ജനാധിപത്യത്തിനു പകരം വെയ്ക്കാൻ...

ഇന്ത്യൻ ജനാധിപഹ്യത്തിന്റെ ഏറ്റവും വലിയ മഹത്വം അത് എല്ലാ രംഗത്തും ബഹുസ്വരതയെ അംഗീകരിക്കുന്നു എന്നതാണു.ഏതെങ്കിലും മതത്തിൽ വിശ്വിക്കാനോ,ഒരു മതത്തിലും വിശ്വസിക്കാതിരിക്കാനോ അത് ഓരോ പൌരനും/പൌരയ്ക്കും അവകാശം നൽകുന്നു.പരിമിതമായ ചില നിയന്ത്രണൾക്ക് വിധേയമായി, അത് അഭിപ്രായപ്രകടനസ്വാതന്ത്ര്യം ഭരണഘടനാപരമായി ഉറപ്പു നൽകുന്നു.ബഹുകക്ഷി ജനാധിപത്യം,അതിന്റെ സർവ്വ പോരായ്മകൾക്കുമപ്പുറം,ഏറ്റവും അഭികാമ്യമായ ഭരണക്രമമാകുന്നത് അതുകൊണ്ടാണു.

കഴിഞ്ഞ രണ്ടു ദശാബ്ദങ്ങൾക്കുള്ളിൽ കേന്ദ്രത്തിലും ശക്തിപ്പെട്ട കൂട്ടുകക്ഷിഭരണസംവിധാനം നമ്മുടെ ജനാധിപത്യത്തെ കൂടുതൽ പ്രബലമാക്കുകയാണു ചെയ്തത്.അത് പ്രാദേശിക,പ്രാന്തീയ കക്ഷികൾക്കും അവർ പ്രതിനിധാനം ചെയ്യുന്ന വലിയൊരു ജനവിഭാഗത്തിനും അധികാരത്തിന്റെ ഗുണഫലങ്ങൾ എത്തിച്ചുകൊടുത്തു.ഒക്സ്ഫോർഡ് ഇംഗ്ലീഷ് സംസാരിക്കാത്തവർക്കും,കോട്ടും സ്യൂട്ടും ഇടാത്തവർക്കും,ഉന്നതകുലത്തിൽ പിറക്കാത്തവർക്കും അധികാരത്തിന്റെ കുഞ്ചികസ്ഥാനങ്ങൾ തന്നെ ലഭിച്ചു.അവരും രാജ്യത്തിന്റെ ഭാഗധേയം നിർണ്ണയിക്കുന്നതിൽ മുഖ്യപങ്കു വഹിക്കാൻ ആരംഭിച്ചു.

അതോടെ, പ്രബല മത,ജാതിവിഭാഗങ്ങളുടെ ഉറച്ച പിന്തുണയിൽ മാത്രം കെട്ടിപ്പടുത്ത രാഷ്ട്രീയപ്രസ്ഥാനങ്ങൾക്ക് ഹിന്ദി ഹൃദയഭൂമിയിൽ അടിത്തറ ഇളകുന്നതും നാം കണ്ടു.മണ്ഡൽകമ്മീഷൻ റിപ്പോർട്ട് നടപ്പാക്കാനുള്ള വിപ്ലവകരമായ തീരുമാനമായിരുന്നു രാഷ്ട്രീയഭൂമികയിലെ സമഗ്രമായ ഉടച്ചുവാർക്കലിനു കാരണമായത്.‘സ്റ്റാറ്റസ് ക്വോ’ രാഷ്ട്രീയത്തെ കടപുഴക്കിയെറിഞ്ഞ ആ ഉഷ്ണപാതത്തെ ചെറുക്കാൻ ബാബറി മസ്ജിദ് വിവാദത്തിനായില്ല.ദ്വികക്ഷി ഭരണത്തിനും ഭൂരിപക്ഷ വർഗ്ഗീയരാഷ്ട്രീയത്തിന്റെ ആത്യന്തിക ശിഥിലീകരണത്തിനും പിൽക്കാലം സാക്ഷ്യം വഹിച്ചു.ഒരു രഥയാത്രയും ഇപ്പോൾ തെരഞ്ഞെടുപ്പു വിജയത്തിലേക്ക് നയിക്കില്ല.

തങ്ങളും മതേതരവാദികളാണെന്നു സ്ഥാപിക്കാനായി പാർട്ടിയിലും ഭരണത്തിലും മനസില്ലാമനസ്സോടെ അധസ്ഥിതരേയും മുസ്ലീങ്ങളടക്കമുള്ള പിന്നാക്കക്കാരെയും അവർക്ക് പ്രതിഷ്ഠിക്കേണ്ടി വന്നു.അതുകൊണ്ടുതന്നെ തീവ്രവർഗ്ഗീയ അജണ്ടയിലേക്ക് മടങ്ങിപ്പോകാൻ അവർക്കിപ്പോൾ ആകില്ല.

അധികാരസ്ഥാനങ്ങളിൽ ചരിത്രത്തിലെ ഏറ്റവുമധികം പ്രാ‍തിനിദ്ധ്യം അധസ്ഥിതർക്കും പിന്നാക്കക്കാർക്കും ലഭിച്ചു എന്ന് മാത്രമല്ല ഇതിന്റെ പരിണതഫലം.എല്ലാ മേഖലയിലും അതിന്റെ ഒട്ടേറെ ഗുണഫലങ്ങളും അവർ അനുഭവിച്ചുകൊണ്ടിരിക്കുന്നു.അധികാരത്തിൽ പ്രാതിനിദ്ധ്യമില്ലായിരുന്നുവെങ്കിൽ കേരളത്തിലെ മുസ്ലീങ്ങളും ഈഴവരും വിദ്യാഭ്യാസരംഗത്ത് വൻ കുതിച്ചുചാ‍ട്ടം നടത്തുകയില്ലായിരുന്നു.അവർ ഇപ്പോഴും പിന്നാമ്പുറങ്ങളിൽ തന്നെ മാറ്റിനിർത്തപ്പെടുമായിരുന്നു.കേരളത്തിൽ മാത്രമല്ല,തമിഴ്നാട്ടിലും ഉത്തർപ്രദേശിലും സമൂഹത്തിലെ ഏറ്റവും പിന്നാക്കം നിൽക്കുന്ന ജനവിഭാഗങ്ങളുടെ ജീവിതനിലവാരത്തിൽ കഴിഞ്ഞ വർഷങ്ങളിൽ വൻപുരോഗതി ഉണ്ടായിട്ടുണ്ടു.പതിത ജനവിഭാഗങ്ങൾക്ക് അധികാരത്തിൽ പ്രാതിനിദ്ധ്യമുള്ള സംസ്ഥാനങ്ങളിലെല്ലാം ഈ കൂട്ടർക്ക് അടുത്തിടെ സാമൂഹികവും സാമ്പത്തികവുമായ ഉന്നതി ഉണ്ടായിട്ടുണ്ടു എന്നതിൽ തർക്കമില്ല.ഇന്ത്യൻ ജനാധിപത്യത്തിനു സ്തുതി.

മറ്റു സംസ്ഥാനങ്ങലിലെ മുസ്ലീം ജനവിഭാഗങ്ങളുമായി താരതമ്യംചെയ്താൽ ആനുപാതികമായി ഏറ്റവുമധികം പുരോഗതി ഉണ്ടായിട്ടുള്ളവരാണു ഇവിടുത്തെ മുസ്ലീങ്ങൾ.തീരദേശമേഖലയിലുള്ള ചെറിയൊരു ശതമാനം പേർ ഒഴിച്ചാൽ, കഴിഞ്ഞ ഒരു ദശാബ്ദം കൊണ്ടു വിദ്യാഭ്യാസരംഗത്ത് കേരളത്തിലെ മുസ്ലീം ജനവിഭാഗം നടത്തിയ കുതിച്ചുചാട്ടത്തിനു സമാനതകളില്ല.അടുത്തകാലം വരെയും കേരളത്തിലെ ഏറ്റവും പിന്നാക്കജില്ലകളിലൊന്നായിരുന്ന മലപ്പുറത്തെ കുട്ടികൾ എസ്.എസ്.എൽ.സി പരീക്ഷയിൽ നേടിയ തിളക്കമാർന്ന വിജയത്തെ ചൊല്ലി ഉണ്ടായ അനാ‍വശ്യ രാഷ്ട്രീയവിവദത്തെക്കുറിച്ച് ഓർക്കുക.ചോദ്യപ്പേപ്പർ ചോർത്തിയും ,കണ്ടെഴുതിയുമാണു അവർ ഈ നേട്ടങ്ങൾ കൊയ്തതെന്ന വൃത്തികെട്ട ആരോപണം ഉന്നയിച്ചുകൊണ്ടായിരുന്നു ചില സംശയാലുക്കൾ ഇതിനെ കുറച്ചുകാണിക്കാൻ ശ്രമിച്ചത്.പിന്നീട് ഒന്നിനുപിറകെ ഒന്നായി വന്ന പരീക്ഷാവിജയങ്ങൾ ഈ ആരോപണങ്ങളുടെ മുന ഒടിച്ചു.ഇന്ന് ഉന്നതവിദ്യാഭ്യാസമേഖലയിൽ നല്ലൊരുശതമാനം മുസ്ലീം കുട്ടികളുണ്ടു.പ്രൊഫഷണൽ കോഴ്സുകളിൽ അവർക്ക് നല്ല പ്രാതിനിദ്ധ്യമുണ്ടു.സിവിൽ സർവ്വീസ് പരീക്ഷകളടക്കമുള്ള ഉന്നതമത്സരപരീക്ഷകളിൽ അഭിമാനാർഹമായ വിജയം കൊയ്തെടുത്ത് ചരിത്രം രചിക്കുകയാണു കേരളത്തിലെ മുസ്ലീംങ്ങടക്കമുള്ള അധസ്ഥിതർ.

രാഷ്ട്രീയ വിലപേശലിലൂടെ മലപ്പുറം ജില്ലയും സ്കൂളുകളും കോളേജുകളും തട്ടിയെടുത്ത്, സ്വന്തം സാമ്രാജ്യം സ്ഥാപിക്കാൻ ശ്രമിക്കുന്നുവെന്ന് നിരന്തരം ആരോപിക്കപ്പെട്ട ഒരു ജനവിഭാഗമാണു ഇന്ന് വിദ്യാഭ്യാസമേഖലയിൽ ക്രിസ്ത്യൻ സമുദായങ്ങളെപ്പോലും അതിശയിപ്പിക്കുന്ന വിധം മുന്നേറിക്കൊണ്ടിരിക്കുന്നത്.മാദ്ധ്യമമേഖലിൽ അവർ മറ്റു വിഭാഗങ്ങളെ ബഹുദൂരം പിന്നിലാക്കിക്കഴിഞ്ഞു.കമ്പ്യൂട്ടർ അധിഷ്ഠിതമായ നവ മാദ്ധ്യമ,വാർത്താവിനിമയ രംഗങ്ങളിലെ വിദഗ്ദ്ധരിൽ നല്ലൊരു ശതമാനം പേരും മറ്റെവിടെ നിന്നുമല്ല.ബാംഗ്ലൂരിലെ ഐ.ടി മേഖലയിൽ മലപ്പുറത്തുകാരുടെ എണ്ണം കുതിച്ചുയർന്നുകൊണ്ടിരിക്കുകയാണു. പണ്ടു ഗൾഫിലേക്ക് കുടിയേറിയിരുന്ന അവിദഗ്ദ്ധതൊഴിലാളികളിൽ ബഹുഭൂരിപക്ഷം പേരും മലപ്പുറത്തുകാരായിരുന്നു.ഇന്ന് ഗൾഫിലേക്ക് മാത്രമല്ല അമേരിക്ക ഉൾപ്പെടെയുള്ള സമ്പന്ന രാഷ്ട്രങ്ങളിലേക്ക് അവർ ക്ഷണിച്ചുവരുത്തുന്ന വിദഗ്ദ്ധരായ അദ്ധ്യാപകരും ഡോക്ടർമാരും എഞ്ചിനിയർമാരും അടങ്ങുന്ന ഉന്നതശ്രേണിയിൽ ഇവിടുത്തുകാർ ധാരാളമുണ്ടു. അവരാരും തങ്ങൾ ജനിച്ചുവളർന്ന സാമൂഹികചുറ്റുപാടുകളെ മറന്ന് അധാർമ്മികമായ ജീവിതം നയിക്കുന്നവരല്ല.പുതിയ പദവികളും സൌകര്യങ്ങളും നൽകുന്ന പുതിയ ആസക്തികളിൽ അഭിരമിച്ചുകൊണ്ടു വഴിതെറ്റിപോകുന്നവരല്ല.ബഹുസ്വരതയിലധിഷ്ഠിതമായ ഭരണസംവിധാനവും അത് അരക്കിട്ടുറപ്പിക്കുന്ന മതേതരമയ വിദ്യാഭ്യാസവും നൽകിയ ശക്തമായ അടിത്തറയാണു അവർക്ക് ഇതിനുള്ള ആത്മബലം നൽകുന്നത്.

ജനാധിപത്യത്തിന്റെ ശുദ്ധവായുവാണു പെൺകുട്ടികളെ സ്കൂളിലയക്കാനും,ബാല്യത്തിലേ അവരെ നിക്കാഹ് ചെയ്യിച്ചയക്കാതെ അവർക്ക് ഉന്നത വിദ്യാഭ്യാസം നൽകി പുതിയ ഉയരങ്ങൽ കീഴടക്കാനും പുതുലോകങ്ങൾ കണ്ടെത്താനും പ്രേരകമായത്.പതിനാലും പതിനഞ്ചും വയസ്സിൽ നിക്കാഹ് ചെയ്യിച്ചയക്കുകയും ചെറുപ്രായത്തിലേതന്നെ നാലും അഞ്ചും കുട്ടികളുടെ ഉമ്മമാരായി തീരുകയും ചെയ്യുന്നവരുടെ ജില്ല എന്ന ദുഷ്പേർ ഇപ്പോൾ മലപ്പുറത്തിനില്ല.ജനസംഖ്യാവർദ്ധനവിൽ ഇപ്പോഴും ഒന്നാം സ്ഥാനത്താണെങ്കിലും,ശൈശവവിവാഹ,ശിശുമരണ നിരക്കിൽ സാരമായ കുറവ് വന്നിട്ടുണ്ടു.സ്ത്രീ സാക്ഷരതാനിരക്ക് കുതിച്ചുയർന്നു(85.96 ശതമാനം).രാജ്യത്തെ ആദ്യത്തെ കമ്പ്യൂട്ടർ സാക്ഷരതാജില്ലയിലെ അക്ഷയകേന്ദ്രങ്ങളിലെ പഠിതാക്കളിൽ 55 ശതമാനവും സ്ത്രീകളായിരുന്നു.അവരുടെ തൊഴിൽ പ്രാതിനിദ്ധ്യത്തിലും വൻ വർദ്ധനവു ഉണ്ടായി.പൊതുരംഗത്ത് സ്ത്രീകൾ പ്രവർത്തിക്കുന്നത് ഹറാമായി കരുതിയ പരമ്പര്യത്തിൽ നിന്ന് ഇന്നെത്രയോ കാതങ്ങൾ മുന്നോട്ട് പോയിരിക്കുന്നു.പത്ത് വർഷം മുൻപ് തദ്ദേശസ്വയംഭരണ സ്ഥാപനങ്ങളിലേക്ക് മത്സരിക്കാൻ മുസ്ലീം വനിതകളെത്തേടി രാഷ്ട്രീയപാർട്ടികൾ നെട്ടോട്ടമോടിയസ്ഥാനത്ത് ഇന്ന്,തെരഞ്ഞെടു പ്രഖ്യാപിക്കും മുൻപ് തന്നെ സ്ഥാനാർത്ഥികൾ കളത്തിലിറങ്ങാൻ ഒരുങ്ങി നിൽക്കുന്നു.മുസ്ലീം ഭൂരിപക്ഷ പ്രദേശങ്ങളിൽ,അതുകൊണ്ടു തന്നെ,അടുത്ത് നടക്കുന്ന തദ്ദേശസ്ഥാപനതെരഞ്ഞെടുപ്പ് വൻ സാമൂഹികവിസ്ഫോടനമാണു.

മതാധിഷ്ടിതമായ ഭരണവ്യവസ്ഥ നിലനിൽക്കുന്ന ഗൾഫ് രാജ്യങ്ങളിലോ,ഇറാനിലോ,ദുർബലമായ ജനാധിപത്യം നിലനിൽക്കുന്ന പാകിസ്ഥാനിലോ ബംഗ്ലാദേശിലോ ഉള്ളവർക്കൊന്നും സ്വപ്നം കാണാനാകാത്ത സാമൂഹികപുരോഗതിയാണു കേരളത്തിലുണ്ടായിരിക്കുന്നത്.സ്ത്രീകൾക്ക് വളരെ പരിമിതമായ പൌരസ്വാതന്ത്യം മത്രമുള്ള, വളരെ പ്രാകൃതമായ ശിക്ഷാവിധികളുള്ള,ബഹുസ്വരതയില്ലാത്ത ഭരണവ്യവസ്ഥ നിലനിൽക്കുന്ന രാജ്യങ്ങളിൽ നിന്ന് നമുക്ക് എന്താണു പഠിക്കാനുള്ളത്? എന്താണു അനുകരിക്കാനുള്ളത്?

മാനവരാശി ഇന്നേവരെ ആവിഷ്കരിച്ച ഏറ്റവും സുതാര്യവും മാതൃകാപരവുമായ ഭരണവ്യവസ്ഥയായ ഇന്ത്യൻ ജനാധിപത്യത്തെ അട്ടിമറിച്ചുകൊണ്ട്,പകരം മതാധിഷ്തിതമായ ഭരണം കൊണ്ടുവരുവാൻ ശ്രമിക്കുന്ന ഏതെങ്കിലും തീവ്രവാദി സംഘടനയ്ക്ക് ബഹുഭൂരിപക്ഷത്തിന്റെ പിന്തുണ ഒരിക്കലും ഉണ്ടാവുകയില്ല.എല്ലാ പ്രതിസന്ധികളേയും അതിജീവിച്ച് സർവ്വമേഖയിലും വൻ കുതിച്ചുചാട്ടത്തിനൊരുങ്ങുന്ന ഒരു ജനസമൂഹത്തെയാകെ അരക്ഷിതത്വത്തിന്റെ ആഴക്കടലിലേക്ക് തള്ളിവിടാൻ മാത്രമേ,ഈ ജിഹാദുകൾ ഇടവരുത്തൂ.അത് ആത്മഹത്യാപരമാണെന്ന് അറിയുക.

ജനാധിപത്യത്തിനു പകരം വെയ്ക്കാൻ മറ്റൊന്നുമില്ല.കേരളത്തിലെ മുസ്ലീംങ്ങൾക്ക് അത് നന്നായി അറിയാം.