്യൻ ആദ്യമായി ചന്ദ്രനിൽ കാലുകുത്തിയ ദിവസം .ആ ചരിത്ര സംഭവത്തെക്കുറിച്ച് ബി.ആർ. പി ഭാസ്കർ എഴുതിയ റിപ്പോർട്ടായിരുന്നു ഇന്ത്യയിലെ പല പത്രങ്ങളും അന്ന് കൊടുത്തത്.

 

1969 ജൂലൈ 16 ന് അമേരിക്കയിലെ കേപ്പ് കെന്നഡി ബഹിരാകാശ കേന്ദ്രത്തിൽ നിന്ന് അമരിക്കയുടെ അപ്പോളോ 11 ബഹിരാകാശ പേടകം മൂന്ന് യാത്രികരുമായി ചന്ദ്രനിലേക്ക് കുതിച്ചുയർന്നു. അത് റിപ്പോർട്ട് ചെയ്യാൻ ലോകമെമ്പാടു നിന്നും പത്രപ്രവർത്തകർ മുന്നോട്ട് വന്നു. കേപ്പ് കെന്നഡി മീഡിയ സെൻറിൽ എല്ലാവർക്കും സ്ഥലമില്ലാതിരുന്നതിനാൽ നാസ പാരീസിൽ മറ്റൊരു കേന്ദ്രം തുറന്നു. ഡെപ്യൂട്ടി ജനറൽ മാനേജർ ടി.വി രാജഗോപാലിനെയാന്ന് യു. എൻ . ഐ അയച്ചത്. ബഹിരാകാശ യാത്രികരുടെ ഓരോ ദിവസത്തെയും പ്രവർത്തനങ്ങൾ എ.പി മുൻകൂട്ടി നൽകിയിരുന്നു. 'ബഹിരാകാശത്തിൽ ഇന്ന്' എന്ന തലക്കെട്ടിൽ പത്രങ്ങൾ അവ നൽകി. ജൂലൈ 20 ഞായറാഴ്ച നാസ നൽകിയ വിവരമനുസരിച്ച് , നീൽ ആംസ്ട്രോങ്ങും എഡ്വിൻ ആൾഡ്രിനും അന്നു രാത്രി 1.44 ന് ചന്ദ്രനിൽ കാലുകുത്തും.

 

" അതിൻ്റെ വാർത്ത എത്താൻ പിന്നെയും സമയമെടുക്കും 'അപ്പോഴേക്കും ഇന്ത്യയിലെ പത്രങ്ങളുടെ പ്രഭാത പതിപ്പുകൾ അച്ചടിക്കാൻ തുടങ്ങിയിട്ടുണ്ടാകും. അതിനാൽ,മുൻകൂട്ടി റിപ്പോർട്ട് തയ്യാറാക്കാൻ ഞാൻ തീരുമാനിച്ചു. നിശ്ചിത സമയത്തിന് ശേഷം മാത്രം പ്രസിദ്ധീകരിക്കുന്ന റിപ്പോർട്ട് - എംബാർഗോഡ് (embargoed) സ്റ്റോറി".

 

ജനറൽ മാനേജറുടെ സെക്രട്ടറിയുടെ മുറിയിലെ ടൈപ്പ് റൈറ്ററിൽ ബി.ആർ.പി ആ റിപ്പോർട്ട് അടിച്ച്, കെ. പി. കെ കുട്ടിക്ക് എഡിറ്റ് ചെയ്യാൻ നൽകി. സാങ്കേതികമായ വിശദാംശങ്ങൾ ഒഴിവാക്കി ചരിത്രപരമായ പ്രാധാന്യത്തിൽ ഊന്നിയുള്ള റിപ്പോർട്ടായിരുന്നു അത്.പാരിസ് ഡേറ്റ് ലൈനിൽ ടി. പി രാജഗോപാലിൻ്റെ ബൈലൈനോടെ ഈ തലക്കെട്ട്:Man is on the Moon '.

വാർത്തയിങ്ങനെ:Reaching for the limitless expanse of space,man today arrived on the Moon,earth's closest neighbour and satellite,which has beckoned him nightly throughout the ages...

-ഈ റിപ്പോർട്ട് അയച്ച് ,അര മണിക്കൂറിനകം എ.പി യുടെ റിപ്പോർട്ട് വന്നു. അതും അയച്ചു."കേപ്പ് കെന്നഡി ഡേറ്റ് ലൈനുള്ള ആ വാർത്തയാകും മിക്ക പത്രങ്ങളും കൊടുക്കുക എന്നാണ് ഞാൻ വിചാരിച്ചത്. പക്ഷേ, അതുണ്ടായില്ല".

 

മിക്ക പത്രങ്ങളും എടുത്തത് ബി.ആർ.പി എഴുതിയ റിപ്പോർട്ട് . പല പത്രങ്ങളും അതിൻ്റെ ഡേറ്റ് ലൈൻ ചന്ദ്രൻ ( Moon)എന്നാക്കി !

 

യു.എൻ. ഐ ജീവിതം ,പക്ഷേ, പെട്ടെന്ന് സംഘർഷ നിർഭരമായി .മിർചന്ദാനിയുമായി അഭിപ്രായവ്യത്യാസങ്ങൾ ഉടലെടുത്തു. യു. എൻ .ഐ യ്ക്ക് ഇക്കാലത്ത് വലിയ വളർച്ചയുണ്ടായി. വരുമാനവും കൂടി. തുടർന്ന് ബി.ആർ. പി ഉൾപ്പെടെയുള്ള സീനിയർ പത്രപ്രവർത്തകർക്കും വകുപ്പ് തലവൻമാർക്കും ശമ്പള വർദ്ധനവ് നൽകി. പക്ഷേ, ജൂനിയറായ സബ് എഡിറ്റർമാർ, റിപ്പോർട്ടർമാർ, നോൺ - ജേർണ്ണലിസ്റ്റുകൾ തുടങ്ങിയവർക്ക് ഒന്നും കൊടുത്തില്ല. യു. എൻ ഐ എംപ്ലോയിസ് യൂണിയൻ ഇവരുടെ പ്രശ്നം ഉന്നയിച്ചപ്പോൾ ബി.ആർ.പി അവർക്കൊപ്പം നിന്നു. ശമ്പളപ്രശ്നത്തിൽ ഭിന്നത രൂക്ഷമായി. ഈ പ്രശ്നം പാർലമെൻ്റിൽ ഉന്നയിക്കപ്പെട്ടപ്പോൾ, എല്ലാവർക്കും ഒരു വർഷം മുൻപ് വേജ് ബോർഡ് പ്രകാരമുള്ള ശമ്പള വർദ്ധനവ് നൽകിയതായി മന്ത്രി ഐ.കെ ഗുജ്റാൾ അറിയിച്ചു. മിർചന്ദാനി തന്നെ തെറ്റിദ്ധരിപ്പിച്ചുവെന്ന് മനസിലാക്കിയ ഗുജ്റാൾ ,അദ്ദേഹത്തെ വിളിച്ച്, ക്ഷോഭിച്ചു. അതിന് വഴിയൊരുക്കിയത് ബി.ആർ.പിയാണെന്ന് വിശ്വസിച്ച്, മിർചന്ദാനി അദ്ദേഹത്തെ മുംബൈയ്ക്ക് സ്ഥലം മാറ്റി. ആറു മാസത്തിന് ശേഷം, കുറ്റപത്രമോ അന്വേഷണമോ ഒന്നുമില്ലാതെ പുറത്താക്കി. 'മാനേജ്മെൻ്റിന് വിശ്വാസം നഷ്ടപ്പെട്ടു' എന്നാണ് മിർചന്ദാനി കേന്ദ്ര തൊഴിൽ മന്ത്രിയോട് പറഞ്ഞത്. അത് റദ്ദാക്കണമെന്നാവശ്യപ്പെട്ടുകൊണ്ട് ഡൽഹിയിലും മുംബൈയിലും ജീവനക്കാർ 72 മണിക്കൂർ നീണ്ട സമരം നടത്തി. കോൺഗ്രസ് നേതാക്കൾ ഇക്കാര്യത്തിൽ ഇടപെടാൻ പ്രധാനമന്ത്രി ഇന്ദിരാഗാന്ധിയോട് അഭ്യർത്ഥിച്ചു. തൊഴിലാളി സംഘടനകളും പിന്തുണ പ്രഖ്യാപിച്ചു. യു.എൻ.ഐ ബോർഡിൽ പ്രതിനിധികളുള്ള പത്രങ്ങളുടെ പത്രക്കടലാസ് നീക്കം മുടങ്ങുമെന്ന ഘട്ടത്തിൽ മാനേജ്മെൻ്റ് പത്രപ്രവർത്തക ഫെഡറേഷൻ സെക്രട്ടറിയുമായി ഒത്തുതീർപ്പ് ചർച്ച നടത്തി, ബി.ആർ.പിയെ തിരിച്ചെടുത്തു. " എനിക്ക് ഇഷ്ടമുള്ള മറ്റൊരു ബ്യൂറോയിൽ പോകണമെന്നതായിരുന്നു വ്യവസ്ഥ. ഞാൻ ശ്രീനഗർ തെരഞ്ഞെടുത്തു."

 

അങ്ങനെ, 1973 ൽ കാഷ്മീരിലെത്തി.ഇന്ത്യയുടെ ചരിത്രത്തിലെ നിർണ്ണായകമായ സംഭവപരമ്പരകൾക്ക് ബി.ആർ.പി ഭാസ്കർ അങ്ങനെ,സാക്ഷിയായ മറ്റൊരു കാലം .അന്ന് സയ്യദ് മിർ കാസിമായിരുന്നു മുഖ്യമന്ത്രി . പ്രധാനമന്ത്രിസ്ഥാനത്ത് നിന്ന് പുറത്താക്കപ്പെട്ട ശേഷം ദീർഘകാലം വീട്ടുതടങ്കലിലായിരുന്ന ഷെയ്ഖ് അബ്ദുല്ല, 1975 ൽ തിരിച്ചെത്തി.അദ്ദേഹവുമായി ഒരു മണിക്കൂറിലധികം സംസാരിച്ച്, ഒരു റിപ്പോർട്ട് തയ്യാറാക്കി.''ഹിന്ദു,മുസ്ലിം വർഗ്ഗീയവാദങ്ങൾ ശത്രുതയിലല്ല. ഒന്ന് വളരുമ്പോൾ മറ്റൊന്നും വളരും",അദ്ദേഹം പറഞ്ഞു.

 

                                                                                              മല്ലിക സാരാഭായി ബി.ആർ.പി ഭാസ്കറിനെ 

                                                                                              സന്ദർശിക്കാനെത്തിയപ്പോൾ.

 വിരമിച്ച ഉദ്യോഗസ്ഥർ ഉൾപ്പെടെയുള്ളവർ മുൻകൈ എടുത്ത് ജമ്മു - കാഷ്മീരിൽ സമാധാന ശ്രമങ്ങൾക്ക് തുടക്കമിട്ടു. കേന്ദ്ര സർക്കാർ ഷെയ്ഖ് അബ്ദുല്ലയുമായി ഒത്തുതീർപ്പിലെത്തണമെന്ന് അവർ ആവശ്യപ്പെട്ടു.'The Testament of Sheik Abdullah'(ഷെയ്ഖ് അബ്ദുള്ളയുടെ സത്യസാക്ഷ്യം) എന്നൊരു പുസ്തകം അവർ പ്രസിദ്ധീകരിച്ചു .അതിൽ ആ അഭിമുഖവും ഉൾപ്പെടുത്തി. തുടർന്ന്, പ്രധാനമന്ത്രിയുടെ ഉപദേശകരിലൊരാളായ ജി.പാർത്ഥസാരഥി ഷെയ്ഖ് അബ്ദുല്ലയുടെ അടുത്ത സഹപ്രവർത്തകനായ മിർസ അഫ്സൽ ബെയ്ഗുമായി ശ്രീനഗറിൽ രഹസ്യ ചർച്ചകൾ നടത്തി. അത് അസാധാരണമായ ഒരു രാഷ്ട്രീയ ഒത്തുതീർപ്പിൽ എത്തി.

 

നിയമസഭയിൽ ഭൂരിപക്ഷമുണ്ടായിരുന്ന കോൺഗ്രസ്, ഷെയ്ഖ് അബ്ദുല്ലയെ പുതിയ മന്ത്രിസഭ ഉണ്ടാക്കാൻ ക്ഷണിച്ചു.1975 ഫെബ്രുവരി 25 ന് ഷെയ്ഖ് അബ്ദുല്ല വീണ്ടും സംസ്ഥാന മുഖ്യമന്ത്രിയായി. സത്യപ്രതിജ്ഞാ ദിവസം ജമ്മു-കാഷ്മീരിൽ ഹർത്താൽ ആചരിക്കാൻ പാകിസ്ഥാൻ പ്രസിഡൻ്റ് ഇസഡ്.എ ഭൂട്ടോ ആഹ്വാനം ചെയ്തു. ദേശീയതാല്പര്യം മുൻനിർത്തി മാത്രമേ ആ വാർത്ത റിപ്പോർട്ട് ചെയ്യാവൂ എന്ന് ചീഫ് സെക്രട്ടറി ദേശീയ മാദ്ധ്യമങ്ങളുടെ പ്രതിനിധികളെ ഉപദേശിച്ചിരുന്നു.

ഹർത്താൽ സാമാന്യം നല്ല പ്രതികരണം ഉണ്ടാക്കിയെങ്കിലും അത് പരാജയപ്പെട്ടുവെന്ന സംസ്ഥാന സർക്കാരിൻ്റെ പത്രക്കുറിപ്പായിരുന്നു ദേശീയ മാദ്ധ്യമങ്ങൾ നൽകിയത്."മന:സാക്ഷിക്കുത്ത് ഇല്ലാതിരിക്കാനായി, അവിടവിടെ കടകൾ അടഞ്ഞുകിടന്നുവെന്നും കൊടുത്തു".

 

എന്നാൽ, സംസ്ഥാനം ഹർത്താലാചരിച്ചെന്ന് ശ്രീനഗറിലെ ഉർദു പത്രങ്ങൾ റിപ്പോർട്ട ചെയ്തു.

"ദേശീയ മാദ്ധ്യമങ്ങളിലെ വാർത്തയുടെ പശ്ചാത്തലത്തിൽ, കാഷ്മീരിലെ റിപ്പോർട്ടർമാർ അനുഭവിക്കുന്ന പ്രശ്നങ്ങളെക്കുറിച്ച് ഞാനൊരു പഠനം നടത്തി. ഇന്ത്യൻ ആൻ്റ് ഈസ്റ്റേൺ ന്യൂസ്പേപ്പർ സൊസൈറ്റി പ്രസിദ്ധീകരണമായ ദി ഇന്ത്യൻ പ്രസ് അത് കവർ സ്റ്റോറിയായി പ്രസിദ്ധീകരിച്ചു.Hello National Interest,Bye-bye professional Conscience' എന്നായിരുന്നു അവർ നൽകിയ തലക്കെട്ട്".

ഏതാനും ദിവസങ്ങൾക്ക് ശേഷം, ശീതകാല തലസ്ഥാനമായ ജമ്മുവിൽ നിന്ന് ശ്രീനഗറിലെത്തിയ ഷെയ്ഖ് അബ്ദുല്ലയ്ക്ക് ആവേശഭരിതമായ സ്വീകരണമാണ് ലഭിച്ചത്. പക്ഷേ, ദേശീയ മാധ്യമങ്ങളിൽ വന്ന ,ഹർത്താലിനെക്കുറിച്ചുള്ള വാർത്തയോട് അദ്ദേഹം പ്രതികരിച്ചതിങ്ങനെ: കള്ളത്തരങ്ങൾക്ക് മേലാണോ നാം ഗാന്ധിജിയുടെ ഇന്ത്യ കെട്ടിപ്പൊക്കുന്നത്? 

 

"അടിയന്തിരാവസ്ഥാക്കാലം മുഴുവൻ ഞാൻ ജമ്മു-കാഷ്മീരിലായിരുന്നു. കഠിനമായ സെൻഷർഷിപ്പൊന്നും അവിടെ ഉണ്ടായിരുന്നില്ല. പേട്രിയട്ടിൻ്റെ സ്പെഷ്യൻ കറസ്പോണ്ടൻ്റ് മുഹമ്മദ് സയ്യിദ് മാലിക്കിനെ ഇൻഫർമേഷൻ ഡയറക്ടറായി നിയമിച്ചു. അദ്ദേഹമായിരുന്നു സംസ്ഥാനത്തെ ചീഫ് സെൻസർ ഓഫീസർ. യു.എൻ.ഐ വാർത്തകൾ നേരിട്ട് ഡൽഹി ഡസ്കിലേക്ക് അയച്ചിരുന്നതിനാൽ ശ്രീനഗറിൽ സെൻസർ ചെയ്യേണ്ടതില്ലായിരുന്നു".

 

1977 മാർച്ച് 23 . ശ്രീനഗറിലെ ഇൻഫർമേഷൻ ഡയറക്ടറുടെ ഓഫീസിൽ ബി.ആർ. പി ഭാസ്കർ അടക്കമുള്ള ദേശീയമാദ്ധ്യമങ്ങളുടെ പ്രതിനിധികൾ ലോക്സഭാ തെരഞ്ഞെടുപ്പ് ഫലം അറിയാൻ ഒത്തുകൂടി .ഇന്ദിരയും മകൻ സഞ്ജയ് ഗാന്ധിയും കോൺഗ്രസും ജനതാമുന്നേറ്റത്തിൽ തോറ്റമ്പിയ വാർത്ത വന്നു കൊണ്ടിരുന്നു. പിന്നാലെ രണ്ട് ഫ്ലാഷ് ന്യൂസും വന്നു;അടിയന്തിരാവസ്ഥ പിൻവലിച്ചിരിക്കുന്നു .സെൻസർഷിപ്പും പിൻവലിച്ചു.

 

" ഞാൻ ഇൻഫർമേഷൻ ഡയറക്ടർ സയ്യിദ് മാലികിൻ്റെയടുത്തേക്ക് നടന്ന് എൻ്റെ പ്രസ് കാർഡ് നീട്ടി,അത് പുതുക്കിത്തരണമെന്ന് പറഞ്ഞു. അദ്ദേഹം അത് വാങ്ങി നോക്കിയിട്ട് ചോദിച്ചു : ' കാലാവധി കഴിഞ്ഞിട്ട് രണ്ട് വർഷമായല്ലോ. ഇതുവരെ പുതുക്കാതിരുന്നതെന്ത്?'' അതിന് ഞാൻ ഉടൻ മറുപടി നൽകി:സെൻസർ ഓഫീസർ ഒപ്പിട്ട കാർഡുമായി നടക്കാൻ എനിക്ക് താല്പര്യമില്ലായിരുന്നു".

അടിയന്തിരാവസ്ഥയിൽ പുറത്തായ മിർചന്ദാനി യു.എൻ.ഐയിൽ തിരിച്ചെത്തിയ ശേഷം ശ്രീനഗർ സന്ദർശിച്ചു.ബി. ആർ.പിക്ക് ഇഷ്ടമുള്ള സ്ഥലത്തേക്ക് മാറ്റം കൊടുക്കാമെന്ന് വാഗ്ദാനം നൽകി. മാധ്യമ പ്രവർത്തനത്തിന് തുടക്കം കുറിച്ച ചെന്നൈയാണ് അദ്ദേഹം ആവശ്യപ്പെട്ടത്. നോർത്ത് ആർക്കോട്ട് ജില്ലയിൽ നക്സൽ വേട്ടയുടെ പേരിൽ നടക്കുന്ന ഭീകരമായ പൊലീസ് അടിച്ചമത്തലുകളെക്കുറിച്ച് ഇക്കാലത്ത് റിപ്പോർട്ടുകൾ എഴുതി.

 

അപ്പോൾ യു.എൻ.ഐയിൽ എത്തിയിട്ട് പതിനെട്ട് വർഷമായി . ഒരു മാറ്റം ആവശ്യമാണെന്ന് തോന്നി. പത്രത്തിലേക്ക് മടങ്ങാൻ തീരുമാനിച്ചു. ഡെക്കാൺ ഹെറാൾഡിൻ്റെ ഡെൽഹി ബ്യൂറോ ചീഫായ സുഹൃത്ത് എസ്.വിശ്വനാഥൻ, തന്നെ ആ പത്രത്തിലേക്ക് കൊണ്ടുവരണമെന്ന് മുൻപ് പല പ്രാവശ്യം പറഞ്ഞിരുന്നത് ഓർത്തു. അദ്ദേഹത്തെ വിളിച്ചു.അടുത്ത ദിവസം ബാംഗ്ലൂരിലെത്തി ഉടമസ്ഥനായ കെ.എൻ ഹരികുമാറിനെ കാണാൻ ആവശ്യപ്പെട്ടു .അവിടെ അസിസ്റ്റൻ്റ് എഡിറ്ററായി , അച്ചടി മാദ്ധ്യമരംഗത്തേയ്ക്ക് തിരിച്ചു വന്നു. എം.പി യശ്വന്ത് കുമാറായിരുന്നു എഡിറ്റർ.

 

പത്രത്തിൽ ദിവസവും മൂന്ന് എഡിറ്റോറിയലുകളുണ്ട്. ആഴ്ചയിൽ മൂന്ന് മുതൽ അഞ്ച് ദിവസം വരെ എഡിറ്റോറിയൽ എഴുതണം .മറ്റൊന്നും ചെയ്യാനില്ല. ഇന്ദിരാഗാന്ധി കൊല്ലപ്പെട്ട ദിവസം പത്രാധിപർ തന്നെ എഡിറ്റോറിയൽ എഴുതി. ഡെസ്കിൽ നിന്ന് ആരും ഒരു സഹായവും തേടിയില്ല. ചുമ്മാതിരിക്കുക അസഹനീയമായി .

 

"തകഴിക്ക് ജ്ഞാനപീഠം കിട്ടിയ ദിവസം അതെക്കുറിച്ചുള്ള എഡിറ്റോറിയൽ എഴുതാൻ പത്രാധിപർ എന്നോട് ആവശ്യപ്പെട്ടു. അന്നത്തെ മൂന്നാമത്തെ എഡിറ്റോറിയലായിരുന്നു അത്". തകഴിയുമായി മുൻപേ പരിചയമുണ്ടായിരുന്നു. അദ്ദേഹത്തിൻ്റെ 'ചെമ്മീൻ ' നോവലിനെക്കുറിച്ച് ദ ഹിന്ദുവിൽ വിശദമായ ഒരു റിവ്യൂ മുൻപ് എഴുതിയിരുന്നു. അവധിക്ക് നാട്ടിൽ പോയപ്പോൾ തകഴി ,ജ്ഞാനപീഠ പുരസ്ക്കാരം കിട്ടിയ 'കയർ' നോവൽ സമ്മാനിച്ചിരുന്നു . ഒരു തോർത്ത് മുണ്ടിൽ പൊതിഞ്ഞാണ് അദ്ദേഹം നോവൽ വീട്ടിൽ കൊണ്ടുവന്ന് തന്നത്."പുറത്ത് കാണിച്ചാൽ പലരും പുസ്തകം ചോദിക്കും" ,അദ്ദേഹം പറഞ്ഞു.

 

ബംഗളൂരിൽ വന്നപ്പോൾ, ബി.ആർ.പിയെ കണ്ട തകഴി, 'കയർ ' സിനിമയാക്കാൻ സഹായിക്കുമോ എന്ന് ചോദിച്ചു. ആ നോവലിൽ നിന്ന് പല സിനിമകൾക്ക് സാദ്ധ്യതയുണ്ടെന്ന് അദ്ദേഹത്തോട് പറഞ്ഞു. അപ്പോഴാണ്, ടെലിവിഷൻ പരമ്പരയുടെ സാദ്ധ്യതയെപ്പറ്റി ഓർമ്മ വന്നത്. അന്ന് ദൂരദർശൻ ദേശീയ ശൃംഖലയിൽ പരമ്പരകൾ വരുന്ന കാലമായിരുന്നു. 'ഗരം ഹവ ' സിനിമയിലൂടെ ശ്രദ്ധേയനായ എം.എസ് സത്യുവിനെ പരിചയമുണ്ടായിരുന്നു. കയർ ഹിന്ദി ടെലിവിഷൻ സീരിയലാക്കാൻ അദ്ദേഹം സമ്മതിച്ചു."നോവലിൻ്റെ ഹിന്ദിയിലോ ഇംഗ്ലീഷിലോ ഉള്ള പതിപ്പിറങ്ങിയിട്ടില്ല. അതിനാൽ ഭാസ്കർ ഒപ്പമുണ്ടെങ്കിൽ ഞാനിതു ചെയ്യാം".

 

ഇരുപത്തിയാറ് എപ്പിസോഡുകൾക്കായി ഇംഗ്ലീഷിൽ തയ്യാറാക്കി നൽകിയ തിരക്കഥയിൽ നിന്ന് സത്യുവിൻ്റെ ഭാര്യ ശ്യാമ സെയ്ദിയാണ് ഹിന്ദി തിരക്കഥ എഴുതിയത്. ആ പരമ്പര വലിയ ശ്രദ്ധ നേടി. കഴിഞ്ഞകാല കേരളീയ സമൂഹത്തിൽ ഒരു വിഭാഗം സ്ത്രീകൾ അനുഭവിച്ചിരുന്ന സ്വാതന്ത്ര്യം പലരെയും ആശ്ചര്യപ്പെടുത്തി.

 

ബി. ആർ.പി സീരിയൽ രംഗത്ത് തുടർന്നില്ല.''ദൂരദർശൻ അന്ന് വലിയ കൈക്കൂലിയുടെ കേന്ദ്രമായിരുന്നു. 'കയർ' പരമ്പരയുടെ പ്രൊപ്പോസൽ നൽകിയതായി അറിഞ്ഞ് ഒരു പരസ്യ ഏജൻസിക്കാർ എന്നെ കണ്ടിരുന്നു. അപ്രൂവൽ കിട്ടാൻ ഒരു ലക്ഷം രൂപ അധികാരികൾക്ക് കൈമടക്ക് കൊടുക്കണമെന്നാണ് അവർ പറഞ്ഞത്".

 

1991ൽ ഡെക്കാൺ ഹെറാൾഡിൻ നിന്ന് റിട്ടയർ ചെയ്തതോടെ ബി.ആർ.പി യുടെ ഔദ്യോഗിക മാദ്ധ്യമപ്രവർത്തനം(hands - on) അവസാനിച്ചു.വിരമിച്ച ശേഷം നാട്ടിലേക്ക് മടങ്ങാനായിരുന്നു തീരുമാനം.സർവീസ് നീട്ടിത്തരാൻ മാനേജ്മെൻ്റ് തയ്യാറായിരുന്നുവെങ്കിലും അത് വേണ്ടെന്ന് വച്ചു. അപ്പോഴാണ് ഏഷ്യാനെറ്റ് , ചാനലിന്റെ വാർത്താവിഭാഗം രൂപപ്പെടുത്തുന്ന ചുമതല ഏല്ക്കാമോ എന്ന് സുഹൃത്തായ ശശികുമാർ ചോദിച്ചത്. ഇനി ഒരു സ്ഥാപനത്തിൻ്റെയും ഭാഗമാകില്ല;നാട്ടിലെത്തുമ്പോൾ വാർത്താവിഭാഗത്തിൻ്റെ ഉപദേശകനായി മൂന്നു മാസം പ്രവർത്തിക്കാം എന്ന് പറഞ്ഞു. അദ്ദേഹം നിർബന്ധിച്ചപ്പോൾ,വാർത്താവിഭാഗം ഉണ്ടാക്കി,അത് സ്വന്തം കാലിൽ നിൽക്കും വരെ ഒപ്പമുണ്ടാകും എന്ന് ഉറപ്പ് കൊടുത്തു.

 

പക്ഷേ,സാമ്പത്തിക പ്രതിസന്ധി മൂലം വാർത്തകൾ തുടങ്ങാൻ ഏറെ വൈകി. പക്ഷേ, ടീമിനെ തയ്യാറാക്കി.ടെലിവിഷനിൽ അനുഭവസമ്പത്തുള്ളവർ അന്ന് ദൂരദർശനിൽ മാത്രമേയുണ്ടായിരുന്നുള്ളൂ. പ്രതിഭകളാൽ സമ്പന്നമായിരുന്നു ആകാശവാണിയും ദൂരദർശനും.പക്ഷേ,സർക്കാർ സംവിധാനത്തിനുള്ളിൽ പ്രവർത്തിച്ചവരുടെ ആ അനുഭവസമ്പത്ത് പുതിയ ചാനലിന് ആവശ്യമാണോ എന്ന് സംശയമുണ്ടായി.അങ്ങനെ,പത്രങ്ങളിൽ പ്രവർത്തിച്ച അനുഭവസമ്പത്തുള്ളവരെയാണ് വാർത്താവിഭാഗത്തിലെ ഉന്നതസ്ഥാനങ്ങളിലേക്ക് തിരഞ്ഞെടുത്തത്.ഒട്ടേറെപ്പേർ അപേക്ഷിച്ചിരുന്നുവെങ്കിലും മിക്കവരും അച്ചടിയുടെ തടവുകാരായിരുന്നു.സിനിമയുമായി ബന്ധമുള്ളവർക്ക് വിഷ്വൽ സെൻസ് കൂടുതലുണ്ടായിരുന്നു.താഴെത്തട്ടിലേക്ക് പുതിയ ആൾക്കാരെ പരിശീലിപ്പിച്ചെടുത്തു.

 

ചിന്ത രവിയുടെ 'എൻ്റെ കേരള'മാണ് ആദ്യം തുടങ്ങിയ പരിപാടി.അദ്ദേഹത്തോടൊപ്പം സഞ്ചരിക്കാൻ ഒരാളെ ശശികുമാർ ആവശ്യപ്പെട്ടു. ആ പാനലിൽ നിന്ന് ഒരാളെ നൽകി. ടി.എൻ ഗോപകുമാറിൻ്റെ 'കണ്ണാടി' പരിപാടിയും തുടങ്ങി.

 

പിന്നീട് ‘പത്രവിശേഷം' പ്രതിവാര മാദ്ധ്യമ വിമർശന പരിപാടി ആരംഭിച്ചു. അതും ശശികുമാറിൻ്റെ ആശയമായിരുന്നു.സക്കറിയയുമായി ചേർന്നവതരിപ്പിക്കുമ്പോൾ,വിരുദ്ധാഭിപ്രായങ്ങൾ വന്നാൽ പന്തികേടാകില്ലേ എന്ന് ആദ്യം ആശങ്കയുണ്ടായിരുന്നു.പക്ഷേ,അതിൽ വൈരുദ്ധ്യമൊന്നുമുണ്ടായില്ല .”മാദ്ധ്യമമൂല്യങ്ങളുടെ ചട്ടക്കൂട്ടിൽ നിന്നുകൊണ്ടായിരുന്നു ഞാൻ വിമർശനം നടത്തിയിരുന്നത്; സക്കറിയയാകട്ടെ, സമൂഹത്തിന്റെ പക്ഷത്തു നിന്നും.അന്ന് ചില പത്രങ്ങൾ ഉയർത്തിക്കൊണ്ടുവന്ന ചാരക്കേസ്, വാർത്തകളുടെ വിശ്വാസ്യതയെ ചോദ്യം ചെയ്തു.എന്തു രേഖകളുടെയും വിവരങ്ങളുടെയും അടിസ്ഥാനത്തിലാണ് അവർ ഈ വാർത്തകൾ നൽകുന്നതെന്ന് ഞാൻ ചോദിച്ചു.ഐ.ബി,റോ എന്നീ കേന്ദ്ര ഏജൻസികൾ പറയുന്ന കാര്യങ്ങൾ ഒരു കോടതിയുടെ മുന്നിലും അവർക്ക് തെളിയിക്കേണ്ടതില്ല. അതിനാൽ അവയെ അടിസ്ഥാനമാക്കി വാർത്തകൾ നൽകുന്നതിനെ ഞാൻ വിമർശിച്ചു..”. പരാമർശ വിധേയമായ പത്രവാർത്തകളും പിന്നീട് അതിലെ സംഭവങ്ങളും വിഷ്വലുകളായി ആ പരിപാടിയിൽ കാണിച്ചു.

 

 തിരുവനന്തപുരം വിളപ്പിലിലെ എലൈവ് റെയിൻബോ

 കെയർ ഹോമിൽ ബി.ആർ.പി ഭാസ്കർ

‘അന്വേഷണം’ എന്ന പേരിൽ ഒരു ഫീച്ചർ പരിപാടിയും തുടങ്ങി.അതിൻ്റെ പ്രൊഡ്യൂസർ നീലനായിരുന്നു.കെ.ജയചന്ദ്രൻ്റെ ഒട്ടേറെ അന്വേഷണാത്മക റിപ്പോർട്ടുകൾ അതിൽ വന്നു.

1995 സെപ്തംബർ 30 നാണ് വാർത്തകൾ ആരംഭിച്ചത്. ഇന്ത്യയിൽ വാർത്തകളുടെ അപ്പ് ലിങ്കിങ്ങ് സംവിധാനം ഇല്ലാതിരുന്നതിനാൽ ഫിലിപ്പീൻസിലെ സുബിക് ബേ ദ്വീപിൽ നിന്നായിരുന്നു സംപ്രേഷണം. ആദ്യ വാർത്ത വായിച്ചത് പ്രമോദ് രാമൻ. അദ്ദേഹത്തോടൊപ്പം പ്രൊഡ്യൂസർ എൻ.കെ രവീന്ദ്രനും അവിടെയുണ്ടായിരുന്നു. ന്യൂസ് റൂം തിരുവനന്തപുരത്തായിരുന്നു. നീലനായിരുന്നു ചീഫ് ന്യൂസ് എഡിറ്റർ. ന്യൂസ് എഡിറ്ററായി കെ. രാജഗോപാലും ഡസ്കിലുണ്ടായിരുന്നു. റോയിട്ടർ നൽകിയിരുന്ന ദൃശ്യങ്ങൾ അതേ ദിവസം വാർത്തയിൽ ഉൾപ്പെടുത്തി. പക്ഷേ, കേരളത്തിൽ നിന്നുള്ള ദൃശ്യങ്ങൾ വിമാനത്തിൽ അയച്ചത് അവിടെയെത്താൻ മൂന്ന് -നാലു ദിവസ്സമെങ്കിലും എടുത്തിരുന്നു.

"രാഷ്ട്രീയ പ്രാധാന്യമുള്ള വാർത്തകൾക്ക് മുൻഗണന നൽകപ്പെട്ടു. പക്ഷേ, ബോദ്ധ്യപ്പെടാത്തതും വസ്തുതാവിരുദ്ധവുമായ ഒന്നും നൽകരുതെന്ന് ഞാൻ കർക്കശമായ നിർദ്ദേശം നൽകിയിരുന്നു".

അപ് ലിങ്കിങ്ങ് പിന്നീട് സിങ്കപ്പൂരിലേക്ക് മാറ്റി. അതാത് ദിവസത്തെ വാർത്തകൾ സമഗ്രമായി പ്രതിപാദിക്കുന്ന 'ന്യൂസ് അവർ' എന്ന പ്രതിദിന പരിപാടിയും തുടങ്ങി.

ശശികുമാർ ഏഷ്യാനെറ്റിൽ നിന്ന് പുറത്തുപോവുകയും മാനേജ്മെൻ്റിൽ മാറ്റം ഉണ്ടാവുകയും ചെയ്തതോടെയാണ് ബി.ആർ. പി 1999-ൽ അഡ്വൈസർ സ്ഥാനത്ത് നിന്ന് പിൻവാങ്ങുന്നത്.

"പുതിയ കാലത്തെ മാദ്ധ്യമ പ്രവർത്തനത്തിൽ പ്രകടമായ വ്യതിചലനങ്ങളുണ്ട്.വാർത്തകൾക്കായി ശേഖരിക്കുന്ന വിവരങ്ങൾ മാദ്ധ്യമപ്രവർത്തകർ അപഗ്രഥിക്കുകയോ വിലയിരുത്തുകയോ ചെയ്തു വേണം അവതരിപ്പിക്കാൻ. പക്ഷേ, അത് സംഭവിക്കുന്നില്ല.വസ്തുതകൾ പവിത്രമാണ്. അവ സത്യസന്ധമായി അവതരിപ്പിക്കുകയാണ് മൂല്യബോധമുള്ളവരുടെ കടമ".

ടെലിവിഷൻ വാർത്തകൾ എപ്പോഴും ഇന്ററാക്ടീവാകണം. അതിൽ പ്രേക്ഷകർക്ക് ഇടപെടാൻ അവസരം നൽകേണ്ടതുണ്ടെന്ന് ബി.ആർ.പി.ഭാസ്കർ പറഞ്ഞു. ചില പത്രങ്ങൾ എഡിറ്റോറിയൽ പേജിനു പുറമേ, അടുത്ത പേജും ഓപ്പൺ പേജാക്കി , അഭിപ്രായ പ്രകടനങ്ങൾക്കായി നീക്കിവച്ചത് അദ്ദേഹം ചൂണ്ടിക്കാണിച്ചു. എന്നാൽ, ജനങ്ങളുടെ അഭിപ്രായത്തെ ഭയപ്പെടുന്നവരുണ്ട്.

രാഷ്ട്രീയ വിഷയങ്ങൾ മാത്രമാണ് ഇന്ന് നിരന്തരം ചർച്ച ചെയ്യപ്പെട്ടുകൊണ്ടിരിക്കുന്നത്. ഭാഷ, സംസ്കാരം, സാമൂഹിക പ്രശ്നങ്ങൾ തുടങ്ങിയവയെല്ലാം അവഗണിക്കപ്പെടുന്നു. മാദ്ധ്യമങ്ങളെക്കുറിച്ചും അവയുടെ പ്രൊഫഷണലിസത്തെക്കുറിച്ചും ചർച്ച ചെയ്യാൻ ഇന്ന് വേദിയില്ല. "തങ്ങളുടെ വിശ്വാസ്യതയെ മാദ്ധ്യമങ്ങൾ പോലും ഗൗരവതരമായി കാണുന്നില്ല".

92-ൽ എത്തിനിൽക്കുമ്പോൾ,വാർദ്ധക്യത്തിൻ്റെ അവശതകൾ ബി.ആർ.പി ഭാസ്കറിനെ ഏറെ അലട്ടുന്നുണ്ട്. അഞ്ച് മാസം മുൻപ് കേരളത്തിൽ മടങ്ങിയെത്തിയ അദ്ദേഹം, തിരുവനന്തപുരത്തിനടുത്ത പുളിയറക്കോണത്ത് വൃദ്ധജനങ്ങൾ ഒന്നിച്ച് താമസിക്കുന്ന കെട്ടിട സമുച്ചയത്തിലാണ് ഇപ്പോൾ കഴിയുന്നത് .

2019-ൽ ഏക മകൾ ബിന്ദുവും കഴിഞ്ഞ വർഷം ഭാര്യ രമയും മരിച്ചു. കൊച്ചുമകൾ വിദേശത്താണ്. അടയാറിൽ മകളുടെ ഭർത്താവ് ബാലാജിക്കൊപ്പം ഏതാനും മാസം താമസിച്ച അദ്ദേഹം രാജാഅണൈപുരത്തെ ഒരു വൃദ്ധജന കേന്ദ്രത്തിലേക്ക് മാറിയിരുന്നു."നാട്ടിൽ തിരിച്ചെത്തിയതിൽ സന്തോഷമുണ്ട്. ഒരു സഹായിയുണ്ട് ഒപ്പം.തിരുവനന്തപുരത്ത് നടക്കുന്ന ചില പരിപാടികളിൽ ഞാൻ ശ്രോതാവായി പോകാറുണ്ട്".                                        

                                                                  ബി.ആർ.പി ഭാസ്കറിനൊപ്പം ഡി.പ്രദീപ് കുമാർ,കെ.ഹേമലത

 സംസ്ഥാന സർക്കാരിൻ്റെ സ്വദേശാഭിമാനി കേസരി പുരസ്ക്കാരം ഉൾപ്പെടെയുള്ള ഒട്ടേറെ മാദ്ധ്യമ പുരസ്കാരങ്ങൾ അദ്ദേഹം നേടിയിട്ടുണ്ട്. മാദ്ധ്യമരംഗത്തെ മനീഷിയായ ബി.ആർ.പി ഭാസ്കർ തൻ്റെ ഓർമ്മകൾ മലയാളത്തിലും ഇംഗ്ലീഷിലുമായി 'ന്യൂസ് റൂം' ,'The Changing Mediascape : Recollectons of a Life in Journalism' എന്നീ രണ്ട് പുസ്തകങ്ങളിലായി രേഖപ്പെടുത്തിയിട്ടുണ്ട്.

ക്ലബ്ബ് ഹൗസ് മീഡിയ റൂമിൽ ബി.ആർ.പി ഭാസ്കുറുമായി സംസാരിച്ചത് ഡി.പ്രദീപ് കുമാറും കെ. ഹേമലതയും.

ഈ പരിപാടിയുടെ ശബ്ദലേഖനം മീഡിയ വേവ്സ് യൂട്യൂബ് ചാനലിലുണ്ട്.https://youtu.be/Nx-p2c0Lj0s?si=bQAo83tEkjVzmD4S

ചരിത്രസാക്ഷികൾ - 31:എൻ ബാലകൃഷ്ണൻ,സി. പി വിജയകൃഷ്ണൻ

എൻ.ബാലകൃഷ്ണൻ

 

      ഈ പരിപാടിയുടെ ശബ്ദലേഖനം മീഡിയവേവ്സ് ചാനലിൽ

   https://youtu.be/Dsc07FBYF7I?si=T88a4OuMwlm2t5ZV 

                                                                                         സി.പി വിജയകൃഷ്ണൻ

ചരിത്രസാക്ഷികൾ-12 :ടി.സി. മാത്യു ,ബാലകൃഷ്ണൻ വി.ഇ

'ചരിത്രസാക്ഷികൾ' ക്ളബ് ഹൗസ്  പരമ്പരയുടെ പന്ത്രണ്ടാം ഭാഗത്തിൽ അതിഥികളായെത്തിയവർ: ടി.സി മാത്യു(മുൻ അസോ.എഡിറ്റർ,ദീപിക),വി.ഇ ബാലകൃഷ്ണൻ( മുൻ ന്യൂസ് എഡിറ്റർ,കേരള കൗമുദി).

                                                                  ടി.സി മാത്യു

വി.ഇ ബാലകൃഷ്ണൻ

 

 

 

 

 

 

 

 

ഈ പരിപാടിയുടെ ശബ്ദലേഖനം മീഡിയ വേവ്സ് ഛാനലിലുണ്ട്: https://youtu.be/5uL3r1qOXZA?si=1SXlAEcTRcPajZKg

ചരിത്രസാക്ഷികൾ-44:പി.രാജൻ,അമ്മു ജോസഫ്

 പ്രമുഖ മാദ്ധ്യമപ്രവർത്തകർ തങ്ങളുടെ അനുഭവങ്ങളും വീക്ഷണങ്ങളും നിരീക്ഷണങ്ങളും പങ്കുവക്കുന്ന 'ചരിത്ര സാക്ഷികൾ' പരമ്പര 44 ആം ഭാഗത്തോടെ 2023  ഒക്ടോബർ 28 ശനിയാഴ്ച രാത്രി സമാപിച്ചു.മുൻ അദ്ധ്യായങ്ങളിൽ പങ്കെടുത്ത മുതിർന്ന മാദ്ധ്യമപ്രവർത്തകരുടെ സാന്നിദ്ധ്യത്തിൽ, അതിഥികളായി പി.രാജനും (മുൻ അസിസ്റ്റന്റ് എഡിറ്റർ, മാതൃഭൂമി) അമ്മു ജോസഫും(മുൻ അസി. എഡിറ്റർ ;ഈവ്സ് വീക്ക്ലി, മുൻ മാഗസിൻ എഡിറ്റർ,ഇന്ത്യ പോസ്റ്റ്)പങ്കെടുത്തു .

 

രാഷ്ട്രീയ പ്രവർത്തനമാണ് തന്നെ മാദ്ധ്യമപ്രവർത്തകനാക്കിയതെന്ന് പി.രാജൻ പറഞ്ഞു.ഇന്റർ മീഡിയറ്റിന് പഠിക്കുമ്പോൾ തന്നെ കോൺഗ്രസ് രാഷ്ട്രീയത്തിൽ സജീവമായി. ലോ കോളേജിലും രാഷ്ട്രീയ പ്രവർത്തനം തുടർന്നു.

 

1958-ൽ ദേവികുളത്ത് നടന്ന ഉപതെരഞ്ഞെടുപ്പ് കവർ ചെയ്തതാണ് ആദ്യത്തെ മാദ്ധ്യമപ്രവർത്തനം . ദീനബന്ധു പത്രാധിപനായിരുന്ന പെരുന്ന കെ.എൻ നായരുടെ സഹായിയായി സാഹിത്യ പരിഷത്തിന്റെ കൊച്ചിയിൽ നടന്ന സമ്മേളനവും റിപ്പോർട്ട് ചെയ്തു.പ്രധാനമന്ത്രി ജവഹർലാൽ നെഹ്റു പങ്കെടുത്ത കണ്ണൂരിൽ നടന്ന കോൺഗ്രസ് സമ്മേളനം ഒരു ന്യൂസ് ഏജൻസിക്ക് വേണ്ടി റിപ്പോർട്ട് ചെയ്തു. 

 

എൽ.എൽ.ബി കഴിഞ്ഞ് വരുമാനം ഒന്നുമില്ലാതെ വീട്ടിൽ വെറുതെ ഇരുന്ന കാലത്താണ് കോൺഗ്രസ് നേതാവും മാതൃഭൂമിയുടെ റസിഡൻറ് എഡിറ്ററുമായിരുന്ന എ.പി ഉദയഭാനു തന്നെ മുഴുവൻ സമയ പത്രപ്രവർത്തകനാക്കിയതെന്ന് പി. രാജൻ അനുസ്മരിച്ചു .1962 ൽ മാതൃഭൂമിയിൽ റിപ്പോർട്ടറായി ചേർന്നു. കൊച്ചി യൂണിറ്റ് ആരംഭിക്കുന്നതിന്റെ മുന്നോടിയായി ബ്യൂറോ ശക്തിപ്പെടുത്തുന്നതിന്റെ ഭാഗമായായിരുന്നു അത്. അന്ന് എറണാകുളം ശിവക്ഷേത്രത്തിന് അടുത്തായിരുന്നു ന്യൂസ് ബ്യൂറോ.ചൊവ്വര പരമേശ്വരന്റെ മകനായ കെ.രാമചന്ദ്രനായിരുന്നു ചീഫ് . അദ്ദേഹത്തിന്റെ അസിസ്റ്റന്റായാണ് തുടക്കം. "അന്ന് കോളേജ് അദ്ധ്യാപകരെക്കാൾ കൂടുതൽ ശമ്പളം ലഭിച്ചിരുന്നു. ആറുമാസം കഴിഞ്ഞപ്പോൾ ശമ്പള വർദ്ധനവ് ഉണ്ടായി. പത്രപ്രവർത്തനം ഒരു ലഹരി പോലെ എന്നെ ആകർഷിച്ചു .അത് പുതിയ മേഖലകൾ തുറന്നു നൽകി".

 

അക്കാലത്ത് മാനേജ്മെൻറ് ഒരു കാര്യങ്ങളിലും ഇടപെടാറില്ലായിരുന്നു.പത്രപ്രവർത്തകർക്ക് വലിയ സ്വാതന്ത്ര്യം ഉണ്ടായിരുന്നു. വി.എം നായർ മാനേജിംഗ് ഡയറക്ടറും വി.പി രാമചന്ദ്രൻ പത്രാധിപരുമായ കാലത്താണ് മാതൃഭൂമിക്ക് ഒരു അടുക്കും ചിട്ടയും ഉണ്ടായത്.

 

കോടതി വാർത്തകൾ റിപ്പോർട്ട് ചെയ്യാനായി ലീഗൽ കറസ്പോണ്ടന്റായി നിയമിക്കപ്പെടുന്ന ഇന്ത്യയിലെ ആദ്യത്തെ പത്രപ്രവർത്തകനാണ്. അങ്ങനെ ഒരു തസ്തിക വേജ് ബോർഡിന്റെ ശുപാർശയിൽ ഉണ്ടായിരുന്നില്ല.അന്ന് ചീഫ് റിപ്പോർട്ടറായിരുന്നു. ലീഗൽ കറസ്പോൺഡന്റ് തസ്തിക അതിന് തുല്യമാക്കി പ്രമോഷൻ നൽകിയാൽ ഒഴിവ് വരുന്ന തസ്തികയിൽ മറ്റൊരാൾക്ക് കൂടി പ്രമോഷൻ ലഭിക്കുമെന്നതിനാൽ പത്രപ്രവർത്തക യൂണിയൻ അതിന് സമ്മതിച്ചു. 

 

കോടതി വാർത്തകൾ മാത്രമല്ല, പൊതു വാർത്തകളും റിപ്പോർട്ട് ചെയ്തു.എസ്.എസ്.എൽ.സി റാങ്ക് ജേതാക്കളുമായുള്ള അഭിമുഖങ്ങൾ ആദ്യമായി കൊടുത്തത് അക്കാലത്താണ് .പിന്നീട് എല്ലാ മാദ്ധ്യമങ്ങളും അത് പിൻതുടർന്നു.ജൂൺ മാസത്തിലെ സ്കൂൾ തുറക്കൽ വലിയ വാർത്തയാക്കിയതും അന്നാണ്.''പക്ഷേ ഇപ്പോൾ അവയെല്ലാം വലിയ ആചാരമായി മാറിയിരിക്കുന്നു".

 

അടിയന്തരാവസ്ഥക്കാലത്ത് ഇന്ത്യയിൽ ആദ്യം അറസ്റ്റ് ചെയ്യപ്പെട്ട പത്രപ്രവർത്തകനാണ്.1975 ജൂലൈ 21നായിരുന്നു അത്. രാജ്യ സുരക്ഷാനിയമപ്രകാരമായിരുന്നു അറസ്റ്റ് .കോൺഗ്രസ് പരിവർത്തനവാദികളുടെ മുഖപത്രമായ നിർണയത്തിൽ പ്രസിദ്ധീകരിക്കപ്പെട്ട 'ഇന്ദിരയുടെ അടിയന്തിരം' എന്ന ലഘുലേഖയായിരുന്നു അറസ്റ്റിനു കാരണം.

 

" ഓഫീസ് റെയ്ഡ് നടത്തിയ പൊലീസ് എന്റെ കൈപ്പടയിലുള്ള ലേഖനത്തിന്റെ കോപ്പി കണ്ടെടുത്തിരുന്നു". അടിയന്തരാവസ്ഥാ പ്രഖ്യാപനത്തിന്റെ മൂന്നാം ദിവസമായിരുന്നു ആ ലഘുലേഖ പുറത്തിറങ്ങിയത്.പാർട്ടിയുടെ മൂന്ന് ഭാരവാഹികളെയും കൂടി അറസ്റ്റ് ചെയ്തു.

 

"മട്ടാഞ്ചേരി സബ് ജയിലിലാണ് ഞങ്ങളെ തടവിൽ പാർപ്പിച്ചത്. ഒരു ദിവസം അവിടെ നിന്ന് ബസ്സിൽ കയറ്റി കോടതിയിൽ ഹാജരാക്കാൻ കൊണ്ടുവന്നു. സൗത്ത് റെയിൽവേ സ്റ്റേഷനിൽ നിന്ന് കോടതിയിലേക്ക് കൈവിലങ്ങ് വച്ചാണ് നടത്തിച്ചത്.വഴിക്ക് പരിചയക്കാരെ കണ്ടപ്പോൾ വിലങ്ങുവെച്ച കൈകൾ ഞാൻ ഉയർത്തിക്കാട്ടി.അന്ന് എലിസബത്ത് കുരുവിളയായിരുന്നു മജിസ്ട്രേട്ട്.ഏറെ കോളിളക്കം സൃഷ്ടിച്ച , എം.കെ.കെ നായർക്കെതിരായ അഴിമതിക്കേസിൽ അദ്ദേഹത്തെ കുറ്റവിമുക്തയാക്കിയ ധീരയായ മജിസ്ട്രേട്ടായിരുന്നു,അവർ".എന്തായാലും കോടതിയിൽ നിന്ന് തിരിച്ചു കൊണ്ടുപോകുമ്പോൾ വിലങ്ങ് വച്ചില്ല.രണ്ടുമാസമാണ് ജയിലിൽ കിടന്നത്.അടിയന്തരാവസ്ഥയിലെ നിയമഭേദഗതിയുടെ ചട്ടങ്ങൾ നിലവിൽ വന്നത് ജൂലൈ 31നായിരുന്നു. അതിന് മുമ്പ് നടന്ന അറസ്റ്റിന് നിയമസാധുതയില്ലെന്ന് , ജയിലിൽ വച്ച് വായിച്ച് മനസിലാക്കിയിരുന്നു. ആ വാദം അംഗീകരിച്ച കോടതി എല്ലാവരെയും രണ്ട് മാസത്തിനു ശേഷം വെറുതെ വിട്ടു. പൊലീസ് പറയുന്ന ആളുകളെ ശിക്ഷിക്കുന്ന കാലമായിരുന്നു അത്.

 

"പക്ഷേ, ഈ കേസിന്റെ പേരിൽ എന്നെ മാതൃഭൂമിയിൽ നിന്ന് പിരിച്ചുവിടാനുള്ള രാഷ്ട്രീയ നീക്കം ഉണ്ടായി.ഇതേക്കുറിച്ച് വി.കെ മാധവൻകുട്ടിയും ടി.വി.ആർ ഷേണായിയും ചേർന്ന് കലാകൗമുദിയിൽ എഴുതിയ ഒരു ലേഖന പരമ്പരയിൽ പറഞ്ഞിട്ടുണ്ട്. മാനേജിങ് ഡയറക്ടർ വി.എം നായരുടെ ശക്തമായ നിലപാട് കാരണമാണ് അത് സംഭവിക്കാതിരുന്നത്.അടിയന്തരാവസ്ഥയെ എതിർത്ത് ജയിലിൽ പോയതിൽ എനിക്ക് അഭിമാനമുണ്ട്".

 

എൽ.കെ അദ്വാനി പറഞ്ഞതുപോലെ, അടിയന്തരാവസ്ഥക്കാലത്ത്,കുനിയാൻ പറഞ്ഞപ്പോൾ പലരും മുട്ടിൽ ഇഴയുകയായിരുന്നു. പിൽക്കാലത്ത് പത്രപ്രവർത്തക വിദ്യാർത്ഥികളോട്, അടിയന്തരാവസ്ഥയെ എതിർത്തതിന് ഏതെങ്കിലും പത്രവർത്തകൻ ജയിലിൽ പോയിട്ടുണ്ടോ എന്ന് ചോദിച്ചപ്പോൾ,' ഇല്ല' എന്നായിരുന്നു മറുപടി."അത് ഞാനാണന്ന് പറഞ്ഞില്ല. അത് അറിയണമെന്ന താല്പര്യം പോലും അവർക്കുണ്ടായിരുന്നില്ല".

 

അടിയന്തരാവസ്ഥയ്ക്കു ശേഷം തിരുവനന്തപുരത്താണ് പ്രവർത്തിച്ചത്. വി.പി രാമചന്ദ്രൻ പത്രാധിപരായിരിക്കെ,ന്യൂസ് എഡിറ്റർ ടി. വേണുഗോപാലക്കുറുപ്പ് നിർദ്ദേശിച്ചതനുസരിച്ച്,

സ്പെഷ്യൽ സ്റ്റോറികളുടെ ചുമതല കിട്ടി. കേരളത്തിലെ ഭൂപരിഷ്കരണ നിയമം ഉണ്ടാക്കിയ അനന്തരഫലങ്ങളെക്കുറിച്ചുള്ള അന്വേഷണാത്മക പരമ്പര ചെയ്തത് തൃപ്തി നൽകിയ ഒന്നാണ്. ആ നിയമം പൊതുവിൽ പരാജയമായിരുന്നു എന്നായിരുന്നു കണ്ടെത്തിയത്. വരമ്പത്ത് നടക്കുന്ന മാനേജർമാരെ അത് മുതലാളിമാരാക്കി. മണ്ണിൽ പണിയെടുത്ത് ജീവിക്കുന്നവർക്ക് അതിന്റെ ഗുണമൊന്നും കിട്ടിയില്ല.കൃഷി ഭൂമി തുണ്ടം തുണ്ടമായി വിഭജിക്കപ്പെട്ടു; കാർഷികോല്പാദനം വർദ്ധിച്ചില്ല എന്നു തുടങ്ങിയ ആ പരമ്പരയിലെ കണ്ടെത്തലുകൾ ശരിയായിരുന്നുവെന്ന് പിന്നീട് നടന്ന പല പഠനങ്ങളും വ്യക്തമാക്കി.

 

സംസ്ഥാനത്തെ ജയിലുകളിലെ അവസ്ഥയെക്കുറിച്ച് എഴുതിയ പരമ്പരയാണ് മറ്റൊന്ന്. ഉത്തരേന്ത്യൻ സംസ്ഥാനങ്ങളിലെക്കാൾ മെച്ചപ്പെട്ടവയാണ് കേരളത്തിലെ ജയിലുകൾ എന്ന് മനസിലായി. അങ്ങനെ ജയിലർമാരുടെ ഒരു യോഗത്തിൽ പ്രസംഗിച്ചപ്പോൾ, ജയിൽ പരിഷ്കരണം സംബന്ധിച്ച് പഠിക്കുന്ന ജസ്റ്റിസ് പി. സുബ്രഹ്മണ്യൻ പോറ്റി പങ്കെടുക്കുന്ന യോഗത്തിലേക്കും സംസാരിക്കാൻ ക്ഷണം കിട്ടിയെങ്കിലും പോയില്ല.

 

എം.ഡി നാലപ്പാട് പത്രാധിപരായ കാലത്ത് തിരുവനന്തപുരത്ത് അസിസ്റ്റൻറ് എഡിറ്ററായിരുന്നു. "അദ്ദേഹം പത്രപ്രവർത്തകർക്ക് വലിയ സ്വാതന്ത്ര്യം നൽകി. ഏറെ കാലത്തിനു ശേഷം മാതൃഭൂമി,അഗ്രസീവ് ജേണലിസത്തിലൂടെ, വളർച്ചാനിരക്കിൽ മനോരമയ്ക്ക് മുന്നിലെത്തി".അക്കാലത്തെ അന്വേഷണാത്മക പരമ്പരകളുടെ മാർഗ്ഗ നിർദ്ദേശക ചുമതല വഹിച്ചു.ന്യൂസ് കോ ഓർഡിനേറ്റർ എൻ.എൻ.സത്യവ്രതനായിരുന്നു. യുവാക്കളായ പത്രപ്രവർത്തകർ അഴിമതികൾക്കെതിരെ ധാരാളം റിപ്പോർട്ടുകൾ എഴുതി. "അന്ന് പത്രാധിപർക്കുള്ള കത്തുകളുടെ ചുമതലയും എനിക്കായിരുന്നു. വിമാനത്താവളങ്ങളിൽ നടക്കുന്ന അഴിമതികളെക്കുറിച്ചും കള്ളക്കടത്തിനെക്കുറിച്ചും വായനക്കാർ പരാതിപ്പെട്ടിരുന്നു. ഇതെക്കുറിച്ച് അന്വേഷിക്കാൻ ജി.ശേഖരൻ നായരെ മാലിദ്വീപിലേക്ക് അയച്ചത് അന്നായിരുന്നു". അതിനെക്കുറിച്ചെഴുതിയ പരമ്പരയ്ക്ക് ഗൾഫ് മലയാളികൾക്കിടയിൽ വലിയ സ്വീകാര്യത കിട്ടി.ആ റിപ്പോർട്ടിൽ ഉപയോഗിച്ച 'ഡിങ്കോൾഫി' എന്ന വാക്ക് പിന്നീട് നമ്മുടെ ശൈലിയുടെ ഭാഗമായി.

 

1980 ജൂൺ 20 മാതൃഭൂമിയിൽ നിന്ന് പിരിച്ചുവിടപ്പെട്ടു.അതിലേക്ക് നയിച്ച ഒട്ടേറെ സംഭവവികാസങ്ങളുണ്ട്."പത്രാധിപ സമിതിയുടെ അധികാരങ്ങൾ ഒരു ഡയറക്ടറെ ഏൽപ്പിച്ചതിന് എതിരെ ഞാൻ പ്രതികരിച്ചു. അത് പത്രസ്വാതന്ത്ര്യത്തെ ബാധിക്കുമെന്ന് ആശങ്കയുണ്ടായിരുന്നു.

ഇതിനെതിരെ പ്രസ് കൗൺസിലിൽ കേസ് കൊടുക്കും എന്ന് മാനേജ്മെന്റിനെ അറിയിച്ചു.വക്കീലിനെ നിയോഗിക്കാൻ കാശ് ഇല്ലാത്തതിനാൽ അതിന് ഒരു മാസത്തെ അവകാശഅവധിയും ആവശ്യപ്പെട്ടു. കേസുമായി മുന്നോട്ടു പോയാൽ നടപടി എടുക്കുമെന്ന് താക്കീത് കിട്ടി.

 

ആ കേസിന്റ വിധിയിലാണ് പത്രാധിപൻമാരുടെയും മാനേജ്മെന്റിന്റെയും അവകാശങ്ങൾ വ്യവച്ഛേദിച്ചുകൊണ്ടുള്ള ചരിത്ര പ്രാധാന്യമുള്ള വിധി വന്നത്. പത്രപ്രവർത്തകരുടെ പ്രൊമോഷൻ, സ്ഥലംമാറ്റം, പത്രത്തിന്റെ ഉള്ളടക്കം , പരസ്യം ഇവയിലെല്ലാം പത്രാധിപർക്കാണ് അധികാരം എന്നായിരുന്നു വിധി". 

 

പക്ഷേ,ജോലിയിൽ നിന്ന് പിരിച്ചുവിടപ്പെട്ടു. അതിനെതിരെ ലേബർ കോടതി മുതൽ സുപ്രീം കോടതി വരെ നടത്തിയ സുദീർഘമായ നിയമയുദ്ധം പരാജയപ്പെട്ടു. ഹൈക്കോടതി തന്നോട് നീതി കാണിച്ചില്ലെന്ന് അദ്ദേഹം വിശദീകരിച്ചു .ചില ജഡ്ജിമാർ സ്വാധീനങ്ങൾക്ക് വഴങ്ങുന്നുണ്ടെന്നാണ് സ്വന്തം അനുഭവം വ്യക്തമാക്കുന്നത്. ഗ്രാറ്റുവിറ്റി പോലും കിട്ടിയില്ല.

 

ഇന്ന് 'മാദ്ധ്യമം' എന്നാൽ മാദ്ധ്യമഉടമകൾ എന്നാണ് അർത്ഥമെന്ന് പി. രാജൻ പറഞ്ഞു.മുൻപ് വി.കെ കൃഷ്ണമേനോൻ 'ജൂട്ട് പ്രസ് ' എന്നാണ് കച്ചവട താല്പര്യമുള്ള ചില ഇംഗ്ലീഷ് മാധ്യമങ്ങളെ വിളിച്ചിരുന്നത്. വ്യവസായികൾ നടത്തുന്ന മാദ്ധ്യമങ്ങൾക്കാണ് ഇന്നും ഭൂരിപക്ഷം. രണ്ടാം പ്രസ് കമ്മീഷൻ വ്യവസായികളിൽ നിന്ന് മാദ്ധ്യമങ്ങളെ മോചിപ്പിക്കണമെന്ന് ശിപാർശ ചെയ്തിരുന്നു.പക്ഷേ, കേരളത്തിലെ മാദ്ധ്യമങ്ങൾ താരതമ്യേന സ്വതന്ത്രമാണ്.

 

പൗരാവകാശങ്ങൾ എടുത്ത് കളയപ്പെട്ട അടിയന്തരാവസ്ഥയുമായി ഇപ്പോഴത്തെ ഇന്ത്യൻ സാഹചര്യങ്ങളെ താരതമ്യപ്പെടുത്താൻ ആവില്ലന്ന് പി.രാജൻ പറഞ്ഞു. ഭയം കാരണം മാദ്ധ്യമങ്ങൾ പലതും മറച്ചുവയ്ക്കുണ്ടാകാം. കേരളത്തിലെ മാദ്ധ്യമപ്രവർത്തകർക്ക് പിണറായി വിജയനെയും പാർട്ടി പ്രവർത്തകരെയും ഭയമുണ്ട്."ഇന്നത്തെ മാദ്ധ്യമപ്രവർത്തകർ പ്രൊഫഷണൽ

ജേണലിസ്റ്റുകളല്ല. അവരെല്ലാം കരിയറിസ്റ്റുകളാണ്".

 

പുതിയ തലമുറ പത്രങ്ങൾ വായിക്കുന്നില്ല.അവർക്ക് ചരിത്രബോധവും കുറവാണ്. മാദ്ധ്യമങ്ങൾക്കിത് ദുർബലമായ കാലം. ഒരു അന്തരാള കാലഘട്ടമാണിത്. അവയുടെ ഭാവി പ്രവചിക്കാനാവില്ല.അച്ചടി മാദ്ധ്യമങ്ങൾ ഈ രൂപത്തിൽഏറെക്കാലം ഇനി നിലനിൽക്കുമെന്ന് തോന്നുന്നില്ല.

സമൂഹത്തിന്റെ കാവൽ പട്ടികൾ -വാച്ച് ഡോഗ്സ് - എന്ന ചുമതല മാദ്ധ്യമങ്ങൾ ഇപ്പോൾ നിർവഹിക്കുന്നില്ല. അവർ അറിഞ്ഞുകൊണ്ടുതന്നെ അസത്യം പ്രചരിപ്പിക്കുകയാണ്.

കോടതികൾക്ക് മാദ്ധ്യമങ്ങൾ അമിത പ്രചാരം കൊടുക്കുകയാണ്. ആദിവാസി ഭൂമി കയ്യേറിയ പത്രം ഉടമസ്ഥനെ സംരക്ഷിക്കാൻ എക്സിക്യൂട്ടീവും ജുഡീഷ്യറിയും മാദ്ധ്യമങ്ങളും രാഷ്ട്രീയ പാർട്ടികളും ഒന്നിച്ചു നിന്നുവെന്നും അദ്ദേഹം പറഞ്ഞു.

 

മലയാളത്തിലെ ഒരു പ്രമുഖ പത്രം മുൻപ് നിരോധിക്കപ്പെട്ടതിനെ കുറിച്ച് വസ്തുതാവിരുദ്ധമായ കാര്യങ്ങൾ പ്രചരിപ്പിക്കുന്നു.കേസിൽ പ്രതിയായ വൈദികനെ ന്യായീകരിക്കാൻ മറ്റൊരു പത്രം മുന്നിട്ടിറങ്ങിയ ചരിത്രവുമുണ്ട്.

 

ഇ.എം.എസ് വ്യക്തിപരമായി സംശുദ്ധ ജീവിതം നയിച്ച ആളാണന്ന് പി.രാജൻ പറഞ്ഞു."എങ്കിലും, അദ്ദേഹം ഒരു പാർട്ടി അടിമയായിരുന്നു . ഗ്രാംഷിയെപോലെയോ അംബേദ്കറെപോലെയോ സ്വന്തമായി ഒരു ചിന്താപദ്ധതി അദ്ദേഹത്തിന് ഉണ്ടായിരുന്നില്ല എന്നും പി. രാജൻ പറഞ്ഞു.

 

ആറാം വയസ്സിൽ ഇന്ത്യ വിടുകയും ബിരുദത്തിന് മുൻപ് വരെ വിദേശ രാജ്യങ്ങളിൽ പഠിക്കുകയും ചെയ്ത മുതിർന്ന മാദ്ധ്യമപ്രവർത്തക അമ്മു ജോസഫ് ഇംഗ്ലീഷിലാണ് സംസാരിച്ചത്.തൊടുപുഴ സ്വദേശികളായ ഫാദർ കെ.സി ജോസഫിന്റെയും അന്ന ജോസഫിന്റെയും മകളായ അമ്മു മാതാപിതാക്കൾക്കൊപ്പം എത്യോപ്യയിലും ജനീവയിലുമാണ് പഠിച്ചത്. ആദ്യം ആലുവ യു.സി കോളേജിൽ ഇംഗ്ലീഷ് അദ്ധ്യാപകനായിരുന്നു അച്ഛൻ. അമ്മ അവിടെ സ്ഥാപിക്കപ്പെട്ട ക്രൈസ്തവ മഹിളാലയം സ്കൂളിലെ അദ്ധ്യാപികയും .

 

"ആഡിസ്അബാബയിൽ ഞങ്ങൾ ഏഴുവർഷം താമസിച്ചു.കേരളത്തിൽ നിന്നുള്ള സിറിയൻ ക്രിസ്ത്യൻ അദ്ധ്യാപകർ ധാരാളമുണ്ടായിരുന്നു, അവിടെ . അവരുടെ മക്കളും സഹപാഠികളായിരുന്നു. നോവലിസ്റ്റായ എബ്രഹാം വർഗ്ഗീസ് ബാല്യകാല സുഹൃത്താണ്". ജനീവ ഇന്റർനാഷൽ സ്ക്കൂളിലായിരുന്നു , ഹൈസ്ക്കൂൾ വിദ്യാഭ്യാസം. 1970ൽ ഇന്ത്യയിൽ തിരിച്ചെത്തി, ചെന്നൈയിലെ വിമൻസ് ക്രിസ്ത്യൻ കോളേജിൽ ബി.എ കോഴ്സിന് ചേർന്നു. മൂത്ത ചേച്ചിയും അന്ന് അവിടെ പഠിച്ചിരുന്നു.

"എന്റെ മാദ്ധ്യമപ്രവർത്തനത്തിന്റെ തുടക്കം അവിടെ നിന്നായിരുന്നു. അവസാന വർഷം ഞാൻ കോളേജ് മാഗസിൻ എഡിറ്ററായി തെരഞ്ഞെടുക്കപ്പെട്ടു".

 

1974 ൽ മുംബൈയിലെ ബി.കെ സമാനി പോളിടെക്നിക് കോളേജിൽ സോഷ്യൽ കമ്യൂണിക്കേഷൻ ഇൻ മീഡിയയിൽ ഒരു വർഷത്തെ കോഴ്സിന് ചേർന്നു. അതിന്റെ ഒരു മാസത്തെ ഇന്റേൺഷിപ്പ് ഈവ്സ് വീക്കിലിയിൽ ആയിരുന്നു.അതിന്റെ പത്രാധിപ അവിടെ ജോലി വാഗ്ദാനം ചെയ്തു. മാനേജിങ്ങ് ഡയറക്ടർ ജെ.സി ജയിൻ തന്ത്രജ്ഞനായിരുന്നു. അവിടെയും സ്റ്റാർ ആന്റ് സ്റ്റൈലിലും കൂടി സബ് എഡിറ്റർ കം റിപ്പോർട്ടർ ആയാണ് നിയമിച്ചത്."അദ്യത്തെ ആറു മാസം മുഴുവൻ സ്റ്റാർ ആൻഡ് സ്റ്റൈലിനു വേണ്ടി ഹിന്ദി സിനിമാ താരങ്ങളെ ഇന്റർവ്യൂ നടത്തി റിപ്പോർട്ടുകളും ഫീച്ചറുകളും ലേഖനങ്ങളും എഴുതുയായിരുന്നു ജോലി. 520 രൂപ ശമ്പളം.അതൊരു കോൺ ജോബ്(con job) ആയിരുന്നു".

 

അക്കാലത്തെ പ്രശസ്തരും പുതുമുഖങ്ങളുമടക്കം ഒട്ടേറെ താരങ്ങളെ കണ്ടു.

"ഇംഗ്ലീഷ് അറിയാവുന്നവരെ മാത്രമാണ് ഇന്റർവ്യൂ ചെയ്തത്". ശർമ്മിള ടാഗോർ, ഷമ്മി കപൂർ, ഷബാന ആസ്മി, സ്മിത പാട്ടീൽ, ശേഖർ കപൂർ, വിനോദ് ഖന്ന, നീതു സിങ്ങ് ..... ഇവരിൽ രാജേഷ് ഖന്നയുമായി നടത്തിയ അഭിമുഖമാണ് മനസ്സിൽ ഇന്നും തങ്ങിനിൽക്കുന്നത്.

 

അടിയന്തിരാവസ്ഥ പ്രഖ്യാപനം വലിയ പ്രതിസന്ധികൾ ഉണ്ടാക്കിയില്ലെങ്കിലും സെൻസർഷിപ്പുണ്ടായിരുന്നു.മീഡിയ അദ്ധ്യാപകനായ വിനോദ് റാവു ആയിരുന്നു അന്നത്തെ ചീഫ് സെൻസറിംഗ് ഓഫീസർ . ദേവയാനി ചൗബാലിന്റെ സിനിമാ ഗോസിപ്പ് കോളത്തിൽ (Frankly speaking) പ്രസിദ്ധീകരിക്കാനുള്ള മാറ്ററുമായി അദ്ദേഹത്തെ പോയി കണ്ടത് മറ്റൊരു അനുഭവമാണ്.

" ഞാൻ അദ്ദേഹത്തോട് പറഞ്ഞു -ഇങ്ങനൊരു സാഹചര്യത്തിൽ നമ്മൾ വീണ്ടും കണ്ടുമുട്ടുമെന്ന് വിചാരിച്ചില്ല".

 

1977 ജനുവരിയിൽ പബ്ലിക് കമ്മ്യൂണിക്കേഷനിൽ പഠനത്തിന് അമേരിക്കയിലേക്ക് പോയി. മാഗസിൻ ജേണലിസത്തിലായിരുന്നു സ്പെഷ്യലൈസേഷൻ.''ഫെമനിസം എന്ന ആശയവുമായി പരിചയപ്പെടുന്നത് അന്നാണ്. ലിംഗപദവി സംബന്ധിച്ചും സ്ത്രീ പ്രശ്നങ്ങളെക്കുറിച്ചും പഠിച്ചു. കണ്ണു തുറപ്പിക്കുന്നതായിരുന്നു, അത്. പുതിയ ഉൾക്കാഴ്ചയോടെ സ്ത്രീ പ്രശ്നങ്ങളെ സമീപിക്കാൻ തുടങ്ങിയത് ആ പഠനകാലത്താണ്" . പഠനത്തിന്റെ ഭാഗമായി മിസ് മാഗസിൻ എന്ന അവിടുത്തെ ശ്രദ്ധേയമായ വനിതാപ്രസിദ്ധീകരണത്തിൽ ഒരാഴ്ച ചെലവഴിച്ച്, പത്രാധിപയെ ഇന്റർവ്യൂ ചെയ്ത് റിപ്പോർട്ട് തയ്യാറാക്കിയതും വഴിത്തിരിവായി.

 

കോഴ്സ് പൂർത്തിയാക്കി തിരിച്ചത്തിയപ്പോൾ , ഈവ്സ് വീക്ക്ലി പത്രാധിപ ക്ഷണിച്ചു. അങ്ങനെ, അവിടെ അസിസ്റ്റൻറ് എഡിറ്ററായി.1981 വരെ അവിടെ തുടർന്നു."പരമ്പരാഗത ശൈലിയിലുള്ള പ്രസിദ്ധീകരണത്തെ, സ്ത്രീകളുടെ താല്പര്യങ്ങളും ആശങ്കകളു പുതിയ ആശയങ്ങളും മറ്റും ഉൾക്കൊള്ളുന്ന രീതിയിൽ ഉടച്ചുവാർക്കാനായി . അത് പുതിയ ആകാശങ്ങൾ തുറന്നു".ജ്യോതി പുൻവാനി, റതു കംലാനി തുടങ്ങിയ മുതിർന്ന സഹപ്രവർത്തകർ വലിയ പിന്തുണ നൽകി.

കുട്ടി ഉണ്ടാകുകയും ഒറ്റ അമ്മ ആകുകയും ചെയ്തതോടെ പ്രവർത്തന സമയത്തിൽ ക്രമീകരണം നടത്തണ്ടത് ആവശ്യമായി വന്നു.വീട്ടിലും ഓഫീസിലും ഇരുന്ന് ജോലി പൂർത്തീകരിക്കാനുള്ള ആവശ്യം (flexy timing) പക്ഷേ, മാനേജിങ്ങ് ഡയറക്ടർക്ക് സമ്മതമല്ലായിരുന്നു.അതോടെ ജോലി.വിട്ടു .പിന്നീട് മൂന്നുവർഷം പോളിടെക്നിക് കോളേജിൽ അദ്ധ്യാപികയായി .

 

അക്കാലത്ത് അപ്ഡേറ്റ് ബിസിനസ് മാഗസിൻ,വിമൻ ടുഡേ തുടങ്ങിയ പ്രസിദ്ധീകരണങ്ങളിൽ എഴുതി. മുംബൈയിൽ നിന്ന് ഇറങ്ങിയിരുന്ന സബർബൻ എന്ന ഗ്രാമീണ പത്രത്തിന്റെ കൺസൾട്ടിങ്ങ് എഡിറ്ററുമായി .പിന്നീട് ഇന്ത്യ പോസ്റ്റിൽ മാഗസിൻ എഡിറ്ററായി ചേർന്നു. അന്ന് അതിന്റെ പത്രാധിപർ എസ്. നിഹാൽ സിംഗ് ആയിരുന്നു.വനിതകളുടെ പ്രശ്നങ്ങൾക്കും കാലിക സംഭവങ്ങൾക്കും മുൻതൂക്കം നൽകിയുള്ള ലേഖനങ്ങളാണ് അതിൽ കൊടുത്തിരുന്നത്. പക്ഷേ, പുതിയ പത്രാധിപർ വന്നതോടെ വിനോദം,പാചകം,സിനിമ തുടങ്ങിയവയ്ക്ക് പ്രാധാന്യം നൽകിത്തുടങ്ങി."ആഗോളവൽക്കരണം മാദ്ധ്യമരംഗത്ത് ആദ്യം ലക്ഷ്യം വെച്ചത് ഫീച്ചറിനെയാണ് .ഗൗരവതരമായ വിഷയങ്ങൾ പകരം വളരെ ലൈറ്റ് ആയ കാര്യങ്ങൾ പ്രസിദ്ധീകരിക്കാൻ ആരംഭിച്ചതോടെ ഔദ്യോഗിക മാദ്ധ്യമപ്രവർത്തനം ഞാൻ അവസാനിപ്പിച്ചു".

 

അന്നുമുതൽ സ്വതന്ത്ര മാദ്ധ്യമപ്രവർത്തകയും ഗവേഷകയുമാണ്.ദ ഹിന്ദു ,ഡെക്കാൻ ഹെറാൾഡ് തുടങ്ങിയ പ്രസിദ്ധീകരണങ്ങളിലും ലേഖനങ്ങളും കോളങ്ങളും എഴുതാൻ ആരംഭിച്ചു.ദ ഹിന്ദുവിന്റെ യങ്ങ് വേൾഡിൽ , രുഗ്മ എന്ന തൂലിക നാമത്തിൽ എട്ട് വർഷം കോളം എഴുതി .അതിൽ നിന്ന് തെരഞ്ഞെടുത്ത ലേഖനങ്ങൾ അടുത്തുതന്നെ പുസ്തകമായി പ്രസിദ്ധീകൃതമാകുന്നുണ്ട്.

ധാരാളം ഗവേഷണ പ്രസിദ്ധീകരണങ്ങളുടെ എഡിറ്റോറിയൽ കൺസൾട്ടന്റായും പ്രവർത്തിക്കുന്നുണ്ട്.ദക്ഷിണേന്ത്യയിലെ കൗമാരക്കാരായ പെൺകുട്ടികളുടെ പ്രശ്നങ്ങളെക്കുറിച്ച് നടത്തിയ പഠനം അനിത നായരുടെയും എം.എ ഉമ്മന്റെയും ഗവേഷണ പുസ്തകങ്ങളിൽ ചേർത്തിട്ടുണ്ട്.ദക്ഷിണേന്ത്യൻ സിനിമാരംഗത്തെ സ്ത്രീകളുടെ അവസ്ഥയെക്കുറിച്ച് ഡബ്ലിയു.സി.സി 2020 ൽ തയ്യാറാക്കിയ റിപ്പോർട്ടിലേക്ക് നയിച്ച പഠനത്തിലും പ്രധാന പങ്ക് വഹിച്ചു.

നമ്മുടെ പ്രധാന പത്രങ്ങളുടെ ഗുണനിലവാരം ഇപ്പോൾ തകർന്നിട്ടുണ്ടെന്ന് അമ്മു ജോസഫ് നിരീക്ഷിച്ചു."വാർത്തയ്ക്കും കച്ചവടത്തിനും ഇടയിലെ രേഖ മാഞ്ഞു പോയിരിക്കുന്നു മുൻപ് ടൈംസ് ഓഫ് ഇന്ത്യ ഒരു മാർക്കറ്റിംഗ് മാനേജരെ അസിസ്റ്റൻറ് എഡിറ്ററായി നിയമിക്കുക പോലും ഉണ്ടായി. പത്രങ്ങളിലുള്ള വിശ്വാസം എക്കാലത്തെയും വലിയ തകർച്ച നേരിടുകയാണ് ഇപ്പോൾ .

സമൂഹമാദ്ധ്യമങ്ങളാണ് ഇപ്പോൾ ഉള്ളടക്കം നിശ്ചയിക്കുന്നത്. പത്രങ്ങളും ടെലിവിഷൻ ചാനലുകളും ഇവയിൽ നിന്ന് കിട്ടുന്ന സൂചനകളാണ്(cues) വാർത്താഉറവിടമാക്കുന്നത്".

 

മാദ്ധ്യമപ്രവർത്തകർ കടുത്ത വെല്ലുവിളികളും പ്രതിസന്ധികളും ഇന്ത്യയിൽ നേരിടുന്നുണ്ട് .അവരുടെ ഉപകരണങ്ങൾ പോലും അധികാരികൾ പിടിച്ചെടുക്കുന്നു.അവ തിരിച്ചു കിട്ടുക ദൈർഘ്യമേറിയ നടപടിക്രമങ്ങൾക്ക് ശേഷമാണ്. മാനേജ്മെന്റ് പോലും നിയമനടപടികളിൽ അവർക്ക് ഒപ്പം നിൽക്കാറില്ല. അവരെ സംരക്ഷിക്കേണ്ട യൂണിയനുകളും മിക്കപ്പോഴും ഒപ്പം ചേരുന്നില്ല.പത്ര മാനേജ്മെന്റുകൾക്ക് ഇ.ഡി, സി.ബി.ഐ തുടങ്ങിയ കേന്ദ്ര ഏജൻസികളെ പേടിയാണ്.

നമ്മുടെ പ്രമുഖ ദേശീയ വാർത്ത ചാനലുകൾ യഥാർത്ഥ അർത്ഥത്തിൽ അത്തരം ചാനലുകൾ അല്ലെന്നും അമ്മു ജോസഫ് പറഞ്ഞു .അവർ പോലും നിലനിൽപ്പിനായി പൊരുതുന്ന ഇക്കാലത്ത് വെബ്മാദ്ധ്യമങ്ങളും പിടിച്ചുനിൽക്കാൻ ബുദ്ധിമുട്ടുകയാണ്.വാർത്താശേഖരണത്തിനും നിലനിൽപ്പിനുമുള്ള സാമ്പത്തിക സ്രോതസ്സ് അവർക്ക് ഇല്ല .പുതിയ തലമുറ യാദൃശ്‌ചികമായി മാത്രമാണ് വെബ്, ഡിജിറ്റൽ മാദ്ധ്യമങ്ങളിലെ ഉള്ളടക്കം വായിക്കുന്നത് എന്ന് അഭിപ്രായമില്ലന്നും അമ്മു ജോസഫ് പറഞ്ഞു.

 

ചർച്ചയിൽ പി.ജെ മാത്യു,ജോർജ് കള്ളിവയലിൽ ,രാജേന്ദ്രൻ പുതിയേടത്ത്,ജോസ്കുട്ടി പനയ്ക്കൽ,എം.ഷെരീഫ്,ഷഹീൻ സിദ്ദിഖ്,സുരേഷ് നെല്ലിക്കോട് എന്നിവർ പങ്കെടുത്തു.

 

ഈ പരമ്പരയുടെ മുൻ അദ്ധ്യായങ്ങളിൽ പങ്കെടുത്ത മറ്റ് മുതിർന്ന മാദ്ധ്യമപ്രവർത്തകരായ എൻ. ബാലകൃഷ്ണൻ , എൻ.പി രാജേന്ദ്രൻ ,എം.ജി രാധാകൃഷ്ണൻ , പി.എസ് നിർമ്മല, പി.പി മാത്യു, ടി.ശശി മോഹൻ, പി.പ്രേംചന്ദ്, പി.എസ് ജോസഫ്,പി.കെ ശ്രീനിവാസൻ , ചെറുകര സണ്ണി ലൂക്കോസ്,പി.വി ഹരികൃഷ്ണൻ എന്നിവരും കെ.രാജഗോപാൽ, പി. മുസ്തഫ അടക്കമുള്ളവരും ഈ പരമ്പരയുടെ സമാപന അദ്ധ്യായത്തിൽ പങ്കെടുത്തു.

 

ഡി.പ്രദീപ്കുമാറും കെ.ഹേമലതയും മോഡറേറ്റർമാരായി.

'ചരിത്രസാക്ഷികൾ ' പരമ്പരയുടെ അവസാനഭാഗത്തിന്റെ ശബ്ദലേഖനം മീഡിയ വേവ്സ് യൂട്യൂബ് ചാനലിലുണ്ട് .

https://youtu.be/QJoxudx2XOc?feature=shared

ചരിത്രസാക്ഷികൾ -43:പി.കെ രവീന്ദ്രൻ,അശോക് ശ്രീനിവാസൻ

ചരിത്രസാക്ഷികൾ-42:ഫ്രാൻസിസ് പുലിക്കോടൻ,ജി.ഹരികുമാർ

'ചരിത്രസാക്ഷികൾ' (ക്ലബ് ഹൗസ് മീഡിയ റൂം, ഒക്ടോബർ 14, 2023) പരമ്പരയുടെ 42ആം ഭാഗത്തിൽ അനുഭവങ്ങൾ പങ്കുവച്ചത് ഫ്രാൻസിസ് പുലിക്കോടനും(മുൻ ചീഫ് സബ് എഡിറ്റർ, ദ ന്യൂ ഇന്ത്യൻ എക്സ്പ്രസ്),ജി. ഹരികുമാറും (മുൻ അസി. എഡിറ്റർ, ദ നേഷൻ, ബാങ്കോക്ക് ;ദ സൗത്ത് ചൈന മോണിങ്ങ് പോസ്റ്റ്, ഹോങ്കോങ്ങ്).

 

സ്കൂൾ, കോളേജ് പഠനകാലം മുതൽ കായിക മത്സരങ്ങളിൽ പങ്കെടുത്തിരുന്നുവെന്ന് മാദ്ധ്യമജീവിതത്തിൽ സ്പോർട്സിൽ ശ്രദ്ധ കേന്ദ്രീകരിച്ച ഫ്രാൻസിസ് പുലിക്കോടൻ പറഞ്ഞു. ഡിഗ്രിക്ക് പഠിച്ച പാലക്കാട് വിക്ടോറിയ കോളേജിൽ ഹോക്കി , ഫുട്ബാൾ ടീമുകളിലേക്ക് സെലക്ഷൻ കിട്ടിയിരുന്നു. ജബൽപ്പൂർ സർവകലാശാലയിൽ എം.എസ്.സി അപ്ലൈഡ് കെമിസ്ട്രി പഠിക്കാൻ ചേർന്നെങ്കിലും അത് പൂർത്തീകരിക്കാനായില്ല. തുടർന്ന്, മദ്രാസിലെ ഒരു ടയർ കമ്പനിയിൽ ഉദ്യോഗസ്ഥനായി. അക്കാലത്ത് അവിടുത്തെ ലൈബ്രറികളിൽ സ്ഥിരം സന്ദർശകനായി.ധാരാളം ഇംഗ്ലീഷ് സാഹിത്യ പുസ്തകങ്ങൾ വായിച്ചു.1977ൽ ജോലി രാജിവച്ച്, ഇംഗ്ലീഷ് സാഹിത്യത്തിൽ എം.എ പാസായി. 

 

1981ൽ കൊച്ചി ഇന്ത്യൻ എക്സ്പ്രസ് പത്രത്തിന്റെ സ്പോർട്സ് ഡെസ്കിൽ സബ് എഡിറ്ററായി ചേർന്നു. അന്ന് റസിഡന്റ് എഡിറ്റർ എസ്.കെ അനന്തരാമനാണ്. സ്പോർട്സ് എഡിറ്റർ സി.എസ്.എ സ്വാമിയായിരുന്നു ഇന്റർവ്യൂ നടത്തി തെരഞ്ഞെടുത്തത്. ഒപ്പം ഡി.രവികുമാറുമുണ്ടായിരുന്നു. അദ്ദേഹം പിൽക്കാലത്ത് ഡെക്കാൺ ഹെറാൾഡിൽ ചേർന്നു.

 

അന്ന് ഐ.ഡി. പോളായിരുന്നു സ്പോർട്ട് ഡെസ്ക്കിന്റെ ചീഫ് . ലളിതമായ വാക്കുകളിൽ ആഴത്തിലുള്ള എഴുത്തായിരുന്നു, അദ്ദേഹത്തിന്റേത്."അദ്ദേഹമാണ്,എന്റെ ഗുരു". പേജ് തയ്യാറാക്കലും എഡിറ്റിങ്ങുമടക്കമുള്ള ഡെസ്ക്കിലെ ജോലികൾ പഠിച്ചത് അശോക് കുമാറിൽ നിന്നായിരുന്നു.

"അദ്ദേഹം വളരെ നന്നായി കോപ്പി എഡിറ്റ് ചെയ്യും. മൂന്ന് പേജ് വരെ തനിയെ തയ്യാറാക്കും".

ധാരാളം ദേശീയ, അന്താരാഷ്ട്ര ടൂർണമെന്റുകളും ചാമ്പ്യൻഷിപ്പുകളും കവർ ചെയ്തിട്ടുണ്ട്. മറ്റ് റിപ്പോർട്ടുകളും എഴുതി.ഇടയ്ക്ക് ,1985 ലും 1989 ലും, തിരുവന്തപുരത്തേയ്ക്ക് മാറ്റപ്പെട്ടു. 1985 ൽ മെഡിക്കൽ കോളേജിനടുത്ത് ഒരു മത്സരം കവർ ചെയ്യാൻ പോയപ്പോൾ , അവിടെ തുടങ്ങിയ ഫിസിക്കൽ എജൂക്കേഷൻ കോളേജിലെ ഹസ്രാണി എന്ന ഒരു സ്റ്റാഫംഗത്തെ പരിചയപ്പെട്ടു. രണ്ട് മുറികളിൽ, ഒരു സൗകര്യവുമില്ലാതെയാണ് അന്ന് കോളേജ് പ്രവർത്തിച്ചിരുന്നത്. പരിതാപകരമായ അവസ്ഥ. ഈ സ്ഥാപനം കൊണ്ടുവരുവാൻ പ്രയത്നിച്ച പ്രിൻസിപ്പാൾ പ്രൊഫ. കൃഷ്ണൻ നായരുമായി സംസാരിച്ച് അതെക്കുറിച്ച് , ഫോട്ടോ സഹിതം ഒരു റിപ്പോർട്ട് എഴുതി:Can you call this a college? എന്നാരംഭിക്കുന്ന ആ റിപ്പോർട്ട് അധികാരികളുടെ കണ്ണു തുറപ്പിച്ചു. മന്ത്രി ടി.എം ജേക്കബ്ബ് ഇടപെട്ട് , കേന്ദ്ര ഫണ്ടുകൾ ലഭ്യമാക്കി. അങ്ങനെ,കാര്യവട്ടത്തെ LNCPE കോളേജ് ദേശീയ സ്ഥാപനമായി വളർന്ന് വികസിച്ചതിൽ സന്തോഷമുണ്ട്. അതിന്റെ പ്രിൻസിപ്പാളുമാരുമായി നല്ല ബന്ധമുണ്ടായിരുന്നു.

 

മെഴ്സിക്കുട്ടന് 1989-ൽ അർജുന അവാർഡ് കിട്ടാൻ വഴിയൊരുക്കിയത് ഒരു റിപ്പോർട്ടാണ്. തിരുവനന്തപുരം ചന്ദ്രശേഖരൻ നായർ സ്റ്റേഡിയത്തിൽ ഭർത്താവിനൊപ്പം പരിശീലനത്തിന് വന്ന അവരെ യാദൃച്ഛികമായി കണ്ടു. കുട്ടിയെ ട്രാക്കിനരികെ ഉറക്കിക്കിടത്തിയിരുന്നു. ആ വർഷത്തെ പുരസ്കാരപ്പട്ടികയിൽ തന്റെ പേര് ഇല്ലാത്തതിൽ ദു:ഖിതയായിരുന്നു,അവർ. നിലവിലെ മാനദണ്ഡങ്ങൾ അതിന് വിലങ്ങുതടിയായിരുന്നു. അതെക്കുറിച്ച് എഴുതിയ റിപ്പോർട്ടിനെ തുടർന്ന് ആ മാനദണ്ഡങ്ങളിൽ മാറ്റം വരുത്തി.

 

അത് ലറ്റിക് ഫെഡറേഷൻ ഓഫ് ഇന്ത്യ മുൻകാലങ്ങളിൽ നടത്തിയിരുന്ന പ്രഖ്യാപനങ്ങൾ നടപ്പിലാക്കിയിരുന്നില്ല. അവയെക്കുറിച്ചുള്ള വിവരങ്ങൾ ശേഖരിച്ച്, സെക്രട്ടറി ലളിത് ഭാനോട്ടുമായി സംസാരിക്കാൻ സമയം ചോദിച്ചു. തനിക്ക് തിരക്കാണെന്നും അപ്പോൾ സംസാരിക്കാൻ പറ്റില്ലന്നും അദ്ദേഹം മറുപടി നൽകി. അത് ലറ്റിക് ഫെഡറേഷന്റെ നടപ്പിലാക്കപ്പെടാത്ത പ്രഖ്യാപനങ്ങളെക്കുറിച്ചും അതെക്കുറിച്ച് സംസാരിക്കാൻ വിസമ്മതിച്ച സെക്രട്ടറിയെക്കുറിച്ചും റിപ്പോർട്ട് എഴുതി. രണ്ടുവർഷം കഴിഞ്ഞ്, ബോംബെ മാരത്തോൺ കവർ ചെയ്യാൻ പോയപ്പോൾ , അഞ്ജു ബോബി ജോർജ്ജിന്റെ അഭിമുഖത്തിനായി കാത്തിരിക്കവേ, ലളിത് ഭനോട്ട് അടുത്ത് വന്ന് സംസാരിക്കാൻ താല്പര്യം പ്രകടിപ്പിച്ചു."I'll meet you later എന്ന് ഉത്തരം നൽകി".

 

എറണാകുളത്ത് നെഹ്രുകപ്പ് ടൂർണമെന്റ് നടന്നപ്പോൾ 1983ലും 1985ലും സംഘാടകർ തന്നെ ഡ്യൂപ്ളിക്കേറ്റ് ടിക്കറ്റുകൾ വിൽക്കുന്നതായി വിവരം കിട്ടി.1989ൽ കൊല്ലത്ത് സന്തോഷ് ട്രോഫി നടന്നപ്പോഴും ഇത് ആവർത്തിച്ചു. രണ്ടുതരം ടിക്കറ്റുകളുമായി ജനങ്ങൾ ഇടിച്ചു കയറിയതോടെ ടച്ച് ലൈനിന് അടുത്തു വരെ കന്യാസ്ത്രീകൾ അടക്കമുള്ളവർ നിറഞ്ഞു . പൊലീസ് എത്തി , അവരെ ഒഴിപ്പിച്ച ശേഷമായിരുന്നു,കളി തുടങ്ങിയത്. അതിന് സാക്ഷിയായിരുന്നു. ഇക്കാര്യങ്ങളെക്കുറിച്ച് അന്നത്തെ സ്പോർട്സ് ഡയറക്ടർ രാജീവ് സദാനന്ദനോട് പറഞ്ഞപ്പോൾ അതിനു സാദ്ധ്യതയില്ലെന്നായിരുന്നു അദ്ദേഹം ആദ്യം പറഞ്ഞത്.പക്ഷേ, അന്വേഷണം നടത്തി, എട്ട് ലക്ഷം രൂപയുടെ അഴിമതി കണ്ടെത്തി.

 

സംഘാടകരുടെ കഴിവില്ലായ്മ മൂലം പല വർഷങ്ങളിൽ മുടങ്ങിപ്പോയ എറണാകുളം ജില്ലാ ഫുട്ബാൾ ലീഗ് മത്സരങ്ങൾ പുനരാരംഭിക്കുന്നതും അക്കാലത്ത് എഴുതിയ ഒരു റിപ്പോർട്ടിനെ തുടർന്നായിരുന്നു .

1995ൽ സാഫ് ഗെയിംസിനായി ജയലളിതയുടെ ഭരണകാലത്ത് മദ്രാസിൽ പണി കഴിപ്പിച്ച സ്റ്റേഡിയത്തെക്കുറിച്ചെഴുതിയ റിപ്പോർട്ട് അവർക്ക് ഏറെ ഇഷ്ടപ്പെട്ടുവെന്നും അത് എഴുതിയ ആളെ കാണാൻ താല്പര്യമുണ്ടെന്നും തമിഴ്‌നാട് ഫുട്ബാൾ അസോസിയേഷൻ പ്രസിഡൻ്റും മുഖ്യമന്ത്രിയുടെ വിശ്വസ്ഥനുമായ സി.ആർ വിശ്വനാഥൻ അറിയിച്ചതാണ് സന്തോഷകരമായ ഒരു അനുഭവം.

1989-ൽ ജി.വി രാജ ഹോക്കി ടൂർണമെന്റ് നടത്തിപ്പ് സംബന്ധിച്ച് സംഘാടകർക്കിടയിൽ തർക്കങ്ങളുണ്ടായി. ഒരു വിഭാഗം നടത്തിയ പത്രസമ്മേളനത്തിന്റെ 'ഇന്ത്യൻ എക്സ്പ്രസി'ൽ വന്ന റിപ്പോർട്ടും വിവാദമായി."ഞാൻ ലീവിലായിരുന്നപ്പോൾ മറ്റൊരു റിപ്പോർട്ടറായിരുന്നു അത് എഴുതിയത്". ദൗദ്യോഗിക വിഭാഗം പ്രസിഡന്റ് അപകീർത്തിക്കേസ് ഫയൽ ചെയ്യുമെന്ന് പറഞ്ഞു .'സ്പോർട്സിൽ ഗ്രൂപ്പിസമുണ്ട്. പക്ഷേ, ജി.വി രാജയുടെ പേര് അതിലേക്ക് വലിച്ചിഴച്ച് കൊണ്ടുവരേണ്ട കാര്യമില്ല' എന്ന് സ്പോർട്സ് പേജിൽ എഴുതി. തുടർന്നാണ് ആ തർക്കം ആറിത്തണുത്തത്.

 

'സ്പോർട്ട് സ് അറിഞ്ഞ് റിപ്പോർട്ട് ചെയ്യുന്ന ഒരാൾ' എന്ന് മുൻ ഡി.ജി.പി എം.കെ ജോസഫ് നൽകിയ അഭിനന്ദനം വിലപ്പെട്ടതായി ഫ്രാൻസിസ് പുലിക്കോടൻ കാണുന്നു. മദ്രാസിലേക്ക് സ്ഥലംമാറ്റപ്പെട്ടപ്പോൾ അന്നത്തെ ബ്യൂറോ ചീഫ് ടി.എൻ ഗോപാലൻ,തന്റെ റിപ്പോർട്ടുകൾ വായിക്കാറുണ്ടെന്ന് പറഞ്ഞ് എഴുന്നേറ്റ് നിന്ന് സ്വാഗതം ചെയ്തതും മറ്റൊരു സന്തോഷ മുഹൂർത്തം.

"മറ്റു സ്വകാര്യ സ്ഥാപനങ്ങളിലേതുപോലെ അതൊരു സുസംഘടിതമായ സ്ഥാപനമായിരുന്നില്ലങ്കിലും ഇന്ത്യൻ എക്സ്പ്രസിൽ ജോബ് സാറ്റിസ്ഫാക്ഷൻ കിട്ടിയിരുന്നു.എന്നാൽ നല്ലകാര്യങ്ങൾക്ക് അവിടെ അംഗീകാരം കിട്ടുന്നത് തന്നെ അപൂർവ്വം".

 

രാജൻ ബാല സ്റ്റോർട്ട്സ് എഡിറ്ററായതോടെ പത്രത്തിൽ ക്രിക്കറ്റിന് അമിത പ്രാധാന്യമാണ് ലഭിച്ചത്."എന്നാൽ,സ്പോർട്ട് വികസനമെന്നാൽ ക്രിക്കറ്റ് ഡവലപ്പ്മെന്റാണന്ന് ഞാൻ വിശ്വസിക്കുന്നില്ല. ക്രിക്കറ്റിന് പകരം നാഷണൽ ചാമ്പ്യൻഷിപ്പുകളെക്കുറിച്ചുള്ള വാർത്തകൾ ഞാൻ ലീഡായി നൽകി. സ്പോർട്ട് സ് എഡിറ്റർക്ക് താളംതുള്ളി നിന്നില്ല".

 

1984 നു ശേഷം ഇന്ത്യൻ അത് ലറ്റിക് രംഗം പതനത്തിലാണ്. പാവപ്പെട്ട കുടുംബങ്ങളിൽ നിന്നുള്ളവരാണ് ഇന്ന് കൂടുതലും വരുന്നത്. സ്പോർട്സ് അറിയാവുന്ന ഭരണാധികാരികൾ അതിന്റെ തലപ്പത്ത് ഉണ്ടാവുന്നില്ല. വ്യായാമം കൊണ്ട് നിത്യജീവിതത്തിൽ പ്രയോജനം ഉണ്ടാകുമെന്ന് ജനങ്ങളെ പഠിപ്പിക്കണ്ടത് സർക്കാരാണ്. ജനങ്ങളിൽ കായികസംസ്കാരം വളർത്താൻ അവർ മുൻ കൈയെടുക്കണം.

 

പുതിയ തലമുറയിൽ പെട്ടവർക്ക് മറ്റു കാര്യങ്ങളിലാണ് താല്പര്യം. കായികമായി വികസിച്ച തലമുറ (physically developed generation) ഉണ്ടെങ്കിൽ മാത്രമേ അവർക്ക് സ്പോർട്സ് വാർത്തകളിൽ താല്പര്യമുണ്ടാകൂ എന്നും ഫ്രാൻസിസ് പുലിക്കോടൻ പറഞ്ഞു.

 

 

1985ൽ ദ ന്യൂ ഇന്ത്യൻ എക്സ്പ്രസിൽ നിന്ന് വിരമിച്ച അദ്ദേഹം പാലക്കാടാണ് താമസിക്കുന്നത്.

യാദൃച്ഛികമായാണ് താൻ മാദ്ധ്യമ രംഗത്തെത്തിയതെന്ന് ജി.ഹരികുമാർ പറഞ്ഞു. ഇന്നും സറ്റയർ ജീവിതത്തിന്റെ ഭാഗമാക്കിയ അദ്ദേഹം ഓർക്കുന്നതിങ്ങനെ,"സ്റ്റാച്യുവിൽ വായിനോക്കി നിന്ന സമയത്താണ് തിരുവനന്തപുരം പ്രസ്ക്ലബ്ബിൽ ജേർണ്ണലിസം ഡിപ്ലോമ കോഴ്സിന് ടെസ്റ്റ് എഴുതാൻ ആരോ പറഞ്ഞത്. അവിടെ ചേർന്നു.പിന്നെ കാര്യവട്ടത്തും". 

 

എം.ജെ അവസാന ബാച്ചിൽ(1984-86) വിദ്യാർത്ഥിയായി.1985 ഒക്ടോബറിൽ മാതൃഭൂമി തിരുവനന്തപുരം യൂണിറ്റിൽ നിന്നാണ് മാദ്ധ്യമ ജീവിതത്തിന്റെ തുടക്കം.ഡി. പ്രദീപ് കുമാർ, പി.വി ഹരികൃഷ്ണൻ തുടങ്ങിയവരുമുണ്ടായിരുന്നു ,ആ ബാച്ചിൽ .

 

മൂന്ന് വർഷം മാത്രമേ മാതൃഭൂമിയിലുണ്ടായിരുന്നുള്ളൂ.അന്ന് സ്പോർട്സ് റിപ്പോർട്ടുകളും ചെയ്തു.

"1988-ൽ രാജിവച്ച് ബാംഗ്ലൂരിലെ ഡെക്കാൺ ഹെറാൾഡിന്റെ ഡെസ്കിൽ ചേർന്നു. ഇംഗ്ളീഷ് ജേണ്ണലിസത്തിലേക്ക് മാറണമെന്ന ആഗ്രഹമായിരുന്നു പ്രധാന കാരണം.മാതൃഭൂമിയിൽ അത് കൂട്ട ട്രാൻസറുകളുടെ കാലമായിരുന്നു".

 

പിന്നീട് കുറച്ചു കാലം ഡൽഹിയിൽ പേട്രിയറ്റിലും പ്രവർത്തിച്ചു. അവിടെയും സ്പോർട്സിലായിരുന്നു. 1991ൽ ഗൾഫ് ടൈംസിൽ ചേർന്നു. പിന്നീട് ദീർഘകാലം വിദേശ രാജ്യങ്ങളിലായിരുന്നു മാദ്ധ്യമപ്രവർത്തനം . 

 

''ഗൾഫ് ടൈംസിൽ ചേർന്ന് ഏതാനും ദിവസങ്ങൾക്കകം പത്രത്തിൽ എന്റെ ഫോട്ടോ വന്നു. എന്നെ വെൽക്കം ചെയ്യാൻ ഒരു ഹോട്ടലിൽ നിന്ന് കേക്ക് കൊടുത്തയച്ചു. അത് കട്ട് ചെയ്തതിന്റെ ഫോട്ടോ അടിക്കുറിപ്പ് സഹിതം അവർ സോഷ്യൽ ഇവന്റ്സ് കോളത്തിൽ കൊടുത്തു!".

 

യഥാർത്ഥ അർത്ഥത്തിൽ അതൊരു പത്രമായിരുന്നില്ല. സർക്കാരിന്റെ അറിയിപ്പുകളും വാർത്തകളുമായിരുന്നു മുഖ്യമായും നൽകിയിരുന്നത്."അതിൽ രണ്ടാമതും എന്റെ ഫോട്ടോ വന്നു-ലോക ബോക്സിങ്ങ് ഇതിഹാസം മുഹമ്മദാലിയുമായി ബോക്സിങ്ങ് നടത്തുന്നത്". തന്റെ ജീവകാരുണ്യ പ്രവർത്തനങ്ങൾക്ക് ഫണ്ട് സ്വരൂപിക്കാൻ ഖത്തറിലെത്തിയ മുഹമ്മദലിക്കൊപ്പം ഒരു ദിവസം മുഴുവൻ ചെലവഴിക്കാൻ അവസരം കിട്ടി. അതിന് വഴിയൊരുക്കിയത് മുതിർന്ന സഹപ്രവർത്തകനായ ബാബു മേത്തറായിരുന്നു."ബോറടിച്ചിരുന്ന മുഹമ്മദലി ഞാനുമായി തമാശയ്ക്ക് ബോക്സിങ്ങ് നടത്തി.ഫോട്ടോഗ്രാഫർ അവ പകർത്തി.അന്ന് അലിക്ക് പാർക്കിൻസൺസ് ഡിസീസിന്റെ തുടക്കമായിരുന്നു".

1992 മുതൽ 2003 വരെ, തായ്ലാന്റ് തലസ്ഥാനമായ ബാങ്കോക്കിൽ നിന്ന് പ്രസിദ്ധീകരിക്കുന്ന ദ നേഷൻ പത്രത്തിലാണ് പ്രവർത്തിച്ചത്. "സ്പോർട്സിൽ നിന്ന് മാറണമെന്നുണ്ടായിരുന്നു. പക്ഷേ ,ആദ്യ അസൈൻമെന്റ് തന്നെ ബാർസലോണ ഒളിമ്പിക്സ് കവർ ചെയ്യാനായിരുന്നു".അവിടെ അസിസ്റ്റന്റ് എഡിറ്ററായിരിക്കെ 2003 - ൽ ഹോങ്കോങ്ങിലെ സൗത്ത് ചൈന മോണിങ്ങ് പോസ്റ്റിൽ അസി.എഡിറ്ററായി ചേർന്നു. 2013 മുതൽ 2021 വരെ അവരുടെ റേഡിയോ ആന്റ് ടെലിവിഷൻ ഹോങ്കോങ്ങിൽ(RTHK) വെബ് എഡിറ്ററായി.

"മാദ്ധ്യമരംഗം വളരെ ഊർജ്ജസ്വലമായ-vibrant- കാലമായിരുന്നു. എല്ലാവരും സൗത്ത് ചൈന മോണിങ്ങ് പോസ്റ്റിനെ ഉറ്റുനോക്കിയിരുന്നു. ലോകത്തെ തന്നെ ഏറ്റവും വരുമാനമുള്ള പത്രങ്ങളിലൊന്നായിരുന്നു. അത്.അന്ന് ക്ലാസിഫൈഡ് പരസ്യങ്ങൾ തന്നെ 100-ൽ അധികം പേജുകളുണ്ടായിരുന്നു".

 

"സാർസ് (SARS)വൈറസ് പൊട്ടിപ്പുറപ്പെട്ട്, എല്ലാവരും മാസ്ക്കിട്ട് നടക്കുന്ന കാലത്താണ് ഹോങ്കോങ്ങിൽ എത്തിയത്. ആറു മാസത്തോളം ആരുടേയും മുഖം കണ്ടില്ല". നൂറു വർഷത്തിലേറെ നീണ്ടു നിന്ന കോളനി ഭരണത്തിന് ശേഷം ഹോങ്കോങ്ങ് ബ്രിട്ടൻ ചൈനയ്ക്ക് കൈമാറിയത് 1997ലായിരുന്നു. അതിനു ശേഷം ചൈനയുടെ കീഴിലുള്ള പത്യേക പ്രവിശ്യയാണ് ഹോങ്കോങ്ങ് . അമ്പതു വർഷത്തേയ്ക്ക് ഹോങ്കോങ്ങിന്റെ ജീവിത രീതിയിലും സംസ്ക്കാരത്തിലും മാറ്റം വരുത്തില്ലെന്നും

കൈമാറ്റക്കരാറിൽ വ്യവസ്ഥയുണ്ടായിരുന്നു. ചൈനയുടേതിൽ നിന്ന് വ്യത്യസ്തമായ സ്വതന്ത്ര നീതിന്യായ സംവിധാനം അവിടെ നിലവിലുണ്ടായിരുന്നു. പക്ഷേ, ഇപ്പോൾ ചൈനയിലേതു പോലെ, നീതിന്യായ സംവിധാനത്തിലുൾപ്പെടെ എല്ലാറ്റിലും പാർട്ടിയുടെ അധീശത്വമുള്ള വ്യവസ്ഥിതിയിലേക്ക് അത് അധ:പതിച്ചു കൊണ്ടിരിക്കുന്നുവെന്നും അദ്ദേഹം പറഞ്ഞു.

 

ചൈനയെ അനുകൂലിക്കുകയും എതിർക്കുകയും ചെയ്യുന്ന വിവിധ രാഷ്ട്രീയ പാർട്ടികളും ഇംഗ്ലീഷ്, ചൈനീസ് പത്രങ്ങളും മുൻപ് വളരെ സജീവമായിരുന്നു.പക്ഷേ,2014,2019 വർഷങ്ങളിലുണ്ടായ വിദ്യാർത്ഥി പ്രക്ഷോഭങ്ങളെ തുടർന്ന്, 2020ൽ നിലവിൽ വന്ന ദേശീയ സുരക്ഷാ നിയമത്തോടെ ഹോങ്കോങ്ങിൽ,ഇന്ത്യയിലെ അടിയന്തരാവസ്ഥക്കാലത്തിനു തുല്യമായ സ്ഥിതിവിശേഷമാണ് ഇപ്പോൾ.

മുൻപ് ഹോങ്കോങ്ങ് കേന്ദ്രീകരിച്ചായിരുന്നു മിക്ക വിദേശ മാദ്ധ്യമങ്ങളും ഏജൻസികളും ചൈനയിൽ നിന്നും മറ്റുമുള്ള വാർത്തകൾ റിപ്പോർട്ട് ചെയ്തിരുന്നത്. അന്ന് അവർക്ക് വർക്കിങ്ങ് വിസ കിട്ടുവാൻ ചൈനയെക്കാൾ എളുപ്പം ഹോങ്കോങ്ങായിരുന്നു.ഇപ്പോൾ മിക്കവരും അവിടം വിട്ടു പോയി.

 

കോവിഡ് നിയന്ത്രണങ്ങൾ തുടങ്ങിയതോടെ ചൈനയിൽ നിന്ന് സർക്കാർ വിദേശ പത്രപ്രവർത്തകരെ പുറത്താക്കിത്തുടങ്ങി. ഓദ്യോഗിക വിശദീകരണങ്ങൾക്ക് വിരുദ്ധമായ വാർത്തകൾ നൽകിയതിനായിരുന്നു ഇത്.ഷി ജിൻ പിങ്ങ് അധികാരത്തിൽ പിടിമുറുക്കിയതോടെ ബെയ്ജിങ്ങിൽ അവശേഷിച്ച വിദേശ മാദ്ധ്യമപ്രവർത്തകർ കടുത്ത നിരീക്ഷണത്തിലാണ്.

അവിടെ ഇപ്പോൾ ഇന്ത്യൻ പത്രലേഖകരാരുമില്ല. അവർക്ക് സർക്കാർ വിസ പുതുക്കി നൽകാത്തതിനെ തുടർന്ന് ഏറ്റവും അവസാനം ചൈനയിലെ ബ്യൂറോ പൂട്ടിയത് ദ ഹിന്ദു പത്രമാണ്.

 

മുൻപും ഗൂഗിളോ സോഷ്യൽ മീഡിയയോ ചൈനീസ് സർക്കാർ അ നുവദിച്ചിരുന്നില്ല. ഫേസ്ബുക്ക്,യൂട്യൂബ്,ട്വിറ്റർ തുടങ്ങിയവ ചൈനയിൽ ബ്ളോക്ക് ചെയ്യപ്പെട്ടു.അതിനെ 'ഗ്രേറ്റ് ഫയർവാൾ ഓഫ് ചൈന' എന്നാണ് വിശേഷിപ്പിക്കപ്പെടുന്നത്. പകരം, സർക്കാർ നിയന്ത്രണത്തിലുള്ള വി-ചാറ്റ് , സിനോ വെയ്ബോ(Sino Weibo) എന്നീ സമൂഹ മാദ്ധ്യമങ്ങളാണുള്ളത്. 

 

ചൈനയിൽ കോവിഡ് പടർന്ന് പിടിച്ച വാർത്ത ആദ്യം പുറത്തു കൊണ്ടുവന്നത് മോണിങ്ങ് പോസ്റ്റ്, ദ ആപ്പിൾ ,RTHK തുടങ്ങിയ മുഖ്യധാരാമാദ്ധ്യമങ്ങളായിരുന്നു. ആ സമയത്ത് തന്നെ ഹോങ്കോങ്ങിലെ വൈറോളജി വിദഗ്ദ്ധർ ലോകത്തിന് അപകട മുന്നറിയിപ്പ് നൽകിയിരുന്നു. അന്ന്, എന്തുകൊണ്ട് അതിർത്തി അടച്ചില്ലെന്നും ഈ മാദ്ധ്യമങ്ങൾ സർക്കാാരിനോട് ചോദിച്ചു.

 

ഹോങ്കോങ്ങിൽ ചൈനയുടെ താല്പര്യങ്ങൾക്ക് എതിരായതെന്തെങ്കിലും പത്രങ്ങളിൽ വന്നാൽ ചൈനീസ് അധികാരികൾ എഡിറ്റർമാരെ വിളിച്ചു വരുത്തുകയാണ് പതിവ് -'call the editor for a tea' എന്നാണ് ഇത് അറിയപ്പെടുന്നത്.

ചൈനീസ് മാദ്ധ്യമങ്ങൾക്കായി പ്രവർത്തിക്കുന്ന വിദേശപത്രപവർത്തകർ അവിടെ അറസ്റ്റ് ചെയ്യപ്പെട്ടിട്ടുണ്ട്. മുൻപ് ഹോങ്കോങ്ങിലെ എല്ലാ പത്രങ്ങളിലും ചൈനീസ് കമ്യൂണിസ്റ്റ് പാർട്ടിയുടെ നയങ്ങളെയും സർക്കാരിനെയും വിമർശിക്കുന്ന എഡിറ്റോറിയലുകളുമുണ്ടായിരുന്നു. പക്ഷേ, ഇപ്പോൾ അതുമില്ല.

"എന്നിട്ടും കഴിഞ്ഞ മൂന്ന് വർഷമായി ജീവൻ പണയം വച്ച് സത്യം എഴുതുന്ന മാദ്ധ്യമപ്രവർത്തകർ ഇപ്പോഴും ഹോങ്കോങ്ങിലുണ്ട്".

ടിയനൻമെൻസ്ക്വയർ കൂട്ടക്കൊലയെ അനുസ്മരിപ്പിക്കുന്നതാണ് 6,4 എന്നീ അക്കങ്ങൾ(ജൂൺ 4, 1989).കഴിഞ്ഞ ഏഷ്യൻ ഗെയിംസിൽ ഒന്നും രണ്ടും സമ്മാനങ്ങൾ കിട്ടിയ രണ്ട് വനിതാ

അത് ലെറ്റുകളുടെ ചിത്രങ്ങൾ ആദ്യദിവസം സോഷ്യൽ മീഡിയയിൽ വന്നു. അടുത്ത ദിവസം സൈറ്റുകളിൽ നിന്ന് അവ എടുത്തു മാറ്റി.അവരുടെ ജെഴ്സിലെ നമ്പറുകൾ 6 , 4 എന്നിവയായിരുന്നു!

ടിയനൻമെൻ സ്ക്വയർ കൂട്ടക്കൊലയുടെ ഓർമ്മ പുതുക്കി, ചൈനയിൽ അനുസ്മരണങ്ങൾ നടന്നിരുന്നത് ഹോങ്കോങ്ങിൽ മാത്രമായിരുന്നു.കൈയിൽ കത്തിച്ചുവച്ച മെഴുകുതിരികളുമായി പതിനായിരങ്ങൾ പാർക്കിൽ ജൂൺ 4 ന് ഒത്തുകൂടിയിരുന്നു.2021ന് ശേഷം അത് നിരോധിക്കപ്പെടു.

"നമ്മൾ കാണുന്ന ചൈനയല്ല, ചൈനീസ് ജനതയ്ക്ക് സ്വന്തം രാജ്യം. അത് മറ്റൊരു ലോകമാണ്. ടിയനൻമെൻസ്ക്ക്വയർ കൂട്ടക്കുരുതി എല്ലാ റെക്കാർഡുകളിലും നിന്ന് മായ്ക്കപ്പെട്ടിരിക്കുന്നു. സർക്കാർ കുത്തിവച്ച രാജ്യസ്നേഹമാണവർക്ക്. ചൈനയേയും കമ്യൂണിസ്റ്റ് പാർട്ടിയേയും തമ്മിൽ തിരിച്ചറിയാൻ അവർക്ക് കഴിയില്ല".

 

2000ൻ്റെ ആദ്യം വരെ മാവോയെയും ഡെങ്ങിനെയും ഒഴിച്ച് ആരെയും വിമർശിക്കുകകയോ കളിയാക്കുകയോ ചെയ്യാമായിരുന്നു. പാർട്ടിക്കകത്തു നടക്കുന്ന അഴിമതികളെക്കുറിച്ച് അകത്തുള്ളവർ തന്നെ പറഞ്ഞിരുന്നു."ഇവിടുത്തെ കോൺഗ്രസിലേതു പോലെയായിരുന്നു മുൻപ് ചൈനീസ് പാർട്ടി".പക്ഷേ, ഇപ്പോൾ എല്ലാവരും കടുത്ത നിരീക്ഷണത്തിലാണ്. എങ്കിലും,ന്യൂയോർക്ക് ടൈംസ്, ബ്ലൂംബർഗ്ഗ് എന്നീ മാദ്ധ്യങ്ങൾ വളരെ സാഹസികമായി ചൈനയിലെ അഴിമതികളെക്കുറിച്ചും മറ്റുള്ള അന്വേഷണാത്മക വാർത്തകൾ പുറത്തുകൊണ്ടുവരുന്നുണ്ടെന്നും ജി. ഹരികുമാർ പറഞ്ഞു.

 

2021ൽ കാലിക സംഭവങ്ങളെക്കുറിച്ച് എല്ലാ ആഴ്ചയും ദ ആപ്പിൾ പത്രത്തിൽ സറ്റയറിക്കൽ കുറിപ്പുകൾ എഴുതിയിരുന്നുവെന്ന് ജി.ഹരികുമാർ പറഞ്ഞു. അവ നേരിട്ടുള്ള വിമർശനമായിരുന്നില്ല. "പക്ഷേ, എന്താണ് ഉദ്ദേശിച്ചതെന്ന് എല്ലാവർക്കും അറിയാമായിരുന്നു.പക്ഷേ, കമ്യൂണിസ്റ്റ് പാർട്ടിക്ക് സറ്റയർ ഇഷ്ടമല്ലെന്ന് പല സുഹൃത്തുക്കളും അന്ന് മുന്നറിയിപ്പ് നൽകിയിരുന്നു''.മൂന്ന് വർഷം മുൻപ് ദ ആപ്പിളിന്റെ പത്രാധിപർ അറസ്റ്റ് ചെയ്യപ്പെട്ടു.വാടക നിയമം ലംഘിച്ചെന്ന നിസ്സാര കേസിൽ പിടിയിലായ അദ്ദേഹത്തിനെതിരെ അടിമറി ഉൾപ്പെടെ ധാരാളം കുറ്റങ്ങൾ ചുമത്തി. അവയുടെ വിചാരണ പോലും തുടങ്ങിയിട്ടില്ല.

 

പത്രങ്ങൾക്ക് സ്വാതന്ത്ര്യം ഉണ്ടായിരുന്നുവെങ്കിലും മുൻപ് സർക്കാരിനെ വിമർശിച്ചിരുന്നത് വസ്തുതകൾ നിരത്തിവച്ച് മാത്രയിരുന്നു. അതിനായി സാങ്കേതിക വിദ്യയും ഡേറ്റ അനാലിസിസും വരെ ഉപയോഗപ്പെടുത്തി. 

 

മോണിങ്ങ് പോസ്റ്റ് ചില ദിവസങ്ങളിൽ ചൈനയിൽ വിതരണം ചെയ്യുന്നത് വിലക്കിയിരുന്നു. ചില ദിവസങ്ങളിൽ ചൈനീസ് അധികൃതർ ചില വാർത്തകൾ കറുപ്പിച്ചിരുന്നു. ഇപ്പോൾ നിയന്ത്രണങ്ങൾ വളരെ കടുത്തതാണ്.മുൻ സഹപ്രവർത്തരിൽ പകുതിയോളം പേർ വിട്ടുപോയതായും ഹരികുമാർ പറഞ്ഞു.

 

വിവിധ രംഗങ്ങളിൽ നിന്നുള്ളവർക്ക് പ്രാതിനിദ്ധ്യമുള്ള പ്രാദേശിക തല തെരഞ്ഞെടുപ്പിലൂടെ അധികാരത്തിലെത്തുന്ന ചീഫ് എക്സിക്യൂട്ടീവ് നടത്തുന്ന ഭരണമാണ് ഹോങ്കോങ്ങിൽ.ഭരണ സംവിധാനത്തിന്റെ ഗുണനിലവാരത്തെക്കുറിച്ച് ശ്രദ്ധാലുക്കളാണ് അവിടുത്തെ ജനങ്ങൾ. ഹോങ്കോങ്ങിൽ കുറ്റകൃത്യങ്ങൾ വളരെ കുറവാണ്. ശിക്ഷ കടുത്തതാണ്.

 

ഹോങ്കോങ്ങിലെ ടെലിവിഷൻ, റേഡിയോ ചാനലുകൾ വിനോദ പരിപടികൾക്കാണ് കൂടുതൽ പ്രാധാന്യം നൽകുന്നത്."പക്ഷേ, ഇന്ത്യയിലെ ചാനലുകളിലെ മോശം വാർത്താ പരിപാടികളുമായി അവയെ താരതമ്യം ചെയ്യാനേ കഴിയില്ല. വസ്തുതകൾക്കാണ് അവർ പ്രാധാന്യം നൽകുന്നത്".

സാമ്പത്തിക പുരോഗതിക്കപ്പുറം ആധിപത്യത്തിനാണ് ചൈന ഇന്ന് പ്രധാന്യം നൽകുന്നതെന്ന് ജി.ഹരികുമാർ പറഞ്ഞു. മിക്ക ബഹുരാഷ്ട്ര കുത്തകകളും രാജ്യങ്ങളും ഉല്പാദനത്തിനും വിപണനത്തിനും ചൈനയെയാണ് ആശ്രയിക്കുന്നത്. അമേരിക്ക പോലും അതാണ് ചെയ്യുന്നത്. ലോകത്തെ ഏറ്റവും വലിയ വിപണി അവരുടേതാണ്. മിക്ക രാജ്യങ്ങളിലും സ്ഥാപനങ്ങളുടെ മേധാവിമാരായി ചൈനക്കാരെ നിയമിക്കുന്നത് ഇത് ലക്ഷ്യമാക്കിയാണ്.

 

ചൈനക്കാർ ലോകമെമ്പാടും കുടിയേറുകയും അവിടങ്ങളിലെല്ലാം വസ്തുവകകൾ വാങ്ങിക്കൂട്ടുകയും ചെയ്യുന്നുണ്ട്. അമേരിക്കയിൽ പോലും അവർ കൂടിയ വിലയ്ക്ക് വസ്തുകൾ വാങ്ങുന്നുണ്ട്.

"ചൈനയിൽ എന്തെങ്കിലും പ്രശ്നമുണ്ടായാൽ രക്ഷപെട്ടു പോവാനാണിത്- a parachute for next generation".

 

2021 ൽ കേരളത്തിൽ മടങ്ങിയെത്തിയ ജി.ഹരികുമാർ , തിരുവനന്തന്തപുരം ആസ്ഥാനമായി ടിക് ടോക് എന്ന കേരള ടെക്നോളജി ന്യൂസ് ലെറ്റർ ആരംഭിച്ചു.

 

ചർച്ചയിൽ സുരേഷ് നെല്ലിക്കോട്, മോഹൻദാസ് പാറപ്പുറത്ത് , പി.വി ഹരികൃഷ്ണൻ എന്നിവർ പങ്കെടുത്തു.

 

ഡി.പ്രദീപ് കുമാർ, കെ. ഹേമലത എന്നിവർ മോഡറേറ്റർമാരായി.

ഈ പരിപാടിയുടെ ശബ്ദലേഖനം മീഡിയ വേവ്സ് യൂട്യൂബ് ചാനലിലുണ്ട്.https://youtu.be/e0d9iaHaZzw?si=w8xGBHYf0PqtoDhf